ອາຣັບບີ ຊາອຸດິດ ຂູ່ເອົາຄືນຖ້າຖືກ ຂວ້ຳບາດເພາະເລື່ອງນັກຂ່າວຫາຍ
ອາຣັບບີ ຊາອຸດິດ ປະກາດຈະຕອບໂຕ້ ຖ້າຖືກຂວ້ຳບາດ, ພາຍຫລັງຜູ້ນຳອາເມລິກາກ່າວວ່າ: ອາຣັບບີ ຊາອຸດິດ ສົມຄວນຖືກລົງໂທດ ຖ້າຢູ່ເບື້ອງຫລັງເລື່ອງທີ່ນັກຂ່າວອາຣັບບີ ຊາອຸດິດຫາຍໄປ ແລະ ອາດຖືກຄາດຕະກຳໃນສະຖານກົງສຸນອາຣັບບີ ຊາອຸດິດ ໃນຕວກກີ.
Official Source: The Kingdom affirms that if it receives any action, it will respond with greater action, and that the Kingdom's economy has an influential and vital role in the global economy and that the Kingdom's economy is affected only by the impact of the global economy.
— SPAENG (@Spa_Eng) October 14, 2018
ສຳນັກຂ່າວ SPA ຂອງທາງການອາຣັບບີ ຊາອຸດິດ ເຜີຍແຜ່ຄຳຖະແຫລງຂອງທາງການໃນວັນທີ 14 ຕຸລາວ່າ: ຖ້າອາຣັບບີ ຊາອຸດິດ ໄດ້ຮັບປະຕິກິລິຍາໃດໆ ກໍຈະຕອບໂຕ້ໃຫ້ໜັກກວ່າ, ຂໍເຕືອນວ່າເສດຖະກິດອາຣັບບີ ຊາອຸດິດ ມີບົດບາດສຳຄັນ ແລະ ມີອິດທິພົນຕໍ່ເສດຖະກິດໂລກ ແລະ ຂໍເນັ້ນວ່າ: ອາຣັບບີ ຊາອຸດິດ ຈະບໍ່ຍອມຮັບການຂົ່ມຂູ່ ຫລື ການຫາທາງທຳລາຍທຸກຢ່າງ ບໍ່ວ່າຈະເປັນການຂູ່ຂວ້ຳບາດເສດຖະກິດ, ກົດດັນທາງການເມືອງ ຫລື ເນັ້ນຂໍ້ກ່າວຫາປອມ. ຄຳຖະແຫລງທາງການບໍ່ໄດ້ລະບຸລາຍລະອຽດການຕອບໂຕ້, ແຕ່ສະຖານີໂທລະພາບອັລອາຣາບີຢາຂອງທາງການອອກອາກາດຄໍລຳຄວາມເຫັນຜູ້ຈັດການສະຖານີໃນເວລາຕໍ່ມາວ່າ: ຖ້າປະທານາທິບໍດີ ໂດນັລ ທຣຳ ຂອງອາເມລິກາ ບໍ່ພໍໃຈທີ່ລາຄານ້ຳມັນໃນປັດຈຸບັນໃກ້ເຖິງບາເຣລລະ 80 ໂດລາສະຫະລັດ ອາດເປັນໄປໄດ້ທີ່ລາຄາຈະເພີ່ມຂຶ້ນໄປຮອດ 100 ຫລື 200 ໂດລາສະຫະລັດ ກໍໄດ້. ຂະນະທີ່ການສັ່ງຊື້ອາວຸດ ຫລື ສິນຄ້າອື່ນໆຈາກອາເມລິກາອາດຖືກກະທົບເຊັ່ນກັນ.
ປະທານາທິບໍດີ ທຣຳ ໃຫ້ສຳພາດລາຍການຊິກຕີ້ມີນິສ ອອກອາກາດໃນວັນທີ 14 ຕຸລາວ່າ: ອາຣັບບີ ຊາອຸດິດ ຈະຕ້ອງພົບກັບຜົນຮ້າຍແຮງ ຖ້າກ່ຽວຂ້ອງກັບເລື່ອງທີ່ທ່ານ ຈາມາລ ຄາຊຸກກີ ນັກຂ່າວອາຣັບບີ ຊາອຸດິດ ຫາຍໄປຫລັງເຂົ້າໄປໃນສະຖານກົງສຸນອາຣັບບີ ຊາອຸດິດ ໃນນະຄອນອິສຕັນບູລ ຂອງຕວກກີ, ອາເມລິກາຈະຄົ້ນຫາຄວາມຈິງໃນເລື່ອງນີ້ ແລະ ຈະລົງໂທດຜູ້ກະທຳຜິດຢ່າງຮຸນແຮງ, ແຕ່ຖ້າອາເມລິກາຍົກເລີກການຈຳໜ່າຍອາວຸດໃຫ້ອາຣັບບີ ຊາອຸດິດ ຈະເທົ່າກັບລົງໂທດຕົນເອງຄືກັນ ເພາະເປັນຈຳນວນມະຫາສານສຳລັບທຸລະກິດອາເມລິກາ.
“I don’t want to hurt jobs." President Trump says there will be consequences if Saudi Arabia is found to be behind journalist Jamal Khashoggi’s disappearance, but he won’t commit to sanctions or cutting sales of military equipment. 60 Minutes, Sunday. https://t.co/lO8gSASPJZ pic.twitter.com/VhAEOoDBN6
— 60 Minutes (@60Minutes) October 13, 2018
ຂະນະດຽວກັນ, ຕະຫລາດຫລັກຊັບອາຣັບບີ ຊາອຸດິດ ຖືກເທຂາຍໜັກໃນວັນທີ 13 ຕຸລາ ໂດຍຫລຸດລົງເຖິງ 7% ຫລື ຫລາຍກວ່າ 500 ຈຸດ ກ່ອນກັບມາປິດຕະຫລາດໂດຍຫລຸດລົງ 264 ຈຸດ ຫລື ຫລຸດລົງ 4%. ນັກວິເຄາະການເງິນໃນດູໄບເບິ່ງວ່າ: ອາຣັບບີ ຊາອຸດິດ ຫາກໍເປີດໃຫ້ມີການລົງທຶນໂດຍກົງຈາກຕ່າງປະເທດ, ການທີ່ຕະຫລາດຫຸ້ນຫລຸດລົງແຮງໃນວັນດຽວ ຈຶ່ງເປັນເລື່ອງໃຫຍ່, ນັກລົງທຶນຍັງບໍ່ໝັ້ນໃຈໃນຕະຫລາດນີ້ ຈຶ່ງອາດຖອນທຶນກັບໂດຍງ່າຍ.
