ດີໃຈແພດໝໍລາວຈະກ້າວສູ່ລະດັບໃໝ່ !
ໂດຍ : ມຶກບໍ່ແຫ້ງ
ການຄອງຄອຍຂອງປະຊາຊົນລາວຕໍ່ກັບການປະຕິຮູບໃນຂະແໜງສາທາລະນະສຸກກຳລັງຈະເປັນຮູບປະທຳຍິ່ງຂຶ້ນເມື່ອລັດຖະບານຫາກໍປະກາດວ່າຈະເລັ່ງປັບປຸງຂອດການບໍລິການແພດໝໍລາວ!
ຕາມສະຖິຕິການຕາຍຂອງເດັກແດງ 57 ຄົນຕໍ່ 1,000 ຂອງການເກີດມີຊີວິດ, ອັດຕາການຕາຍຂອງແມ່ 206 ຕໍ່ 100,000 ຂອງການເກີດມີຊີວິດບວກກັບການອາຍຸຍືນສະເລ່ຍ 64 ປີ (ຂໍ້ມູນຈາກການສຳຫຼວດພົນລະເມືອງແລະທີ່ຢູ່ອາໄສທົ່ວປະເທດປີ 2015) ນັ້ນສະແດງວ່າຄົນລາວຍັງຕ້ອງການການເຂົ້າການປິ່ນປົວ, ການບໍລິການຂອງແພດໝໍທີ່ດີຂຶ້ນກວ່າເກົ່າຫຼາຍເທົ່າ.
ໃນສະພາບປັດຈຸບັນ, ການຈົ່ມວ່າຂອງປະຊາຊົນໃນຂອດການບໍລິການຂອງແພດໝໍໃນສປປລາວນັ້ນຖືໄດ້ວ່າໜາຫູສົມຄວນ, ມີເຫດການທີ່ໝູ່ຜູ້ຂຽນເລົ່າສູ່ຟັງເມື່ອເດືອນຜ່ານມາວ່າເອົາເມຍໄປໂຮງໝໍແຫ່ງໜຶ່ງໃນນະຄອນຫຼວງວຽງຈັນຍ້ອນມີອາການເຈັບກະທັນຫັນແຕ່ພໍດີເປັນຕອນທ່ຽງທີ່ພວກເຮົາເຈົ້າຂ້ອຍກຳລັງພາກັນກິນເຂົ້າທ່ຽງເພາະສະນັ້ນຈຶ່ງໄດ້ຮັບການຕ້ອນຮັບຈາກແພດໝໍດ້ວຍການກ່າວວ່າ“ຖ້າແພດໝໍເພິ່ນໄປກິນເຂົ້າມາກ່ອນເພິ່ນກຳລັງຢູ່ໃນເວລາພັກທ່ຽງ”ວ່າຊ້ານ!!
ຖ້າຈະເວົ້າໄປແລ້ວເຮັດແນວນັ້ນມັນກໍບໍ່ເປັນບໍເພາະການເຈັບການເປັນມັນບໍ່ໄດ້ເລືອກມື້ເລືອກຍາມຄືກິນເຂົ້າແຕ່ເລື່ອງເງິນເລື່ອງຄຳຄືທະນາຄານພັດວ່າບໍ່ມີດອກວ່າຊິພັກກິນເຂົ້າທ່ຽງຄືທ່ານໝໍບາງໂຮງໝໍຄືວ່າມາ, ມັນຮອດເວລາໃນການປ່ຽນແປງໄປສູ່ມາດຖານໃໝ່ແລ້ວລະ!
ເພາະສະນັ້ນ, ລັດຖະບານເພິ່ນຈຶ່ງປະກາດເລື່ອງການປະຕິຮູບການບໍລິການຂອງແພດໝໍໃນລາວກ້າວສູ່ລະດັບໃໝ່! ຮອງສາດສະດາຈານດຣ. ບຸນກອງສີຫາວົງກ່າວ“ຜ່ານໜັງສືພິມເສດຖະກິດການຄ້າໃນວັນທີ 4 ຕຸລາຜ່ານມາວ່າປັດຈຸບັນກະຊວງສາທາລະນະສຸກພວມເລັ່ງຈັດຕັ້ງປະຕິບັດຫຼາຍມາດຕະການເພື່ອດຶງດູດບໍ່ໃຫ້ຄົນລາວເດີນທາງໄປປິ່ນປົວຫຼືກວດສຸຂະພາບຢູ່ປະເທດໃກ້ຄຽງເຊິ່ງກ່ອນອື່ນໝົດແມ່ນຈະເລັ່ງໃສ່ ຂອດການບໍລິການໃຫ້ມີຄຸນນະພາບ, ລວມມີສະຖານທີບໍລິການ, ຄຸນນະພາບຂອງບຸກຄະລາກອນ, ອຸປະກອນການແພດແລະລະບົບການເຮັດວຽກ”.
ພ້ອມນັ້ນເພິ່ນກໍໄດ້ນຳເອົານະໂຍບາຍ 5 ດີ 1 ພໍໃຈເຂົ້າມາຈັດຕັ້ງປະຕິບັດຄື: ການຕ້ອນຮັບດີ, ສະອາດດີ, ສະດວກດີ, ບົ່ງມະຕິພະຍາດຊັດເຈນດີ, ປິ່ນປົວດີແລະຄົນເຈັບເພິ່ງພໍໃຈ!
