ດາວຍິງສູງສຸດທີມຊາດຫວຽດນາມ ເປີດອາຄາເດມີ້ ມື້ທຳອິດມີເຍົາວະຊົນສົນໃຈເຖິງ 4 ໝື່ນຄົນ
ເລຄົງວິງ (Le Cong Vinh) ອະດີດກອງຫນ້າ ແລະ ຫົວຫນ້າທີມຊາດຫວຽດນາມ ໄດ້ຮ່ວມກັບ ກຸ່ມບໍລິສັດ Nguyen Hoang Group ເປີດສູນພັດທະນາບານເຕະເຍົາວະຊົນຂອງຕົນພາຍໃຕ້ຊື່: academy CV9 ຄວາມໝາຍຂອງ CV9 ໝາຍເຖິງ ຄົງວິງ ຕຳນານກອງຫນ້າ ໝາຍເລກ 9 ທີມຊາດຫວຽດນາມ ທີ່ປະກາດອຳລາທີມຊາດໃນປີ 2016.
ການເປີດອາຄາເດມີ້ຄັ້ງນີ້ ມີນັກກິລາເຍົາວະຊົນ-ໄວໜຸ່ມພາຍໃນປະເທດມາລົງທະບຽນຫລາຍກວ່າ 40.000 ຄົນ ຈາກ 40 ໂຮງຮຽນ ໃນ 15 ແຂວງຂອງຫວຽດນາມ ເປົ້າໝາຍເພື່ອຝຶກຝົນພັດທະນານັກເຕະເຍົາວະຊົນ-ໄວໜຸ່ມຂອງປະເທດເປັນນັກກິລາອາຊີບ ແລະ ຮັບໃຊ້ທີມຊາດໃນອະນາຄົດ ໂດຍມີ Marshall Soper ອະດີດນັກເຕະທີມຊາດອົດສະຕຣາລີ ມາເປັນທີ່ປຶກສາດ້ານເຕັກນິກໃຫ້.
ເລຄົງວິງ (Le Cong Vinh) ອະດີດກອງຫນ້າ ແລະ ຫົວຫນ້າທີມຊາດຫວຽດນາມ ເປັນດາວຍິງສູງສຸດທີມຊາດຫວຽດນາມ 51 ປະຕູ ແລະ ລົງຫລິ້ນໃຫ້ທີມຊາດຫລາຍສຸດ 81 ນັດ, ໄດ້ແຊ້ມອາຊຽນ ຫລື AFF Suzuki Cup 2008 ກັບທີມຊາດຫວຽດນາມ, ຕິດທີມດີເດັ່ນຂອງອາຊຽນ 3 ສະໄຫມ 2008, 2010, 2016, ເປັນນັກເຕະດີເດັ່ນຫວຽດນາມ 3 ສະໄຫມ ແລະ ດາວຮຸ່ງດີເດັ່ນ ປີ 2004.
