ປະທານາທິບໍດີ ສ.ເກົາຫລີ ຄົນໃໝ່ສາບານຕົນເຂົ້າຮັບຕຳແໜ່ງແລ້ວ
ທ່ານ ມຸນ ແຈອິນ ອາຍຸ 64 ປີ ໄດ້ເຂົ້າພິທີສາບານຕົນຮັບຕຳແໜງປະທານາທິບໍດີ ສ.ເກົາຫລີ ຄົນທີ 19 ແລ້ວ ໂດຍຈັດຂຶ້ນທີ່ລັດຖະສະພາຢູ່ນະຄອນຫລວງເຊອຸນ. ທ່ານໃຫ້ຄຳໝັ້ນວ່າຈະສ້າງ ສ.ເກົາຫລີ ໃຫ້ເປັນປະເທດທີ່ມີຄວາມເປັນທຳ ແລະ ເປັນເອກະພາບ ລວມທັງມີຄວາມຕັ້ງໃຈຈະໄປຢ້ຽມຢາມ ສປປ ເກົາຫລີ ໃນເວລາ ແລະ ໂອກາດອັນເໝາະສົມ ຕາມນະໂຍບາຍສ້າງຄວາມປອງດອງລະຫວ່າງສອງເກົາຫລີຂອງທ່ານ.
ຜູ້ນຳ ສ.ເກົາຫລີ ຄົນໃໝ່ຍັງໃຫ້ຄຳໝັ້ນວ່າ: ຈະເຮັດທຸກຢ່າງທີ່ເຮັດໄດ້ ເພື່ອສ້າງສັນຕິພາບຢູ່ແຫລມເກົາຫລີ ໂດຍທ່ານພ້ອມຈະເດີນທາງໄປອາເມລິກາ ແລະ ຍີ່ປຸ່ນທັນທີ ເພື່ອແກ້ໄຂເລື່ອງດັ່ງກ່າວ. ທ່ານ ມຸນ ແຈອິນ ຍັງບອກວ່າມີແຜນຈະເຈລະຈາຢ່າງຈິງຈັງກັບອາເມລິກາ ແລະ ຈີນ ໃນເລື່ອງການຕິດຕັ້ງລະບົບປ້ອງກັນລູກສອນໄຟ (THAAD) ເຊິ່ງເປັນຂໍ້ໂຕ້ຖຽງກັນຢູ່ ສ.ເກົາຫລີ ແລະ ສ້າງຄວາມບໍ່ພໍໃຈໃຫ້ຈີນ.
ທ່ານ ໝອນ ສໄປເຊີຣ໌ ໂຄສົກທຳນຽບປະທານາທິບໍດີອາເມລິກາ ໄດ້ກ່າວສະແດງຄວາມຍິນດີຕໍ່ທ່ານ ມຸນ ແຈອິນ ແລະ ຫວັງວ່າການເປັນພັນທະມິດລະຫວ່າງອາເມລິກາ ແລະ ສ.ເກົາຫລີ ຈະຮັດແໜ້ນຍິ່ງຂຶ້ນ, ສ່ວນທາງການຈີນ ແລະ ຍີ່ປຸ່ນ ໄດ້ສົ່ງສານສະແດງຄວາມຍິນດີຕໍ່ທ່ານ ມຸນ ແຈອິນ ເຊັ່ນກັນ ໂດຍຍີ່ປຸ່ນລະບຸວ່າທັງສອງປະເທດຕ່າງກໍພວມຜະເຊີນຄວາມທ້າທາຍຈາກບັນຫາ ສປປ ເກົາຫລີ, ແຕ່ເຊື່ອວ່າຈະສາມາດຮ່ວມມືກັນເພື່ອສັນຕິພາບ ແລະ ຄວາມໝັ້ນຄົງໃນພາກພື້ນໄດ້.
