ສອງເກົາຫລີຕົກລົງຟື້ນຟູລະບົບ ໂຄງລ່າງພື້ນຖານຂ້າມຊາຍແດນ
ສ.ເກົາຫລີ ແລະ ສປປ ເກົາຫລີ ບັນລຸຂໍ້ຕົກລົງຮ່ວມກັນ ໃນການຟື້ນຟູເສັ້ນທາງລົດໄຟ ແລະ ຖະໜົນຫລວງເຊື່ອມລະຫວ່າງສອງປະເທດ ທີ່ຖືກຕັດຂາດແຕ່ສະໄໝສົງຄາມ.
ສຳນັກຂ່າວຕ່າງປະເທດລາຍງານວ່າ: ກະຊວງລວມຊາດຂອງ ສ.ເກົາຫລີ ເປີດເຜີຍຜົນການພົບປະຫາລືລະຫວ່າງເຈົ້າໜ້າທີ່ລະດັບສູງຂອງລັດຖະບານເຊອຸນກັບລັດຖະບານພຽງຢາງ ນຳໂດຍທ່ານ ໂຊ ມາຢອງຢອນ ລັດຖະມົນຕີກະຊວງລວມຊາດຂອງ ສ.ເກົາຫລີ ແລະ ທ່ານ ຣີ ຊອນວອນ ຜູ້ອຳນວຍການສຳນັກງານກິດຈະການລະຫວ່າງສອງເກົາຫລີຂອງລັດຖະບານພຽງຢາງ ໂດຍກອງປະຊຸມມີຂຶ້ນທີ່ອາຄານສັນຕິພາບຂອງບ້ານປານມູນຈອມເບື້ອງ ສ.ເກົາຫລີ ໃນວັນທີ 15 ຕຸລາວ່າ: ທັງສອງປະເທດເຫັນພ້ອມຮ່ວມກັນເບື້ອງຕົ້ນ ໃນການຟື້ນຟູລະບົບໂຄງສ້າງພື້ນຖານລະຫວ່າງປະເທດ ທັງເສັ້ນທາງລົດໄຟ ແລະ ຖະໜົນຫລວງ.
(5th LD) Koreas to break ground for railway, road connection late Nov. or early Dec. https://t.co/PxSq2ZO7fi
— Yonhap News Agency (@YonhapNews) October 15, 2018
ທັງນີ້, ໂຄງການຟື້ນຟູເສັ້ນທາງຄົມມະນາຄົມທີ່ຕັດຂາດແຕ່ສະໄໝສົງຄາມເກົາຫລີ ລະຫວ່າງປີ 1950 ຫາ 1953 ອາດຈະເລີ່ມຂຶ້ນຢ່າງເປັນທາງການໃນທ້າຍເດືອນພະຈິກ ຫລື ຕົ້ນເດືອນທັນວານີ້. ຂະນະທີ່ກ່ອນໜ້ານັ້ນ ລັດຖະບານຂອງທັງສອງປະເທດຈະຮ່ວມກັນວາງແຜນ ແລະ ລົງພື້ນທີ່ພາກສະໜາມ ເພື່ອສຶກສາສະພາບແວດລ້ອມ.
