ຍົກເລີກຄົ້ນຫາເຫຍື່ອ ແຜ່ນດິນໄຫວ-ສຶນາມິສຸລາເວສີແລ້ວ
ອິນໂດເນເຊຍຍົກເລີກການຄົ້ນຫາຜູ້ສູນຫາຍຈາກເຫດແຜ່ນດິນໄຫວ ແລະ ສຶນາມິເກາະສຸລາເວສີ ໃນວັນທີ 28 ກັນຍາແລ້ວໃນວັນທີ 11 ຕຸລານີ້ ເຖິງວ່າຍັງມີຜູ້ສູນຫາຍປະມານ 5.000 ຄົນກໍຕາມ.
ຜູ້ອຳນວຍການຄົ້ນຫາ ແລະ ກູ້ໄພພາກສະໜາມໃນເມືອງປາລູ ເປີດເຜີຍວ່າ: ພາລະກິດຈະຢຸດລົງໃນວັນທີ 11 ຕຸລານີ້, ເຈົ້າໜ້າທີ່ພະຍາຍາມຮື້ຄົ້ນຕາມຊາກເມືອງທີ່ຖືກແຮງສັ່ນສະເທືອນ ແລະ ກຳແພງນ້ຳທຳລາຍ ພົບແລ້ວຫລາຍກວ່າ 2.000 ສົບ ແລະ ເຊື່ອວ່າຍັງຢູ່ໃຕ້ຊາກອີກປະມານ 5.000 ຄົນ, ແຕ່ດິນທີ່ແຂງ ແລະ ສົບທີ່ເໜົ່າເປື່ອຍເພາະອາກາດຮ້ອນເປັນອຸປະສັກຕໍ່ການເດີນໜ້າຄົ້ນຫາ. ກ່ອນໜ້ານີ້ ລັດຖະບານອິນໂດເນເຊຍ ເປີດເຜີຍວ່າ: ຈະປ່ອຍໃຫ້ພື້ນທີ່ໄພພິບັດເປັນຂຸມສົບໝູ່, ບໍ່ເຂົ້າໄປແຕະຕ້ອງ, ຈະມີການຕັ້ງອານຸສອນສະຖານ ແລະ ສວນສາທາລະນະລະນຶກເຖິງຜູ້ສູນຫາຍໃນສາມພື້ນທີ່ທີ່ພັງເສຍຫາຍຫລາຍທີ່ສຸດ ເປັນພື້ນທີ່ເສຍຫາຍໜັກເພາະແຜ່ນດິນໄຫວຮຸນແຮງເຮັດໃຫ້ພື້ນດິນຍຸບກາຍເປັນຊາຍດູດ.
ການຊ່ວຍເຫລືອດ້ານມະນຸດສະທຳຈາກບັນດາປະເທດຫລັ່ງໄຫລເຂົ້າໄປເມືອງປາລູ ເມືອງເອກຂອງແຂວງສຸລາເວສີ ແຕ່ມີສຽງວິຈານວ່າ: ການຟື້ນຟູດຳເນີນໄປຢ່າງຊັກຊ້າ, ທີມກູ້ໄພຕ່າງປະເທດບາງກຸ່ມຖືກກັນອອກຈາກພື້ນທີ່. ສະຫະປະຊາຊາດຕີລາຄາວ່າ: ມີຜູ້ຕ້ອງການການຊ່ວຍເຫລືອຮີບດ່ວນປະມານ 200.000 ຄົນ. ອາຫານ, ນ້ຳດື່ມ ແລະ ອຸປະກອນການແພດຍັງຂາດເຂີນ.
