ມາເລເຊຍກຽມຍົກເລີກໂທດປະຫານ
ລັດຖະບານມາເລເຊຍວາງແຜນຈະຍົກເລີກການປະຫານຊີວິດນັກໂທດທັງໝົດ ແລະ ກຽມນຳສະເໜີເຂົ້າສູ່ການພິຈາລະນາຂອງລັດຖະສະພາໃນວັນທີ 15 ຕຸລານີ້.
ສື່ມວນຊົນທ້ອງຖິ່ນລາຍງານວ່າ: ລັດຖະມົນຕີກະຊວງຍຸຕິທຳມາເລເຊຍປະກາດໃນວັນທີ 10 ຕຸລາວ່າ: ກອງປະຊຸມຄະນະລັດຖະບານເຫັນພ້ອມໃຫ້ຍົກເລີກໂທດປະຫານຊີວິດ ແລະ ຈະນຳຮ່າງກົດໝາຍກ່ຽວກັບເລື່ອງນີ້ເຂົ້າສູ່ການພິຈາລະນາຂອງກອງປະຊຸມລັດຖະສະພາໃນວັນທີ 15 ຕຸລາ. ສ່ວນກຸ່ມຮັກສາສິດທິມະນຸດ ກ່າວຍ້ອງຍໍການຕັດສິນໃຈດັ່ງກ່າວ ໂດຍອົງການນິລະໂທດສະກຳສາກົນ ກ່າວວ່າ: ເປັນຄວາມກ້າວໜ້າຄັ້ງສຳຄັນ ແລະ ຂໍໃຫ້ລັດຖະບານມາເລເຊຍດຳເນີນການຢ່າງຈິງຈັງໂດຍບໍ່ມີຂໍ້ຍົກເວັ້ນ. ປັດຈຸບັນ ມາເລເຊຍມີນັກໂທດລໍຖ້າການປະຫານຊີວິດຫລາຍກວ່າ 1.200 ຄົນ ໂດຍການລົງໂທດດັ່ງກ່າວຖືກນຳມາໃຊ້ກັບຜູ້ທີ່ມີຄວາມຜິດໃນຂໍ້ຫາຄາດຕະກຳ, ຄ້າຢາເສບຕິດ, ກໍ່ກະບົດ ແລະ ກໍ່ອາຊະຍາກຳອື່ນໆ.
