ຍ້ອນຫຍັງເດັກນ້ອຍຈຶ່ງມັກຮ້ອງໄຫ້ໃນວັນສິນ ?

ຕອນກາງເວັນລູກບໍ່ມັກ ນອນຕອນກາງຄືນລູກກໍຮ້ອງໄຫ້ ນອນຍາກຫລາຍ ເຮັດໃຫ້ພໍ່ແມ່ເມື່ອຍທີ່ຕ້ອງປ່ຽນກັນອູ້ມລູກໝົດຄືນ ເປັນຫຍັງລູກຈຶ່ງມັກຮ້ອງໄຫ້ທຸກໆວັນສິນ ບໍ່ວ່າຈະແມ່ນສິນນ້ອຍ ຫລື ສິນໃຫຍ່ ເປັນຍ້ອນລູກເຫັນຜີ, ເຫັນພໍ່ເກົ່າແມ່ຫລັງ ຫລື ເຫັນເຈົ້າກຳນາຍເວນນຳມາ  ຫລື ຍ້ອນສາເຫດຫຍັງຈຶ່ງເຮັດໃຫ້ລູກຮ້ອງໄຫ້ຕະຫລອດແບບນີ້ ?

ຄວາມເຊື່ອບູຮານ ເດັກນ້ອຍເກີດໃໝ່ມັກຈະຮ້ອງໄຫ້ ບໍ່ຍອມນອນໃນວັນສິນ ເຊິ່ງກໍເຮັດໃຫ້ພໍ່ແມ່ກັງວົນ ແລະ ເກີດຄວາມຢ້ານ ໄປຕ່າງໆນາໆ ຕ້ອງພາກັນນັ່ງສະມາທິ ສວດມົນ ເຮັດບຸນ ຈຶ່ງເຮັດໃຫ້ຈິດໃຈສະຫງົບລົງ, ຫລຸດອາການວິຕົກກັງວົນລົງໄດ້ແດ່, ມີ ຄວາມເຊື່ອຂອງຄົນສະໄໝບູຮານເວົ້າເຖິງພໍ່ເກົ່າແມ່ຫລັງ, ຜີ ຫລື ເທວະດາທີ່ມີໜ້າທີ່ຄອຍດູແລເດັກເດັກນ້ອຍ ທີ່ເຊື່ອກັນວ່າ ເດັກນ້ອຍທີ່ຫາກໍເກີດມາຈະມີແມ່ເກົ່າແມ່ຫລັງຄອຍດູແລຢູ່ ຈະເຫັນໄດ້ວ່າຫາກເກີດເຫດການສຸກເສີນ ຫລື ອຸປະຕິເຫດຫຍັງຂຶ້ນມາ ເດັກນ້ອຍເກີດໃໝ່ມັກຈະປອດໄພ, ແຕ່ກໍມີແມ່ເກົ່າແມ່ຫລັງບາງຄົນທີ່ອາດຈະເຮັດໜ້າທີ່ຫລາຍກ່ວານັ້ນ ເຊັ່ນ : ໃນມື້ວັນສິນໃຫຍ່ ຫລື ວັນສິນນ້ອຍ ລູກຈະຮ້ອງໄຫ້ຂັດລັງ ຫລື ລຸກຂຶ້ນມາຫົວຄົນດຽວກາງເດິກ ຄົນບູຮານມັກບອກວ່າເປັນຍ້ອນແມ່ເກົ່າແມ່ຫລັງມາຫລິ້ນນຳ ຫລື ມາຢອກ. ແຕ່ແມ່ເກົ່າແມ່ຫລັງນັ້ນອາດມີທັງໃຫ້ຄຸນ ແລະ ໂທດ ຈຶ່ງມີຄວາມເຊື່ອທີ່ແຕກຕ່າງກັນອອກໄປໃນການປ້ອງກັນເພື່ອບໍ່ໃຫ້ແມ່ເກົ່າແມ່ຫລັງມາລົບກວນລູກ ເຊັ່ນ : ໃຫ້ຊື້ພວງມະໄລມາໄຫວ້, ນັ່ງສະມາທິສວດມົນແຜ່ເມດຕາ, ພາລູກໄປມັດແຂນນຳຄູບາ ຫລື ພະສົງຢູ່ວັດ, ໃນມື້ວັນສິນຫ້າມແຕ່ງໂຕງາມໆໃຫ້ລູກ ໃຫ້ແຕ່ງໂຕຂີ້ຮ້າຍ ຫລື  ເອົາຝ້າຍສາຍສິນມາມັດໄວ້ຢູ່ ເປນອນຂອງລູກ ຫລື ເອົາສາຍຄໍກີ້ຮູບພະມາຫ້ອຍຄໍໃຫ້ລູກເພື່ອຈະຊ່ວຍປ້ອງກັນລູກຈາກພໍ່ເກົ່າແມ່ຫລັງເພື່ອບໍ່ໃຫ້ລູກຮ້ອງໄຫ້ຂັດລັງ ໃນວັນສິນ ເປັນຕົ້ນ.

