ອາຊຽນເຫັນດີຊຸກຍູ້ການສ້າງຄວາມເຂັ້ມແຂງດ້ານກົດໝາຍ

ບັນດາປະເທດສະມາຊິກອາຊຽນໄດ້ເຫັນດີຊຸກຍູ້ການສ້າງຄວາມເຂັ້ມແຂງດ້ານກົດໝາຍ ແລະ ກ້າວໄປສູ່ການປະຕິບັດໃຫ້ເປັນເອກະພາບໃນຕໍ່ໜ້າ.

ການເຫັນດີໃນບັນຫາດັ່ງກ່າວ, ມີຂຶ້ນໃນກອງປະຊຸມລັດຖະມົນຕີກົດໝາຍອາຊຽນຄັ້ງທີ 10 ທີ່ຈັດຂຶ້ນຢູ່ນະຄອນຫລວງວຽງຈັນເມື່ອທ້າຍອາທິດຜ່ານມາ, ໂດຍການເປັນປະທານຂອງທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ  , ທັງເປັນລັດຖະມົນຕີກົດໝາຍອາຊຽນຂອງລາວ ແລະ ໃຫ້ກຽດເຂົ້າຮ່ວມຂອງ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີແຫ່ງ ສປປ ລາວ, ມີບັນດາລັດຖະມົນຕີອາຊຽນ, ຫົວໜ້າອົງການໄອຍະການສູງສຸດ, ຮອງເລຂາທິການອາຊຽນເຂົ້າຮ່ວມ ແລະ ໄດ້ຮັບຮອງຖະແຫລງການຮ່ວມຄື: ຮ່າງສົນທິສັນຍາຕົວແບບວ່າດ້ວຍການສົ່ງຜູ້ຮ້າຍຂ້າມແດນອາຊຽນ, ເປີດເສລີການບໍລິການທາງດ້ານກົດໝາຍ, ຄວາມເປັນເອກະພາບໃຫ້ແກ່ກົດໝາຍການຄ້າຂອງອາຊຽນ ແລະ ວຽກງານອື່ນໆ ທີ່ເປັນການສ້າງຄວາມເຂັ້ມແຂງດ້ານກົດໝາຍໃຫ້ອາຊຽນ.

ທ່ານຮອງນາຍົກລັດຖະມົນ ມີຄໍາເຫັນວ່າ: ສ ປປ ລາວ ໄດ້ເປັນປະທານກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນຄັ້ງທີ 18 ແລະ ກອງປະຊຸມລັດຖະມົນຕີກົດໝາຍອາຊຽນຄັ້ງທີ 10 ຈຶ່ງຂໍຮຽກຮ້ອງພາກສ່ວນກ່ຽວຂ້ອງຂອງບັນດາປະເທດອາຊຽນ, ໂດຍສະເພາະກອງເລຂາອາຊຽນ ຈົ່ງສືບຕໍ່ໃຫ້ການຮ່ວມມືຊ່ວຍເຫລືອ ສປປ ລາວ ເພື່ອໃຫ້ບັນລຸພັນທະດ້ານຕ່າງໆໃນຂອບການຮ່ວມມືອາຊຽນ.