ເອດີບີ ຊ່ວຍເຫລືອລາວປັບປຸງການທ່ອງທ່ຽວ ແລະ ການບໍລິການໃນຕົວເມືອງ
ພິທີມອບ-ຮັບທຶນຊ່ວຍເຫລືອລ້າ 125,5 ລ້ານໂດລາ ຈາກທະນາຄານພັດທະນາອາຊີ (ເອດີບີ) ໃຫ້ແກ່ ສປປ ລາວ ໄດ້ມີຂຶ້ນໃນວັນທີ 16 ຕຸລານີ້ ທີ່ນະຄອນຫລວງວຽງຈັນ ລະຫວ່າງທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ແລະ ທ່ານ ຢະຊູຊິ ເນກິຊິ ຜູ້ຕາງໜ້າ ເອດີບີ ປະຈຳ ສປປ ລາວ ເພື່ອສະໜັບສະໜູນການປັບປຸງວຽກງານທ່ອງທ່ຽວ ແລະ ການບໍລິການໃນຕົວເມືອງ ຈຳນວນ 3 ໂຄງການຄື: ໂຄງການພັດທະນານ້ຳປະປາ ແລະ ສຸຂະພິບານ (ທຶນຊ່ວຍເຫລືອລ້າເພີ່ມ), ໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນ້ຳຂອງໄລຍະ 4 ແລະ ໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວໃນອະນຸພາກພື້ນລຸ່ມແມ່ນ້ຳຂອງໄລຍະ 2.
ທ່ານ ຢະຊູຊິ ເນກິຊິ ມີຄຳເຫັນໃນພິທີວ່າ: ຕົວເມືອງ ແລະ ເມືອງທີ່ສວຍງາມ, ໜ້າຢູ່ມີບົດບາດສຳຄັນຕໍ່ການພັດທະນາອຸດສາຫະກຳ ແລະ ການບໍລິການ ໂດຍສະເພາະເພື່ອສົ່ງເສີມໃຫ້ມີການຜະລິດໃນໂຮງຈັກໂຮງງານ, ການຜະລິດກະສິກຳເປັນສິນຄ້າ ແລະ ການທ່ອງທ່ຽວ ເຊິ່ງໂຄງການຊ່ວຍເຫລືອລ້າດັ່ງກ່າວໄດ້ຢືນຢັນເຖິງຄຳໝັ້ນສັນຍາຂອງ ເອດີບີ ທີ່ມີຕໍ່ ສປປ ລາວ ເພື່ອປັບປຸງຕົວເມືອງ, ປັບປຸງວຽກງານທ່ອງທ່ຽວ ພ້ອມທັງດຶງດູດການລົງທຶນແບບດຍືນຍົງ ເພື່ອຈະສ້າງວຽກເຮັດງານທຳໃນຫລາຍຂະແໜງການເສດຖະກິດ ແລະ ຈະຊ່ວຍໃຫ້ລາວສາມາດຫລຸດພົ້ນອອກຈາກສະຖານະພາບປະເທດດ້ອຍພັດທະນາພາຍໃນປີ 2020.
ທຶນຊ່ວຍເຫລືອລ້າດັ່ງກ່າວ 47 ລ້ານໂດລາສະຫະລັດ ສຳລັບໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວໃນອະນຸພາກພື້ນແມ່ນ້ຳຂອງ, ຊ່ວຍສະໜັບສະໜູນຄວາມພະຍາຍາມຂອງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເພື່ອປັບປຸງບູລະນະເສັ້ນທາງເຂົ້າເຖິງແຫລ່ງທ່ອງທ່ຽວ, ປັບປຸງສະພາບແວດລ້ອມໃນຕົວເມືອງ ແລະ ການບໍລິການຕ່າງໆ ທີ່ຕິດພັນກັບການທ່ອງທ່ຽວ ແລະ ການເພີ່ມທະວີຄຸ້ມຄອງວຽກງານທ່ອງທ່ຽວໃຫ້ມີຄວາມຍືນຍົງໃນແຂວງຫລວງພະບາງ, ແຂວງວຽງຈັນ ແລະ ແຂວງຈຳປາສັກ. ສ່ວນອີກ 48 ລ້ານໂດລາສະຫະລັດ ແມ່ນສຳລັບໂຄງການພັດທະນາຕົວເມືອງຕາມແລວເສດຖະກິດອະນຸພາກພື້ນແມ່ນ້ຳຂອງ 4 ເພື່ອປັບປຸງວຽກງານການບໍລິການຕົວເມືອງ ລວມທັງການກໍ່ສ້າງໂຮງງານບໍາບັດນ້ຳເປື້ອນ ແລະ ລະບົບລະບາຍນ້ຳ, ການບໍລິຫານຈັດການສິ່ງເສດເຫລືອ ແລະ ການກໍ່ສ້າງຕາຝັ່ງກັນເຈື່ອນເພື່ອປ້ອງກັນນ້ຳຖ້ວມ ແລະ ອີກ 30 ລ້ານໂດລາສະຫະລັດ ແມ່ນສະໜອງທຶນເພີ່ມໃຫ້ແກ່ໂຄງການນ້ຳປະປາ ແລະ ສຸຂາພິບານ.