ເຖິງວ່າໄຊຊະນະຂອງທ່ານ ມຸນ ແຈອິນ ຈະມາຈາກຈຳນວນຄະແນນສຽງທີ່ບໍ່ຫລາຍໄປຈາກຄູ່ແຂ່ງ, ແຕ່ໄດ້ຊີ້ໃຫ້ເຫັນເຖິງການປ່ຽນແປງທີ່ສັ່ນສະເທືອນສູນກາງອຳນາດທາງການເມືອງຂອງ ສ.ເກົາຫລີ. ທ່ານ ດຣ. ຈອນ ນິລສັນ-ໄຣ ນັກວິເຄາະຈາກສະຖາບັນວິໄຈ ແລະ ໃຫ້ຄຳປຶກສາດ້ານກິດຈະການຕ່າງປະເທດຂອງສະຫະລາຊະອານາຈັກ (ຊັດແທມ ເຮົາສ໌) ກ່າວຕໍ່ BBC ວ່າ: ຜົນການເລືອກຕັ້ງປະທານາທິບໍດີເທື່ອນີ້ ສະແດງວ່າຄວາມຄິດເຫັນຂອງປະຊາຊົນ ສ.ເກົາຫລີ ເລີ່ມມີທ່າອ່ຽງຫັນໄປທາງຝ່າຍຊ້າຍ ແລະ ເສລີນິຍົມຫລາຍຂຶ້ນ, ພາຍຫລັງປ່ອຍໃຫ້ກຸ່ມການເມືອງແນວອະນຸລັກນິຍົມຝ່າຍຂວາປົກຄອງປະເທດຕະຫລອດ 8 ປີຜ່ານມາ.
ເສັ້ນທາງການເມືອງຂອງທ່ານ ມຸນ ແຈອິນ ຜູກມັດກັບຂະບວນການເຄື່ອນໄຫວຕໍ່ຕ້ານຜະເດັດການ ແລະ ການຕໍ່ຕ້ານພຶດຕິກຳສໍ້ລາດບັງຫລວງຂອງກຸ່ມຊົນຊັ້ນນຳມາໂດຍຕະຫລອດ. ສະໄໝທີ່ທ່ານຍັງເປັນນັກສຶກສາໄດ້ເປັນແນວໜ້າໃນການປະທ້ວງໂຄ່ນລົ້ມຜູ້ນຳ ປັກ ຈອງຮີ ບິດາຂອງອະດີດປະທານາທິບໍດີ ປັກ ກິນເຮ ແລະ ຕໍ່ມາເປັນທະນາຍຄວາມດ້ານສິດທິມະນຸດ, ທ່ານຍັງໄດ້ຮ່ວມວຽກກັບອະດີດປະທານາທິບໍດີ ໂນ ມູ ຮຽນ ຕໍ່ຕ້ານລັດຖະບານທະຫານຂອງນາຍພົນ ຊອນ ດູ ຮວານ ນຳອີກ ສົ່ງຜົນໃຫ້ຕໍ່ມາທ່ານກາຍເປັນຄົນໃກ້ຊິດ ແລະ ຫົວໜ້າເຈົ້າໜ້າທີ່ໃນໜ່ວຍບໍລິຫານຂອງທ່ານ ໂນ.
ດຣ. ນິລສັນ-ໄຣ ເບິ່ງວ່າການທີ່ທ່ານ ມຸນ ແຈອິນ ມີເບື້ອງຫລັງ ແລະ ນະໂຍບາຍແບບນີ້ ສອດຄ່ອງກັບຄວາມຮູ້ສຶກຂອງຊາວ ສ.ເກົາຫລີ ທີ່ເລີ່ມບໍ່ພໍໃຈຕໍ່ການສໍ້ລາດບັງຫລວງ ແລະ ການຄອບຄອງຜົນປະໂຫຍດຝ່າຍດຽວ ໂດຍກຸ່ມຊົນຊັ້ນນຳຝ່າຍຂວາ ລວມທັງກຸ່ມທຸລະກິດລາຍໃຫຍ່ (ແຊໂບລ) ເຊິ່ງກະແສຄວາມບໍ່ພໍໃຈນີ້ສະແດງອອກມາໃນຮູບແບບຂອງການປະທ້ວງໃຫຍ່ຫລາຍເທື່ອ ເພື່ອຖອດຖອນອະດີດປະທານາທິບໍດີ ປັກ ກິນເຮ ອອກຈາກຕຳແໜ່ງ. ການທີ່ທ່ານ ມຸນ ແຈອິນ ຍັງເປັນຈຸດນິຍົມຂອງປະຊາຊົນຕໍ່ໄປໄດ້ໃນລະຫວ່າງດຳລົງຕຳແໜ່ງຜູ້ນຳ, ທ່ານຈະຕ້ອງດຳເນີນນະໂຍບາຍປະຕິຮູບທີ່ຕອບບັນຫາແກ່ມວນຊົນກຸ່ມນີ້.
