ເປີດເງື່ອນໄຂພິເສດ ເຊລຊີ ດຶງ ອາເກ້ ກັບຮັງ
ແມນເຊັສເຕີ ຢູໄນເຕັດ ແລະ ທ໊ອດແນມ ຮ໊ອດສະເປີ 2 ສະໂມສອນແຫ່ງ ພຣີເມຍລີກ ຕົກເປັນຂ່າວວ່າຕ່າງສົນໃຈຈະຄວ້າ ນາທານ ອາເກ້ ປາກາຫລັງຄົນເກັ່ງຂອງ ບອນມັດ ແຕ່ອາດຕ້ອງຜິດຫວັງ ເນື່ອງຈາກ ເຊລຊີ ມີເງື່ອນໄຂສາມາດດຶງນັກເຕະກັບຮັງໄດ້ເຊັ່ນກັນ.
ໂຊເຊ ມູຣິນໂຢ ຜູ້ຈັດການທີມ ແມນເຊັສເຕີ ຢູໄນເຕັດ ຢາກໄດ້ເຊັນເຕີຮາບຄົນໃໝ່ ຫລັງຈາກຜິດຫວັງໃນຊຳເມີ້ຜ່ານມາ. ຂະນະທີ່ ສະເປີ ກໍເຝົ້າຕິດຕາມຟອມຂອງ ອາເກ້ ຢ່າງໃກ້ຊິດ. ເຖິງຢ່າງໃດກໍຕາມ ມີຂ່າວວ່າ: ບອນມັດ ທີ່ຄວ້າຕົວນັກເຕະໄວ 23 ປີຮ່ວມທັບຖາວອນໃນລາຄາ 20 ລ້ານປອນ ຈະຕ້ອງພົບກັບ ເຊລຊີ ກ່ອນຖ້າມີຂໍ້ສະເໜີໃດໆເຂົ້າມາ ເນື່ອງຈາກ ເຊລຊີ ມີເງື່ອນໄຂຊື້ຕົວກັບໃນລາຄາ 40 ລ້ານປອນ.
ແມນເຊັສເຕີ ຢູໄນເຕັດ ແລະ ສະເປີ ອາດຈະເຝົ້າຕິດຕາມສະຖານະການຂອງ ອາເກ້ ໄປຈົນຈົບລະດູການນີ້ ແຕ່ຈະຄວ້າດາວເຕະທີມຊາດຮອນແລນນັ້ນ ພວກເຂົາຈຳເປັນຕ້ອງລໍຖ້າຈົນກວ່າ ເຊລຊີ ຈະປະກາດຄວາມຕັ້ງໃຈຂອງພວກເຂົາອອກມາ.
ນອກຈາກນີ້ ເຖິງວ່າ ເມົາຣິຊິໂອ ຊາຣີ ຜູ້ຈັດການທີມ ເຊລຊີ ບໍ່ສົນໃຈຈະດຶງ ອາເກ້ ກັບສະແຕມຟອດຣິດ ແຕ່ຖ້າມີຂໍ້ສະເໜີຈາກ ແມນເຊັສເຕີ ຢູໄນເຕັດ ຫລື ສະເປີ ທາງ ບອນມັດ ກໍຕ້ອງເປີດໂອກາດໃຫ້ ເຊລຊີ ໄດ້ມີໂອກາດຄວ້ານັກເຕະກ່ອນ ແລະ ນັ້ນອາດເຮັດໃຫ້ທັງ 2 ສະໂມສອນຕ້ອງພົບອຸປະສັກ.
