ໂຄງການວຽງຈັນສະອາດ ຍັງມີຫລາຍບັນຫາທີ່ທ້າທາ
ໂຄງການວຽງຈັນສະອາດ ເປັນວຽກງານໜຶ່ງທີ່ໄດ້ຈັດຕັ້ງປະຕິບັດ ມາແຕ່ປີ 2015, ເພື່ອຄວາມສະອາດ ແລະ ຄວາມເປັນລະບຽບຮຽບຮ້ອຍຈົບງາມຂອງຕົວເມືອງຫລວງ ເຊິ່ງຈະເປັນພື້ນຖານໃຫ້ແກ່ການພັດທະນາໂຕເມືອງທີ່ໜ້າຢູ່ ແລະ ກໍແມ່ນໜຶ່ງໃນຄຳຂັວນ (6 ສ) ຂອງນະຄອນຫລວງວຽງຈັນວາງອອກຄື: ສ ສະອາດ, ສ ສະຫງົບ, ສ ສະຫວ່າງ, ສ ສີຂຽວ, ສ ສະເຫນ່ ແລະ ສ ສີວິໄລ, ສໍາລັບໂຄງການວຽງຈັນສະອາດ ແມ່ນໄດ້ກໍານົດໂຕຊີ້ວັດຄື: ເສັ້ນທາງຕ້ອງສະອາດ ປາສະຈາກຂີ້ຝຸ່ນ ແລະ ຂີ້ເຫຍື້ອ ບໍ່ມີນໍ້າເປື້ອນຕາມເສັ້ນທາງ ແລະ ຂອບທາງ ແລະ ອ້ອມແອ້ມແຄມທາງບໍ່ເປັນຂຸມ, ເປັນຕົ້ນແມ່ນຖະໜົນຫຼວງແຫ່ງຊາດ, ເສັ້ນທາງສາຍໃຫຍ່, ສາຍທາງຄົນຍ່າງ ຕ້ອງບໍ່ມີສິ່ງກີດຂວາງ, ເຊິ່ງບັນດາຂໍ້ກໍານົດທີ່ລະບຸໄວ້ທັງໝົດນີ້ ຕ້ອງປະຕິບັດໃຫ້ໄດ້ 70% ຂຶ້ນໄປ, ສໍາລັບເສັ້ນທາງຮ່ອມ 80%, ສໍາລັບເສັ້ນທາງເທສະບານ ແລະ ເສັ້ນທາງຫຼວງແຫ່ງຊາດ 90% ຂຶ້ນໄປ, ແຕ່ຜ່ານການຈັດຕັ້ງປະຕິບັດມາເຫັນວ່າ: ມີສິ່ງທ້າທາຍຫລາຍຢ່າງ, ເນື່ອງຈາກວ່າ ປະຊາກອນທີ່ອາໄສຢູ່ຕົວເມືອງຫລວງສ່ວນໜຶ່ງກໍບໍ່ມີຄວາມຕື່ນຕົວການຮັກສາອານາໄມ ເກັບມ້ຽນຂີ້ເຫຍື້ອ ແລະ ບໍ່ເຮັດສັນຍາກັບອົງການທີ່ກ່ຽວຂ້ອງ, ເຖິງວ່າຈະມີມະຕິຕົກລົງຂອງອົງການປົກຄອງນະຄອນຫຼວງວຽງຈັນ ກ່ຽວກັບມາດຕະການປະຕິບັດໂຄງການວຽງຈັນສະອາດໃນສະເພາະໜ້າ ແລະ ຮອດປີ 2020 ກໍຕາມ, ແລະ ຮ້າຍແຮງກ່ວານັ້ນຍັງມີປາກົດການຖິ້ມຂີ້ເຫຍື້ອຊະຊາຍຢູ່ຕາມສາຍທາງສໍາຄັນຕ່າງໆຄື: ຖະໜົນສ້າງສໍາເລັດໃໝ່ໆໄດ້ກາຍເປັນສຸສານຂີ້ເຫຍື້ອຂອງບຸກຄົນໃດໜຶ່ງ, ດັ່ງເມື່ອບໍ່ດົນມານີ້, ໄດ້ມີປະຊາຊົນສ່ອງແສງມາຍັງໜັງສືພິມລາວພັດທະນາ ກ່ຽວກັບປາກົດການຖີ້ມຂີ້ເຫຍື້ອຊະຊາຍ ຢູ່ ເສັ້ນທາງຕັດໃໝ່ ບ້ານດອນນົກຂຸ້ມ, ເມືອງ ສີສັດຕະນາກ ຫາ ເສັ້ນທາງ 450 ປີ, ຕໍ່ກັບສະພາບດັ່ງກ່າວ ນັກຂ່າວພວກເຮົາກໍໄດ້ລົງໄປສັງເກດເບິ່ງຕົວຈິງ ແລະ ພົບເຫັນສະພາບຂີ້ເຫຍື້ອ ທີ່ຂາດການເກັບມ້ຽນ ແລະ ມີປະຊາຊົນນຳມາຖີ້ມຢູ່ເສັ້ນທາງດັ່ງກ່າວເປັນຈຳນວນຫລາຍ, ອັນໄດ້ສ້າງຄວາມບໍ່ຈົບງາມແກ່ຕົວເມືອງ ໂດຍສະເພາະ ການປະຕິບັດຄຳຂວັນ ສ. ສະອາດ.