ແນວໃດກໍຕາມ, ເລື່ອງດັ່ງກ່າວເປັນພຽງຄວາມເຊື່ອທີ່ມີສືບຕໍ່ກັນມາ ສ່ວນຈະເຊື່ອ ຫລື ບໍ່ນັ້ນກໍຂຶ້ນຢູ່ກັບແຕ່ລະຄົນ.

ສຳລັບປະຈຸບັນ ສາເຫດທີ່ເຮັດໃຫ້ລູກນ້ອຍຮ້ອງໄຫ້ນັ້ນແມ່ນມີຫລາກຫລາຍສາເຫດດ້ວຍກັນ ເຊັ່ນ : ຍ້ອນຫິວນົມ, ຮູ້ສຶກໜາວ ຫລື ຮ້ອນເກີນໄປ, ເຈັບທ້ອງ, ຍື່ງທ້ອງແໜ້ນທ້ອງ, ມີອາການບໍ່ສະບາຍໂຕຍ້ອນປຽກຍ່ຽວ ຢາກໃຫ້ປ່ຽນຜ້າອ້ອມ, ເຈັບປວດ, ຮູ້ສຶກເບື່ອ, ຕື່ນເຕັ້ນເກີນໄປ ຫລື ຢາກໃຫ້ກອດໃຫ້ອູ້ມ ແລະ ບາງເທື່ອກໍເຮັດທຳທ່າຮ້ອງໄຫ້ເພື່ອໃຫ້ໄດ້ໃນສິ່ງທີ່ພວກເຂົາຢາກໄດ້.

ສິ່ງສຳຄັນໃນການລ້ຽງລູກກໍຄື ພໍ່ແມ່ຄວນປັບເວລາໃຫ້ເຂົ້າກັບລູກ ເຊັ່ນ : ການກິນການນອນທີ່ຄວນຮູ້ວ່າເດັກນ້ອຍໃນແຕ່ລະ ຊ່ວງອາຍຸຕ້ອງການເວລານອນໃນແຕ່ລະມື້ຈັກຊົ່ວໂມງ, ໃຫ້ນອນ ແລະ ຕື່ນຕາມຕາຕະລາງເວລາທີ່ພໍ່ແມ່ກຳນົດ. ໃນຕອນກາງເວັນຄວນຫລຸດເວລານອນໃຫ້ໜ້ອຍລົງ, ພະຍາຍາມໃຫ້ລູກຫລິ້ນໃນຕອນກາງເວັນໃຫ້ເມື່ອຍ ແລະ ບໍ່ໃຫ້ນອນຫລັບຍາວໄປຈົນຮອດຕອນແລງ ເພື່ອໃຫ້ລູກບໍ່ຕ້ອງຕື່ນຂຶ້ນມາຮ້ອງໄຫ້ຂັດລັງ ຫລື ບໍ່ຍອມນອນໃນຕອນກາງຄືນນັ້ນເອງ.