5 ວິທີກຳຈັດຮອຍແປ້ວໃຄ່ນູນ

ຮອຍແປ້ວໃຄ່ນູນ ຫລື ຄີລອຍ (Keloid)  ແມ່ນຮອຍແປ້ວທີ່ເກີດຂຶ້ນຫລັງຈາກທີ່ບາດແຜເຊົາ ຫລື ເຊົາດີແລ້ວໄລຍະໜຶ່ງ ໂດຍຂະໜາດອາດຂະຫຍາຍໃຫຍ່ກ່ວາຮອຍບາດແຜເກົ່າທີ່ເກີດຂຶ້ນ, ມີສີແຕກຕ່າງກັນຕາມສະພາບສີຜິວແຕ່ລະບຸກຄົນ ພົບໄດ້ຕັ້ງແຕ່ສີບົວ, ແດງ, ນຳ້ຕານເຂັ້ມ ຈາກການມີເສັ້ນເລືອດຝອຍມາໂຮມກັນຢູ່ຫລາຍ. ສ່ວນຫລາຍມີລັກສະນະແຂງຄ້າຍຄືຢາງ, ເຫລື້ອມເປັນເງົາ ແລະ ບໍ່ມີຂົນປົ່ງຂຶ້ນ ເຊິ່ງເຖິງຈະບໍ່ເຮັດໃຫ້ເກີດອັນຕະອາຍໃດໆ ແຕ່ກໍອາດເຮັດໃຫ້ຮູ້ສຶກເຈັບ, ຄັນ, ລະຄາຍເຄືອງ ທັງຍັງສົ່ງຜົນທາງດ້ານຄວາມງາມນຳອີກ.

ສາເຫດຂອງຮອຍແປ້ວໃຄ່ນູນເກີດຈາກຄວາມຜິດປົກກະຕິຂອງຂະບວນການປິ່ນປົວບາດແຜຕາມທຳມະຊາດຂອງຮ່າງກາຍ ທີ່ໂດຍປົກກະຕິຈະມີການສ້າງເນື້ອເຍື່ອ ແລະ ຄໍລາເຈັນມາຟື້ນຟູບໍລິເວນບາດແຜດັ່ງກ່າວຈົນເຊົາດີ, ແຕ່ຫາກຫລາຍເກີນໄປຈະເກີດການສະສົມຂອງເນື້ອເຍື່ອກ່ຽວຂ້ອງ ໂດຍສະເພາະຄໍລາເຈັນບໍລິເວນປາກບາດ ເຮັດໃຫ້ຮອຍແປ້ວບໍລິເວນດັ່ງກ່າວມີລັກສະນະກວ້າງ ແລະ ນູນຂຶ້ນ. ແນວໃດກໍໍຕາມ ຮອຍແປ້ວໃຄ່ນູນເກີດຂຶ້ນໄດ້ກັບທຸກຄົນ, ແຕ່ມັກພົບໃນຜູ້ໃຫຍ່ຫລາຍກ່ວາເດັກນ້ອຍ ແລະ ພົບໃນແມ່ຍິງຫລາຍກ່ວາຜູ້ຊາຍ ແລະ ຍັງອາດກ່ຽວຂ້ອງກັບກຳມະພັນນຳອີກ. ຜູ້ທີ່ມີບຸກຄົນໃນຄອບຄົວເປັນຮອຍແປ້ວໃຄ່ນູນ ຈຶ່ງມີໂອກາດເກີດຮອຍແປ້ວຊະນິດນີ້ໄດ້ຫລາຍກ່ວາຄົນອື່ນໆ.

ການປິ່ນປົວ ຫລື ການກຳຈັດຮອຍແປ້ວໃຄ່ນູນ ມີຄື :

1. ການໃຊ້ແຜ່ນຕິດຮອຍແປ້ວໃຄ່ນູນໂດຍສະເພາະ.
2. ການທາຢາຮອຍແປ້ວໃຄ່ນູນ ທັງຊະນິດຄຣີມ ແລະ ຊະນິດເຈວ.
3. ການສັກຮອຍແປ້ວໃຄ່ນູນ.
4. ການໃຊ້ຄວາມເຢັນໃນການປິ່ນປົວ.
5. ການຜ່າຕັດຮອຍແປ້ວຈາກບາດແຜໃຄ່ນູນ ເຊິ່ງເຮັດໄດ້ສະເພາະໃນບາງກໍລະນີ ແລະ ຢູ່ພາຍໃຕ້ການດູແລຂອງແພດຜູ້ຊ່ຽວ ຊານເທົ່ານັນ.

ຮອຍແປ້ວໃຄ່ນູນມັກຈະບໍ່ຍຸບ ຫລື ເຊົາໄປເອງ ຈຳເປັນຕ້ອງມີວິທີການປິ່ນປົວ ຫລື ກຳຈັດທີ່ສະເພາະ ເຊິ່ງການປິ່ນປົວສາມາດເຮັດໄດ້ຫລາຍວິທີ ໂດຍແຕ່ລະວິທີໃຊ້ໄລຍະເວລາທີ່ຕ່າງກັນ. ແນວໃດກໍຕາມ, ຫາກຮອຍແປ້ວໃຄ່ນູນ ສົ່ງຜົນກະທົບຕໍ່ການໃຊ້ຊີວິດປະຈຳວັນຂອງທ່ານຫລາຍ ການໄປພົບແພດຜູ້ຊ່ຽວຊານເພື່ອຮັບຄຳແນະນຳວິທີການປິ່ນປົວທີ່ຖືກຕ້ອງ ຈຶ່ງເປັນທາງເລືອກທີ່ດີສຸດ.