ປກສ ແຂວງບໍ່ແກ້ວ ຢຶດຢາບ້າໄດ້ 4,3 ລ້ານເມັດ
ເມື່ອທ້າຍອາທິດຜ່ານມານີ້, ເຈົ້າໜ້າທີ່ ປກສ ແຂວງບໍ່ແກ້ວ ສາມາດຍຶດສິ່ງເສບຕິດປະເພດຢາບ້າໄດ້ 4,3 ລ້ານເມັດ ຢູ່ເຂດບ້ານໃຫຍ່ສີເມືອງງາມ, ເມືອງຕົ້ນເຜີ້ງແຂວງບໍ່ແກ້ວ, ພາຍຫລັງມີກຸ່ມຄົນບໍ່ດີໄດ້ນຳເອົາຢາບ້າດັ່ງກ່າວຈາກຜູ້ຂາຍຢາເສບຕິດປະເທດເພື່ອນບ້ານ ແລະ ຈະນຳມາຈຳໜ່າຍຕໍ່, ສ່ວນຜູ້ຕ້ອງຫາໄດ້ເອົາຕົວຫລົບໜີ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ມີພົນລະເມືອງດີໂທລະສັບເຂົ້າມາແຈ້ງລາຍງານເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມວ່າ: ມີລົດວີໂກສີຂາວໄດ້ແລ່ນເຂົ້າໄປທາງແຄມຂອງເຂດເໜືອບ້ານໃຫຍ່ສີເມືອງງາມ ທ່າທາງມີພິລຸດ ແລະ ບໍ່ຮູ້ວ່າໄປເຄື່ອນໄຫວຫຍັງ ເມື່ອໄດ້ຮັບລາຍງານທາງເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ຈຶ່ງໄດ້ປະສານສົມທົບກັບທະຫານເມືອງຕົ້ນເຜິ້ງ ທີ່ລົງມາເຮັດວຽກຢູ່ຂອບເຂດບ້ານຂອງຕົນລົງໄປກວດກາຈຸດດັ່ງກ່າວ ແລະ ໄດ້ພົບເຫັນກຸ່ມຄົນເພດຊາຍປະມານ 7-8 ຄົນບໍ່ຮູ້ຊື່ ກໍາລັງຂົນເປົາເຄື່ອງອອກຈາກເຮືອ ຂື້ນໃສ່ທ້າຍກະບະລົດວີໂກສີຂາວ ໝາຍເລກທະບຽນ ກຈ 2511 ກໍາແພງນະຄອນ. ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ຊ່ອງໄຟສາຍໃສ່, ພ້ອມທັງເອີ້ນຖາມວ່າ: ຂົນເຄື່ອງຫຍັງ? ເມື່ອເຫັນເຈົ້າໜ້າທີ່ ກຸ່ມຄົນດັ່ງກ່າວກໍພາກັນແລ່ນ ເອົາຕົວລົບໜີເຂົ້າໄປໃນປ່າແຄມຂອງ, ທາງເຈົ້າໜ້າທີ່ຈຶ່ງໄດ້ຍິງປືນນາບຄູ່ປະມານ 7-8 ນັດ ເພື່ອໃຫ້ກຸ່ມຄົນດັ່ງກ່າວຢຸດ, ແຕ່ກໍບໍ່ມີໃຜຍອມຢຸດ. ຈາກນັ້ນ, ທາງເຈົ້າໜ້າທີ່ຈຶ່ງໄດ້ເຂົ້າໄປກວດກາ ແລະ ພົບເຫັນກະເປົາຈໍານວນ 38 ເປົາທີ່ບັນຈຸສິ່ງເສບຕິດປະເພດຢາບ້າໄວ້ ເມື່ອເຫັນແນວນັ້ນທາງເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ຈຶ່ງໄດ້ລາຍງານໃຫ້ທາງ ປກສ ເມືອງຕົ້ນເຜິ້ງຮັບຊາບ ແລະ ແຕ່ງຕັ້ງເຈົ້າໜ້າທີ່ລົງມາສົມທົບກັນກວດກາສະຖານທີ່ເກີດເຫດ ແລະຂອບເຂດບໍລິເວນປ່າອ້ອມຂ້າງ ແລະ ໄດ້ພົບເຫັນເປົາຢາບ້າຊຸກເຊື່ອງໄວ້ໃນປ່າອີກຈໍານວນ 5 ເປົ່າ.
ຜ່ານການກວດກາຂອງເຈົ້າໜ້າທີ່ໃນເບື້ອງຕົ້ນໃຫ້ຮູ້ວ່າ: ຢາບ້າທັງໝົດມີຈໍານວນ 43 ເປົາ, ລວມມີ 2.150 ມັດ ປະກອບມີ 4,3 ລ້ານເມັດ. ດັ່ງນັ້ນ, ຈຶ່ງໄດ້ຢຶດຂອງກາງຢາບ້າຈໍານວນດັ່ງກ່າວ, ພ້ອມດ້ວຍລົດກະບະວີໂກ ແລະ ເຮືອອີກ 1 ລໍາໄວ້ເປັນຫຼັກຖານ, ສ່ວນຜູ້ຖືກຫາແມ່ນໄດ້ເອົາຕົວຫຼົບໜີ.
