ຄົ້ນພົບວັດຖຸບູຮານຫຼາຍລາຍການອີກຄັ້ງໃໝ່ທີ່ບໍລິເວນເດີ່ນພຣະທາດອີງຮັງ
ໃນວັນທີ 11 ຕຸລານີ້, ທ່ານ ຄຳສິດ ພົມມະຈັນ ຮອງຫົວໜ້າພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວແຂວງສະຫວັນນະເຂດ ໃຫ້ຮູ້ອີກວ່າ: ໃນຂະນະປະຕິສັງຂອນພະທາດອີງຮັງ ທີ່ໄດ້ມີການຂຸດເອົາຊີມັງເກົ່າອອກໄດ້ພົບເຫັນວັດຖຸບູຮານກົ່າແກ່ແຕ່ສະໄໝບູຮານຄັ້ງໃໝ່ຫລາຍອັນເຊັ່ນ: ເງິນຫຼາ 6 ອັນ, ກະດິງ 2 ອັນ, ໂຖທອງສໍາລິດ 1 ອັນ, ໂຖນ້ອຍທອງສໍາລິດ 2 ໜ່ວຍ, ໄຫດິນເຜົາ 8 ໜ່ວຍ, ພະຄ້າຍຄືຄໍາ 5 ອົງ, ພະເຮັດດ້ວຍໄມ້ 6 ອົງ, ພະພຸດທະຮູບທີ່ເຮັດດ້ວຍທອງສໍາລິດ ແລະ ສິ້ນສ່ວນທີ່ສົມບູນ ແລະ ບໍ່ສົມບູນ 28 ລາຍການ, ພະທອງສໍາລິດ 32 ອົງ, ເສດຕະສັດ 3 ສິ້ນ, ຝັງລາດທອງສໍາລິດ 1 ໜ່ວຍ, ແຊ່ງທອງສໍາລິດ 2 ໜ່ວຍ, ຄ້ອງທອງສຳລິດ 1 ໜ່ວຍ, ແຊັງນ້ອຍເຮັດດ້ວຍທອງສໍາລິດ 4 ໜ່ວຍ, ສິ້ນສ່ວນໄຫແຕກ 4 ໜ່ວຍ, ເສດສິ້ນສ່ວນຄ້ອງນ້ອຍ ແລະ ຝັງລາດ 4 ສິ້ນ ແລະ ອື່ນໆທີ່ຮັດແໜ້ນດ້ວຍດິນ ເຊິ່ງຄາດວ່າວັດຖຸດັ່ງກ່າວອາດຈະສ້າງຂຶ້ນແຕ່ສະໄໝອານາຈັກລາວສີໂຄດຕະບູນ ໂດຍຈະໄດ້ຮັກສາອະນາໄມ ແລະ ເກັບຮັກສາໄວ້ ເພື່ອໃຫ້ມວນຊົນໄດ້ເບິ່ງໄດ້ຊົມໃນມື້ບຸນນະມັດສະການພະທາດອີງຮັງ ເຊິ່ງຈະໄດ້ຈັດຂຶ້ນໃນວັນທີ 17-22 ທັນວາ 2018 ທີ່ຈະມາເຖິງນີ້.
