ຣັດເຊຍກຽມລົງນາມ 5 ພັນລ້ານໂດລາ ຂາຍ ເອສ-400 ໃຫ້ອິນເດຍ
ຜູ້ນຳຣັດເຊຍຈະເປັນສັກຂີພິຍານການລົງນາມໃນຂໍ້ຕົກລົງ ມູນຄ່າ 5.000 ລ້ານໂດລາສະຫະລັດ, ມົດສະກູຂາຍລະບົບປ້ອງກັນໄພທາງອາກາດ ເອສ-400 ໃຫ້ນິວເດລີ.
ສຳນັກຂ່າວຕ່າງປະເທດລາຍງານວ່າ: ທ່ານ ຢູຣີ ອູຊາຄອຟ ຫົວໜ້າຄະນະທີ່ປຶກສານະໂຍບາຍຕ່າງປະເທດ ຂອງປະທານາທິບໍດີ ວະລາດິເມຍ ປູຕິນ ຜູ້ນຳຣັດເຊຍ ເປີດເຜີຍຕໍ່ສື່ມວນຊົນ ໃນນະຄອນຫລວງມົດສະກູ ວັນທີ 2 ຕຸລາວ່າ: ປະທານາທິບໍດີ ປູຕິນ ຈະອອກເດີນທາງໄປຢ້ຽມຢາມອິນເດຍໃນວັນທີ 4 ຕຸລາ ໂດຍວາລະສຳຄັນຂອງການຢ້ຽມຢາມຄັ້ງນີ້ ຄືການເຊັນລົງນາມຂໍ້ຕົກລົງ ສົ່ງມອບລະບົບປ້ອງກັນໄພທາງອາກາດ ເອສ-400 ເຊິ່ງມີມູນຄ່າຫລາຍກວ່າ 5.000 ລ້ານໂດລາສະຫະລັດ.
ມົດສະກູເຈລະຈາຫລາຍເດືອນ ເພື່ອຂະຫຍາຍລະບົບລູກສອນໄຟແບບພື້ນສູ່ອາກາດໄລຍະໄກ ເອສ-400 ໃຫ້ນິວເດລີ. ການຂາຍສ້າງຄວາມບໍ່ພໍໃຈໃຫ້ວໍຊິງຕັນ ຫຸ້ນສ່ວນດ້ານປ້ອງກັນປະເທດຂອງອິນເດຍ ເຊິ່ງບໍ່ຕ້ອງການໃຫ້ອິນເດຍໃຊ້ເຕັກໂນໂລຊີຂອງຣັດເຊຍ ໂດຍເຈົ້າໜ້າທີ່ລະດັບສູງຂອງກະຊວງປ້ອງກັນປະເທດອາເມລິກາ ກ່າວໃນເດືອນສິງຫາຜ່ານມາວ່າ: ອາດມີການພິຈາລະນາຂວ້ຳບາດອິນເດຍ ຖ້າການຊື້ ເອສ-400 ບໍ່ຍົກເລີກ. ອິນເດຍສົ່ງສັນຍານວ່າ: ຈະຮ້ອງຂໍໃຫ້ອາເມລິກາຍົກເວັ້ນການຂວ້ຳບາດເປັນກໍລະນີພິເສດ, ແຕ່ເຈົ້າໜ້າທີ່ອາເມລິກາກ່າວໃນອາທິດຜ່ານມາວ່າ: ບໍ່ຮັບປະກັນວ່າອາເມລິກາຈະເຮັດແນວນັ້ນ.
