ນາຍົກລັດຖະມົນຕີ ທອງລຸນ ສີສຸລິດ ນໍາສະເໜີ ນະໂຍບາຍ 3 ເປີດ ຕໍ່ນັກທຸລະກິດຍີ່ປຸ່ນ
ຂປລ. ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ນໍາສະເໜີນະໂຍບາຍ 3 ເປີດຄື: ເປີດປະຕູ, ເປີດສິ່ງກີດຂວາງ ແລະ ເປີດໃຈ ຕໍ່ກອງປະຊຸມເວທີປືກສາການລົງທຶນແມ່ນໍ້າຂອງ-ຍີ່ປຸ່ນ ໃນວັນທີ 9 ຕຸລານີ້ ທີ່ຍີ່ປຸ່ນວ່າ: ເພື່ອຕ້ອນຮັບ ແລະ ຮອງຮັບນັກລົງທຶນ ແລະ ນັກພັດທະນາຂອງຍີ່ປຸ່ນໃນປັດຈຸບັນ ແລະ ຕໍ່ໜ້າ ເພື່ອໃຫ້ບັນດານັກທຸລະກິດໄດ້ພິຈາລະນາເອົາ ສປປ ລາວ ເປັນປະເທດໜຶ່ງໃນການລົງທຶນ ແລະ ຂະຫຍາຍທຸລະກິດໃນອານາຄົດອັນໃກ້ໆນີ້ ແລະ ລາວກໍຈະໃຫ້ຄວາມສໍາຄັນເປັນຢ່າງຍິ່ງຕໍ່ການນໍາໃຊ້ທ່າແຮງ ແລະ ການປະກອບສ່ວນຂອງພາກເອກະຊົນທັງພາຍໃນ ແລະ ຕ່າງປະເທດເຂົ້າໃນການພັດທະນາເສດຖະກິດ-ສັງຄົມຂອງຕົນ ແລະ ພ້ອມຈະສົ່ງເສີມການລົງທຶນທີ່ມີຄຸນນະພາບ ນໍາໃຊ້ພູມປັນຍາ ແລະ ແຮງງານຢ່າງມີປະສິດທິພາບ, ນໍາໃຊ້ຊັບພະຍາກອນທໍາມະຊາດຢ່າງປະຢັດ ແລະ ເປັນມິດກັບສິ່ງແວດລ້ອມ. ພ້ອມນີ້, ລາວກໍຈະສືບຕໍ່ປັບປຸງສະພາບແວດລ້ອມການລົງທຶນ ລວມທັງນະໂຍບາຍ, ນິຕິກໍາ ແລະ ກົນໄກການປະສານງານພາຍໃນ ໃຫ້ມີຂັ້ນຕອນກະທັດຮັດ, ວ່ອງໄວ, ໂປ່ງໃສ ແລະ ຜ່ານປະຕູດຽວ ເພື່ອຫລຸດຜ່ອນອຸປະສັກໃນການສ້າງຕັ້ງ ແລະ ດໍາເນີນທຸລະກິດຢູ່ ສປປ ລາວ.
ທ່ານນາຍົກລັດຖະມົນຕີ ກ່າວຕື່ມວ່າ: ສປປ ລາວ ມີຂໍ້ໄດ້ປຽບທາງດ້ານຊັບພະຍາກອນທໍາມະຊາດທີ່ອຸດົມສົມບູນ, ມີທ່າແຮງທາງດ້ານກະສິກໍາ ໂດຍສະເພາະການຜະລິດກະສິກໍາສະອາດ ແລະ ມີແຫລ່ງທ່ອງທ່ຽວທີ່ຫລາກຫລາຍໃນ 3 ຮູບແບບຄື: ການທ່ອງທ່ຽວວັດທະນະທໍາ, ທໍາມະຊາດ ແລະ ປະຫວັດສາດ ໂດຍຕິດພັນກັບການປົກປັກຮັກສາສິ່ງແວດລ້ອມ ແລະ ພັດທະນາຂະແໜງການອື່ນໆໄປພ້ອມກັນ ເປັນຕົ້ນພື້ນຖານໂຄງລ່າງ, ການບໍລິການ, ອຸດສາຫະກໍາ, ຫັດຖະກໍາ, ສາທາລະນະສຸກ ແລະ ອື່ນໆ. ພ້ອມດຽວກັນ ລາວຍັງມີທ່າແຮງທາງດ້ານການຜະລິດພະລັງງານໄຟຟ້າທີ່ສະອາດ ແລະ ສົ່ງເສີມການຜະລິດພະລັງງານທາງເລືອກອື່ນໆທີ່ເປັນມິດຕໍ່ສິ່ງແວດລ້ອມ ແລະ ໃນຜ່ານມານີ້, ລັດຖະບານລາວ ໄດ້ອະນຸມັດສ້າງຕັ້ງເຂດເສດຖະກິດພິເສດ ແລະ ເຂດເສດຖະກິດສະເພາະ 12 ເຂດໃນທົ່ວປະເທດ ເພື່ອສົ່ງເສີມ ແລະ ດຶງດູດນັກລົງທຶນຈາກພາຍໃນ ແລະ ຕ່າງປະເທດ. ປັດຈຸບັນ ເຂດທີ່ນັກລົງທຶນຍີ່ປຸ່ນກໍາລັງໃຫ້ຄວາມສົນໃຈຫລາຍແມ່ນເຂດເສດຖະກິດພິເສດ ສະຫວັນ-ເຊໂນ, ເຂດເສດຖະກິດພິເສດຈໍາປາສັກ ແລະ ນິຄົມອຸດສາຫະກໍາ ແລະ ການຄ້າວຽງຈັນໂນນທອງ.
ໃນໂອກາດນີ້, ທ່ານນາຍົກລັດຖະມົນຕີ ຍັງໄດ້ເຊີນຊວນໃຫ້ບັນດານັກທຸລະກິດເດີນທາງໄປຢ້ຽມຢາມ ແລະ ທ່ອງທ່ຽວລາວ ເພື່ອຈະໄດ້ສຶກສາຄວາມເປັນໄປໄດ້ໃນການລົງທຶນອີກດ້ວຍ.