ມັນກໍແນ່ນອນແລ້ວວ່າ ຈະເຮັດໃຫ້ການຈັດຕັ້ງປະຕິບັດບັນດານະໂຍບາຍທີ່ກ່າວນັ້ນສຳເລັດຜົນຢ່າງເຕັມສ່ວນ ມັນກໍຕ້ອງໃຊ້ເວລາ, ອາດບໍ່ສາມາດເຮັດມື້ໜຶ່ງຍາມດຽວແຕ່ກໍເຊື່ອໝັ້ນວ່າພວກເຮົາຈະສາມາດເຮັດໄດ້!
ຜູ້ຂຽນຂໍແລກປ່ຽນສາມຢ່າງທີ່ກ່ຽວຂ້ອງກັບການຈັດຕັ້ງປະຕິບັດນະໂຍບາຍທີ່ວ່າ, 1 ແມ່ນທຶນຮອນທີ່ພວກເຮົາເອົາມາເປັນຂໍ້ອ້າງອັນດັບໜຶ່ງໃນການພັດທະນາ (ບໍ່ວ່າຂະແໜງໃດກໍຕາມ), ສຳລັບຂະແໜງສາທາລະນະສຸກຜູ້ຂຽນວ່າຖ້າເຮົາເຮັດໄດ້ຄືຢູ່ ເມັກຊິກໂກ (Mexico), ຄອສຕາຣິກາ (Costa Rica)ນັ້ນຄືຊິດີເພາະເພິ່ນມີການລະດົມທຶນຮອນທົ່ວສັງຄົມທຸກປີເອີ້ນວ່າເປັນບຸນມະໂຫລານປະຈຳປີອັນໜຶ່ງໃນໝູ່ນັກຮຽນກໍຄືຜູ້ໃຫຍ່ ພາກັນປະກອບສ່ວນເງິນບ່ອນໃສ່ “ກະປຸກສີແດງ”ເພື່ອນຳໃຊ້ໃນການປັບປຸງຂະແໜງສາທາລະນະສຸກ, ຄົນລາວກໍມີເງິນຄືກັນ (ຫຼຸດຜ່ອນການຂໍຄວາມຊ່ວຍເຫຼືອ) ແຕ່ພວກເຮົາສາມາດຮັບປະກັນການຄຸ້ມຄອງແລະໂປ່ງໃສໄດ້ບໍ່ວ່າເມື່ອສັງຄົມປະກອບສ່ວນແລ້ວການໃຊ້ຈ່າຍທຸກກີບທຸກອັດສາມາດເປີດເຜີຍໃຫ້ປະຊາຊົນຮູ້, ຖ້າເຮັດໄດ້ໃຜກໍຢາກປະກອບສ່ວນ.
ອັນສອງມາເລື່ອງຄົນ, ເປັນຫຍັງການບໍລິການຄືຂີ້ຮ້າຍແທ້? ສົມໝຸດແພດໝໍຍາມໝົດຄືນໄດ້ຄ່າຕອບແທນບໍ່ຮອດ 20 ພັນກີບບວກກັບການເຮັດວຽກລ່ວງເວລາຫຼາຍຊົ່ວໂມງຖ້າແມ່ນພວກເຮົາກໍຄືຊິເຮັດແບບໃຈພະເວດບໍ່ເປັນແລ້ວ, ສະນັ້ນການເບິ່ງແຍງຊີວິດການເປັນຢູ່ຂອງແພດໝໍຈຶ່ງຄວນຖືເປັນບູລິມະສິດໜຶ່ງທີ່ຂາດບໍ່ໄດ້.
ແລະອັນທີ່ສາມກໍຄືອຸປະກອນການແພດແລະອາຄານສະຖານທີ່, ພວກເຮົາສາມາດລະດົມທຶນຫຼືຂໍການຊ່ວຍເຫຼືອຈາກພາຍໃນແລະຕ່າງປະເທດມາຊື້ ຫຼືກໍ່ສ້າງໄດ້ ແຕ່ການບົວລະບັດຮັກສາເຮົາເຮັດໄດ້ບໍ່? ບາງໂຮງໝໍເພິ່ນເຮັດໃຫ້ ຢ່າງງົດງາມພໍເມື່ອເວລາຜ່ານໄປຫ້ອງນໍ້າເປ່ເພແລະເປື້ອນເປິະກໍບໍ່ມີທຶນສ້ອມແປງ, ຫຼຽວເບິ່ງເພດານກໍມີແຕ່ໃຍແມງມູມແນວນີ້ມັນກໍບໍ່ຄືແລຄັນວ່າໂຮງໝໍ.
ຢ່າງໃດກໍຍັງເຊື່ອໝັ້ນໃນໃຈວ່າພວກເຮົາຈະສາມາດປ່ຽນແປງໄດ້ ໂດຍການປະກອບສ່ວນຂອງຫຼາຍພາກສ່ວນຂອງສັງຄົມ, ປ່ຽນແປງນຳກັນເທາະ!!
