ລົດໄຟຕົກລາງໃນອິນເດຍ ເສຍຊີວິດ-ບາດເຈັບ 40 ຄົນ
October 10, 2018 - 5:19 PM
ຕຳຫລວດອິນເດຍລາຍງານວ່າ: ເກີດອຸປະຕິເຫດລົດໄຟດ່ວນຕົກລາງທາງຕອນເໜືອຂອງປະເທດ ມີຜູ້ໂດຍສານເສຍຊີວິດ 5 ຄົນ ແລະ ບາດເຈັບອີກ 35 ຄົນ.
ໜ່ວຍກູ້ໄພອິນເດຍໃຫ້ການຊ່ວຍເຫລືອ ຫລັງເກີດອຸປະຕິເຫດເມື່ອເວລາປະມານ 05:30 ໂມງ ວັນທີ 10 ຕຸລາຕາມເວລາທ້ອງຖິ່ນ ໂດຍຫົວລົດຈັກ ແລະ ຕູ້ລົດໄຟອີກ 5 ຕູ້ຕົກລາງ ທີ່ສະຖານີລົດໄຟຫ່າງຈາກເມືອງລັກເນົາ ຂອງລັດອຸຕໍປະເທດໄປທາງຕາເວັນຕົກສຽງໃຕ້ 80 ກິໂລແມັດ. ລາຍງານລະບຸວ່າ: ຜູ້ໂດຍສານທີ່ໄດ້ຮັບບາດເຈັບຢ່າງໜ້ອຍ 35 ຄົນ ຖືກນຳສົ່ງໂຮງໝໍແລ້ວ ແລະ ມີການເອົາລົດໂດຍສານມາຂົນສົ່ງຜູ້ໂດຍສານໄປບ່ອນປອດໄພ. ອຸປະຕິເຫດເກີດຂະນະທີ່ຂະບວນລົດກຳລັງມຸ້ງໜ້າເຂົ້າສະຖານີ, ແຕ່ຍັງບໍ່ຮູ້ສາເຫດຂອງອຸປະຕິເຫດ.
