ໄຟຟ້າມອບເງິນ 3 ຕື້ກີບຊ່ວຍຜູ້ປະສົບໄພນ້ຳຖ້ວມຟື້ນຟູການຜະລິດ

ເມື່ອທ້າຍອາທິດຜ່ານມານີ້, ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ຄໍາມະນີ ອິນທິລາດ, ພ້ອມດ້ວຍຜູ້ຕາງໜ້າລັດວິສາຫະກິດໄຟຟ້າລາວ ແລະ ບໍລິສັດຜະລິດ-ໄຟຟ້າລາວ ມະຫາຊົນ, ໄດ້ມອບເງິນຈໍານວນ 3 ຕື້ກີບ ໃຫ້ລັດຖະບານ ເພື່ອປະກອບສ່ວນຊ່ວຍເຫລືອປະຊາຊົນຜູ້ໄດ້ຮັບຜົນກະທົບຈາກໄພນໍ້າຖ້ວມທົ່ວປະເທດ, ເຊິ່ງຮັບໂດຍທ່ານລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ເພັດ ພົມພິພັກ, ພ້ອມທັງໄດ້ສະແດງຄວາມຂອບໃຈລັດວິສາຫະກິດ ແລະ ບໍລິສັດດັ່ງກ່າວ, ທີ່ໄດ້ປະກອບສ່ວນອັນລໍ້າຄ່າເພື່ອຊ່ວຍລັດຖະບານໃນການບັນເທົາທຸກ ແລະ ຄວາມເດືອດຮ້ອນຂອງປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ແລະ ເງິນຈຳນວນນີ້ຈະໄດ້ມອບໃຫ້ກະຊວງກະສິກຳ ແລະ ປ່າໄມ້ ເພື່ອຊື້ແນວພັນພືດນຳໄປແຈກຢາຍໃຫ້ຊາວກະສິກອນຢູ່ທ້ອງຖິ່ນຕ່າງໆ ທີ່ໄດ້ຮັບຜົນກະທົບ ເພື່ອໃຫ້ເຂົາເຈົ້າສາມາດເຮັດການຜະລິດລະດູແລ້ງທ່ວງທັນເວລາ.