ທີມຊາດລາວຊຸດໃຫຍ່ ລົງສະໜາມພົບກັບ ມົງໂກລີ ມື້ນີ້

ໃນວັນທີ 15 ຕຸລາຜ່ານມານີ້ ທີ່ສະຫະພັນບານເຕະແຫ່ງຊາດລາວ (ສຕລ) ໄດ້ມີພິທີຖະແຫລງຂ່າວກຽມພ້ອມຂອງທີມຊາດລາວ ແລະ ທີມຊາດມົງໂກລີ ທີ່ຈະລົງແຂ່ງຂັນບານ​ເຕະມິດຕະພາບຂຶ້ນ ໃນວັນທີ 16 ຕຸລາ ເວລາ 18:30 ໂມງ ເຊິ່ງນໍາໂດຍທ່ານ ວາຣາດາຣາຈູ ຊັນດຣາມູຣທີ (Varadaraju Sundramoorthy) ຄູຝຶກທີມຊາດລາວຄົນໃໝ່, ທ່ານ HANS MICHAEL WEISS ຄູຝຶກທີມຊາດມົງໂກລີ ພ້ອມດ້ວຍນັກກິລາທັງສອງຝ່າຍເຂົ້າຮ່ວມ.

ການແຂ່ງຂັນຄັ້ງນີ້ ເປັນການກຽມຄວາມພ້ອມໃຫ້ແກ່ ທີມຊາດລາວ ທີ່ຈະເຂົ້າຮ່ວມການແຂ່ງຂັນ ຊູຊຸກິ ຄັບ 2018 ທີ່ຈະຈັດຂຶ້ນໃນເດືອນພະຈິກນີ້. ສໍາລັບການແຂ່ງຂັນ AFF Suzuki Cup 2018 ທີມຊາດລາວ ຢູ່ຮ່ວມກຸ່ມ ເອ ປະກອບມີ: ຫວຽດນາມ, ມາເລເຊຍ, ມຽນມາ, ກຳປູເຈຍ ແລະ ລາວ.

ສ່ວນຕາຕະລາງການແຂ່ງຂັນຂອງ ທີມຊາດລາວ ປະກອບມີ: ວັນທີ 8 ພະຈິກ 2018 ພົບ ທີມຊາດຫວຽດນາມ ແຂ່ງຂັນຢູ່ສະໜາມກິລາຫລັກ 16, ວັນທີ 12 ພະຈິກ 2018 ພົບກັບ ທີມຊາດມາເລເຊຍ ແຂ່ງຂັນຢູ່ສະໜາມ Bukit Jalil National, Kuala Lumpur,  ວັນທີ 16 ພະຈິກ 2018 ພົບກັບ ທີມຊາດມຽນມາ ແຂ່ງຂັນຢູ່ສະໜາມກິລາຫລັກ 16, ວັນທີ 20 ພະຈິກ 2018 ພົບກັບ ທີມຊາດກໍາປູເຈຍ ແຂ່ງຂັນຢູ່ສະໜາມ National Olympic, Phnom Penh.