ສ່ວນອຸປະສັກອື່ນໆໃນການບໍລິຫານປະເທດທີ່ລໍຖ້າທ່ານ ມຸນ ແຈອິນ ຢູ່, ດຣ. ນິລສັນ-ໄຣ ບອກວ່າໄດ້ແກ່ການທີ່ທ່ານມີເວລາສຳລັບການໂອນຖ່າຍອຳນາດບໍລິຫານສັ້ນ ເນື່ອງຈາກຜູ້ນຳຄົນເກົ່າຖືກຖອດຖອນຈາກຕຳແໜ່ງຢ່າງກະທັນຫັນ, ທ່ານຈະຕ້ອງເລັ່ງຈັດຕັ້ງລັດຖະບານປະສົມ ເພື່ອໃຫ້ມີສຽງໃນສະພາສູງກວ່າພັກຄູ່ແຂ່ງຝ່າຍອະນຸລັກນິຍົມ ຄືພັກເສລີພາບ ເຊິ່ງມີບ່ອນນັ່ງໃນລັດຖະສະພາເຖິງ 35% ເຮັດໃຫ້ຄາດການໄດ້ວ່າການດຳເນີນນະໂຍບາຍປະຕິຮູບຂອງທ່ານອາດຕ້ອງຄ່ອຍເປັນຄ່ອຍໄປ ແລະ ອາດຈະພົບການຕໍ່ຕ້ານຈາກຝ່າຍອະນຸລັກນິຍົມຢ່າງໜັກ.
ສຳລັບບັນຫາ ສປປ ເກົາຫລີ, ດຣ. ນິລສັນ-ໄຣ ເບິ່ງວ່າ: ເຖິງວ່າທ່ານ ມຸນ ແຈອິນ ຈະຢືນຢູ່ເບື້ອງຝ່າຍທີ່ຕ້ອງການຜູກມິດ, ເພີ່ມການຮ່ວມມື ແລະ ດຳເນີນການເຈລະຈາຢ່າງສັນຕິກັບ ສປປ ເກົາຫລີ ຕາມນະໂຍບາຍຕາເວັນສາຍແສງ (Sunshine policy) ທີ່ກຸ່ມການເມືອງຂອງທ່ານເຄີຍໃຊ້ມາກ່ອນ, ແຕ່ຂໍ້ຈຳກັດຂອງສະຖານະການຕ່າງປະເທດໃນປັດຈຸບັນ ອາດເຮັດໃຫ້ທ່ານຕ້ອງດຳເນີນນະໂຍບາຍທີ່ມີຕໍ່ ສປປ ເກົາຫລີ ຢ່າງລະມັດລະວັງ ໂດຍພະຍາຍາມຮັກສາການພົວພັນກັບຈີນ ເຊິ່ງເປັນພັນທະມິດສຳຄັນຂອງ ສປປ ເກົາຫລີ ແລະ ບໍ່ຜະເຊີນການສ້າງຄວາມບໍ່ພໍໃຈກັບອາເມລິກາ, ເຖິງວ່າຝ່າຍຊ້າຍຂອງ ສ.ເກົາຫລີ ຈະມີທ່າທີຕໍ່ຕ້ານການຄອບງຳຂອງອາເມລິກາມາກ່ອນກໍຕາມ.