ອົງການພັດທະນາ ແລະ ບໍລິຫານໂຕເມືອງວຽງຈັນ ຫຼື (ອພບ) ໃຫ້ຮູ້ວ່າ: ປັດຈຸບັນການປະຕິບັດໂຄງການວຽງຈັນສະອາດ ຍັງດຳເນີນໄປຊັກຊ້າ, ນຶ່ງໃນບັນຫາກໍແມ່ນ ການຈັດເກັບຂີ້ເຫຍື້ອຂອງ ອພບ ຍັງແກ້ໄຂບໍ່ຕົກ ເຖິງວ່າຈະມີ 8 ໜ່ວຍງານຂອງພາກທຸລະກິດ ແລະ 1 ໜ່ວຍງານຂອງລັດເຂົ້າມາຮັບເຫມົາຈັດເກັບຂີ້ເຫຍື້ອ ດັ່ງກ່າວແຕ່ວ່າປະລິມານຂີ້ເຫຍື້ອທີ່ບໍ່ມີເຈົ້າຂອງ ເຊິ່ງນໍາມາກອງໄວ້ຢູ່ແຄມທາງຢ່າງຊະຊາຍກໍມີຫຼວງຫຼາຍ, ເປັນການເພີ່ມປະລິມານຂີ້ເຫຍື້ອສັງຄົມໃຫ້ທັບຖົມຄູນຂຶ້ນນັບມື້ ເຊິ່ງຫຼາຍພາກສ່ວນຕ້ອງມີສ່ວນຮ່ວມເປັນເຈົ້າການໃນການແກ້ໄຂຢ່າງຈິງຈັງຈິ່ງຈະເຮັດໃຫ້ໂຕເມືອງນະຄອນຫຼວງວຽງຈັນ, ມີຄວາມສະອາດຈົບງາມ.
ອີກຢ່າງຫນຶ່ງກໍແມ່ນພຶດຕິກໍາຄັດແຍກຂີ້ເຫຽື້ອຂອງສັງຄົມລາວເຮົາ ຍັງເຮັດບໍ່ທັນໄດ້ດີເທົ່າທີ່ຄວນ ເຊິ່ງສ່ວນໃຫຍ່ ຫຼື ເກືອບທັງໝົດ ແມ່ນຈະຢັດລົງໃນຖົງຂີ້ເຫຍື້ອດຽວກັນ ຈິ່ງເກີດພາວະໝັກບົ່ມເປື້ອນເປິເມື່ອບວກກັບຄວາມສາມາດຮອງຮັບ ຂອງການຈັດເກັບຂີ້ເຫຍື້ອໄປຖິ້ມຢູ່ສະໜາມຂີ້ເຫຽື້ອຫຼັກ 32 ທີ່ເຮັດໄດ້ມື້ຫນຶ່ງລະຫວ່າງ 25-28 ໂຕນ, ເຊິ່ງຖ້າທຽບໃສ່ຈໍານວນປະຊາກອນໃນນະຄອນຫຼວງວຽງຈັນ ມີການຜະລິດຂີ້ເຫຍື້ອປະມານ 0,6 ກິໂລກຣາມຕໍ່ຄົນຕໍ່ມື້, ກໍເຫັນວ່າການປະຕິບັດວຽກງານຈັດເກັບແມ່ນເຮັດໄດ້ພຽງແຕ່ 50% ເທົ່ານັ້ນ ແລະ ນີ້ກໍຄືຫນຶ່ງໃນສາເຫດຫຼັກຂອງບັນຫາທ້າທາຍຕໍ່ການຈັດຕັ້ງປະຕິບັດໂຄງການວຽງຈັນສະອາດ.
ອົງການພັດທະນາ ແລະ ບໍລິຫານໂຕເມືອງວຽງຈັນ ໃຫ້ຮູ້ວ່າ: ກ່ຽວກັບສະພາບເສັ້ນທາງໃນໂຕເມືອງບາງສາຍຍັງບໍ່ສະອາດ ຍັງມີຂີ້ຝຸ່ນປົກຄຸມແຄມທາງຢູ່ນັ້ນ ກໍຍ້ອນວ່າ: ປັດຈຸບັນອົງການ ອພບ ມີກໍາມະກອນພາກສະໜາມພຽງ 82 ຄົນ ມີພາຫະນະທັງໝົດ 72 ຄັນ ເຊິ່ງຖ້າທຽບໃສ່ຄວາມຕ້ອງການຂອງໜ້າວຽກທັງໝົດບໍ່ວ່າວຽກເກັບກວາດ ວຽກເສຍຫຍ້າ, ບົວລະບັດໄມ້ປະດັບ ວຽກຫົດລ້າງເສັ້ນທາງ ແລະ ອື່ນໆ ກໍເຫັນວ່າຕອບສະໜອງໄດ້ບໍ່ຮອດເຄິ່ງນຶ່ງຂອງໜ້າວຽກດັ່ງນັ້ນ ຈິ່ງເຮັດໃຫ້ວຽກງານອະນາໄມຊວ້ານຂີ້ດິນ-ຂີ້ຊາຍແຄມທາງ ຫຼື ລ້າງທາງທັງໝົດ ແມ່ນຍັງປະຕິບັດບໍ່ທັນໄດ້ຢ່າງມີປະສິດທິພາບທັງໝົດ
