ອົງຄະນະພັກນະຄອນຫລວງວຽງຈັນຈະສືບຕໍ່ແກ້ບາງວຽກງານທີ່ຍັງບໍ່ປະຕິບັດໄດ້ຕາມຄາດໝາຍ
ກອງປະຊຸມຄົບຄະນະບໍລິຫານງານພັກນະຄອນຫລວງວຽງຈັນຄັ້ງທີ 13 ສະໄໝທີ VI ຈັດຂຶ້ນໃນທ້າຍອາທິດຜ່ານມານີ້, ທີ່ຫ້ອງວ່າການປົກຄອງນະຄອນຫລວງວຽງຈັນ, ໂດຍເປັນປະທານຂອງສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ເລຂາຄະນະພັກ, ເຈົ້າຄອງ ນະຄອນຫລວງວຽງຈັນ, ມີບັນດາສະຫາຍຮອງເລຂາຄະນະພັກ, ຄະນະປະຈຳພັກ ແລະ ຄະນະພັກເຂົ້າຮ່ວມ.
ໃນໂອກາດນີ້, ສະຫາຍຫົວໜ້າຫ້ອງວ່າການປົກຄອງນະຄອນຫລວງວຽງຈັນ ໄດ້ລາຍງານສະພາບພົ້ນເດັ່ນ ໃນການຈັດຕັ້ງນຳພາ-ຊີ້ນຳວຽກງານຮອບດ້ານ ຂອງອົງຄະນະພັກ ໄລຍະ 9 ເດືອນຜ່ານມາ ໃນການນຳພາວຽກງານແນວຄິດການເມືອງ, ການກໍ່ສ້າງພັກ-ພະນັກງານ, ວຽກງານກວດກາກໍ່ສ້າງຮາກຖານການເມືອງ, ວຽກງານເສດຖະກິດ, ວຽກງານການພັດທະນາຕົວເມືອງ ວັດທະນະທຳ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ການຄຸ້ມຄອງ-ບໍລິຫານລັດ ແລະ ຂົງເຂດວຽກງານອື່ນໆ ເຫັນວ່າຄະນະພັກ ສາມາດຍາດໄດ້ຜົນງານການນຳພາວຽກງານຢ່າງຮອບດ້ານ, ຊຶ່ງມັນສະແດງໃຫ້ເຫັນ ວຽກຈຸດສຸມແຜນພັດທະນາເສດຖະກິດ-ສັງຄົມ ປະຈຳປີ ລ້ວນແຕ່ຖືກຈັດຕັ້ງປະຕິບັດ ແລະ ສາມາດບັນລຸເປັນສ່ວນໃຫຍ່ ມີພຽງບາງຄາດໝາຍ ກຳລັງຈັດຕັ້ງປະຕິບັດ ແລະ ຈະສືບຕໍ່ຈັດຕັ້ງປະຕິບັດໃນທ້າຍປີນີ້.
ຄຽງຄູ່ກັນນັ້ນ, ຍັງມີບາງວຽກງານ ທີ່ຍັງບໍ່ທັນປະຕິບັດໄດ້ຕາມຄາດໝາຍ ເປັນຕົ້ນ ການຈັດເກັບລາຍຮັບຢູ່ບັນດາເມືອງ ຍັງມີຄວາມສ່ຽງທີ່ຈະບໍ່ໄດ້ຕາມແຜນການທີ່ວາງໄວ້ ການປະສານງານເພື່ອແກ້ໄຂບັນຫາສຳຄັນຕ່າງໆ ກັບຂະແໜງການສາຍຕັ້ງຍັງເຮັດໄດ້ໜ້ອຍ ການບໍລິຫານຄຸ້ມຄອງລັດ ຄຸ້ມຄອງເສດຖະກິດ-ສັງຄົມ ຕາມກົດໝາຍບາງດ້ານບໍ່ທັນເຂັ້ມງວດ ມີນິຕິກຳອອກຫລາຍ ແຕ່ການເຊື່ອມຊຶມການຈັດຕັ້ງປະຕິບັດລົງສູ່ບ້ານ ຍັງເຮັດບໍ່ໄດ້ດີ ການປະຊາສຳພັນ ສຶກສາອົບຮົມແນວຄິດ-ການເມືອງ ຍັງເຮັດໄດ້ໜ້ອຍ ແລະ ບໍ່ລົງເລິກເທົ່າທີ່ຄວນ, ປາກົດການຫຍໍ້ທໍ້ໃນສັງຄົມ ຍັງມີລັກສະນະຊ້ຳເຮື້ອ ເປັນຕົ້ນ ບັນຫາຢາເສບຕິດ, ອຸບັດຕິເຫດຕາມຖະໜົນ, ອັກຄີໄພ, ການໂຈລະກຳ ກຸ່ມແກ້ງກວນເມືອງ ຍັງບໍ່ທັນຫລຸດລົງຕາມແຜນການທີ່ວາງໄວ້ ແລະ ອື່ນໆ.
