ເຂດພັດທະນາເສດຖະກິດໃໝ່ສີທັນດອນຈະຊ່ວຍຊຸກຍູ້ເສດຖະກິດຂອງຊາດເຂັ້ມແຂງ

ທ່ານເຈົ້າແຂວງຈໍາປາສັກ ບຸນຖອງ ດີວີໄຊ ໄດ້ມີຄໍາເຫັນໃນພິທີວາງສີລາເລີກກໍ່ສ້າງເສັ້ນທາງເບຕົງອ້ອມໂຄງການພັດທະນາເສດຖະກິດໃໝ່ສີທັນດອນ, ເມືອງໂຂງແຂວງຈໍາປາສັກ ທີ່ມີທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ໃຫ້ກຽດເຂົ້າຮ່ວມເມື່ອທ້າຍອາທິດຜ່ານມານີ້ວ່າ: ການກໍ່ສ້າງເສັ້ນທາງເບຕົງອ້ອມໂຄງການນີ້ ມີໄລຍະຍາວ 43 ກິໂລແມັດ ແລະ ຈະໃຫ້ສໍາເລັດການກໍ່ສ້າງໃນປີ 2020 ເພື່ອອໍານວຍຄວາມສະດວກໃຫ້ແກ່ການສັນຈອນ, ການຄ້າ, ການບໍລິການ, ການຂົນສົ່ງ ແລະ ການທ່ອງທ່ຽວໃນເຂດດັ່ງກ່າວ.

ທ່ານເຈົ້າແຂວງຈໍາປາສັກ ກ່າວວ່າ: ເຂດພັດທະນາເສດຖະກິດໃໝ່ສີທັນດອນ ເປັນໂຄງການພັດທະນາບູລິມະສິດຂອງແຂວງ ເພື່ອສ້າງແຫລ່ງລາຍຮັບທີ່ຍືນຍົງ ແລະ ກະຕຸກຊຸກຍູ້ເສດຖະກິດຂອງຊາດ, ໂດຍແມ່ນບໍລິສັດ ກວາງດົງ ເຢນໂລ ອິນດັດສຕີ ຈໍາກັດ ແລະ ບໍລິສັດຮ່ວມທຶນພັດທະນາສີທັນດອນ ຈໍາກັດ ເປັນຜູ້ສໍາປະທານໃນໄລຍະເວລາ 50 ປີ, ໃນເນື້ອທີ່ 9.840 ກວ່າເຮັກຕາ ແລະ ລວມມີມູນຄ່າລົງທຶນ 9 ຕື້ກວ່າໂດລາສະຫະລັດ. ໂຄງການນີ້, ຈະສ້າງວຽກເຮັດງານທໍາໃຫ້ປະຊາຊົນພາຍໃນປະເທດປະມານ 32 ພັນກວ່າຄົນ ແລະ ສະເລ່ຍຈະມີລາຍຮັບ 9.430 ກວ່າໂດລາສະຫະລັດ ຫລື ປະມານ 80 ລ້ານກີບຕໍ່ຄົນຕໍ່ປີ. ນອກນີ້, ຄາດຄະເນຈະມີນັກທ່ອງທ່ຽວເຂົ້າມາລາວເຖິງ 15 ລ້ານເທື່ອຄົນຕໍ່ປີ, ຊຶ່ງຈະສ້າງລາຍຮັບໃຫ້ຂະແໜງການທ່ອງທ່ຽວໄດ້ເຖິງ 2,4 ຕື້ໂດລາສະຫະລັດ, ພ້ອມນີ້, ຂະແໜງການປີ່ນອ້ອມຕ່າງໆຈະສ້າງມູນຄ່າຫລາຍກວ່າ 637 ລ້ານໂດລາສະຫະລັດຕໍ່ປີ ແລະ ສາມາດເກັບລາຍຮັບເຂົ້າງົບປະມານລັດໄດ້ 170 ລ້ານໂດລາສະຫະລັດຕໍ່ປີ, ເຊິ່ງຈະຊ່ວຍຊຸກຍູ້ການເຕີບໃຫຍ່ດ້ານເສດຖະກິດຂອງຊາດໃຫ້ເຂັ້ມແຂງໝັ້ນຄົງ.