ແຮງງານກຳປູເຈຍກັງວົນຕາມຄຳຂູ່ຂອງ EU ແຕ່ຜູ້ປະກອບການຍັງໝັ້ນໃຈ
ຖະແຫລງການຂອງສະຫະພາບເອີຣົບ (EU) ທີ່ຂູ່ຈະໃຊ້ມາດຕະການທາງການຄ້າກົດດັນກຳປູເຈຍ ສົ່ງຜົນໃຫ້ເກີດຄວາມກັງວົນໃຈອຸດສາຫະກຳຕັດຫຍິບຂອງກຳປູເຈຍ ເຊິ່ງເປັນລາຍໄດ້ຫລັກທາງເສດຖະກິດທີ່ມີແຮງງານປະມານ 700.000 ຄົນ, ແຕ່ກຸ່ມຜູ້ປະກອບການລາຍໃຫຍ່ຍັງເບິ່ງໄປໃນແງ່ດີວ່າຍັງມີເວລາອີກຫລາຍເດືອນ.
ກ່ອນໜ້ານີ້ EU ເຊິ່ງເປັນຕະຫລາດສົ່ງອອກລາຍໃຫຍ່ທີ່ສຸດຂອງກຳປູເຈຍ ແລະ ເປັນຕະຫລາດການຄ້າໃຫຍ່ທີ່ສຸດໃນໂລກ ຖະແຫລງເຕືອນວ່າ: ກຳປູເຈຍອາດເສຍສິດທິພິເສດທາງການຄ້າກັບ EU ເພື່ອລົງໂທດທີ່ບໍ່ເປັນປະຊາທິປະໄຕ. ກຸ່ມປະເທດຕາເວັນຕົກບາງສ່ວນວິຈານຕຳໜິການເລືອກຕັ້ງກຳປູເຈຍ ໃນເດືອນກໍລະກົດ ທີ່ນາຍົກລັດຖະມົນຕີ ຮຸນເຊນ ຊະນະການເລືອກຕັ້ງວ່າບໍ່ຍຸຕິທຳ ທັງຂົ່ມຂູ່ຝ່າຍກົງກັນຂ້າມ ແລະ ສານສັ່ງຍຸບພັກຝ່າຍຄ້ານ. ມາດຕະການຕອບໂຕ້ທາງການຄ້າຂອງ EU ຈະສົ່ງຜົນເສຍຫາຍຕໍ່ທຸລະກິດຕັດຫຍິບຂອງກຳປູເຈຍ ເຊິ່ງຄິດເປັນ 40% ຂອງລວມຍອດຜະລິດຕະພັນພາຍໃນ (GDP) ແລະ ອຸດສາຫະກຳອື່ນໆເຊັ່ນ: ນ້ຳຕານ. ໂຮງງານໃນກຳປູເຈຍເປັນຜູ້ຜະລິດເສື້ອຜ້າເຄື່ອງແຕ່ງກາຍໃຫ້ຍີ່ຫໍ້ດັງລະດັບໂລກເຊັ່ນ: ແກບ, ເອຊແອນເອັມ, ໄນກີ້, ພູມາ ແລະ ອາດິດາສ. ເຖິງວ່ານາຍົກລັດຖະມົນຕີກຳປູເຈຍຈະປະກາດປົກປ້ອງອະທິປະໄຕຂອງປະເທດ ແລະ ບໍ່ຍອມຕາມແຮງກົດດັນຈາກ EU, ແຕ່ຜູ້ນຳສະຫະພາບແຮງງານບາງສ່ວນຍັງກັງວົນເລື່ອງລາຍໄດ້ ແລະ ອາດເຮັດໃຫ້ກຳມະກອນຕ້ອງກູ້ເງິນມາໃຊ້ຈ່າຍ, ແຕ່ສະມາຄົມຜູ້ປະກອບການຕັດຫຍິບກຳປູເຈຍ ເຊິ່ງມີໂຮງງານເປັນສະມາຊິກ 600 ແຫ່ງຍັງໝັ້ນໃຈວ່າຍັງມີເວລາຕາມແຜນການທົບທວນຂອງ EU ໄລຍະເວລາ 6 ເດືອນ ແລະ ຍັງບໍ່ຄວນກັງວົນໄປກ່ອນ.
