UN ອະນຸມັດງົບ 15 ລ້ານໂດລາ ຊ່ວຍຜູ້ປະສົບໄພອິນໂດເນເຊຍ
ສະຫະປະຊາຊາດຈັດສັນງົບປະມານຈາກກອງທຶນກາງໃນເບື້ອງຕົ້ນ 15 ລ້ານໂດລາສະຫະລັດ ເພື່ອຊ່ວຍເຫລືອຜູ້ປະສົບເຫດທໍລະນີໄພພິບັດຢູ່ເກາະສຸລາເວສີຂອງອິນໂດເນເຊຍ ເຊິ່ງຜູ້ເສຍຊີວິດເພີ່ມຂຶ້ນຢ່າງຕໍ່ເນື່ອງເປັນຫລາຍກວ່າ 1.300 ຄົນແລ້ວ.
https://www.facebook.com/UNOCHA/videos/2003787973016755/
ສຳນັກຂ່າວຕ່າງປະເທດລາຍງານວ່າ: ສຳນັກງານປະສານງານດ້ານມະນຸດສະທຳແຫ່ງສະຫະປະຊາຊາດ (OCHR) ປະກາດການຈັດສັນງົບປະມານຈາກກອງທຶນຕອບສະໜອງສຸກເສີນສ່ວນກາງ ເປັນຈຳນວນເບື້ອງຕົ້ນ 15 ລ້ານໂດລາສະຫະລັດ ເພື່ອຊ່ວຍເຫລືອອິນໂດເນເຊຍໃນການແກ້ໄຂສະຖານະການຈາກທໍລະນີພິບັດໄພຢູ່ເກາະສຸລາເວສີ ເຊິ່ງເກີດແຜ່ນດິນໄຫວຮຸນແຮງ 7,5 ແມກນິຈູດ ແລະ ເກີດຄື້ນສຶນາມິຫລາຍເທື່ອ ໃນວັນທີ 28 ກັນຍາຜ່ານມາ ແລະ ຜູ້ປະສົບໄພຫລາຍກວ່າ 200.000 ຄົນຕ້ອງການການຊ່ວຍເຫລືອຢ່າງຮີບດ່ວນ.
ສຳນັກງານບໍລິຫານຈັດການໄພພິບັດແຫ່ງຊາດ (BNPB) ລາຍງານຈຳນວນຜູ້ເສຍຊີວິດເພີ່ມເປັນຢ່າງໜ້ອຍ 1.374 ຄົນ ສ່ວນຫລາຍຢູ່ເມືອງປາລູ ເມືອງເອກຂອງແຂວງສຸລາເວສີກາງ ແລະ ໄດ້ຮັບບາດເຈັບປະມານ 800 ຄົນ ແລະ ຍັງມີທ່າອ່ຽງຈຳນວນຜູ້ເສຍຊີວິດຈະເພີ່ມຂຶ້ນອີກຫລາຍ ເພາະຍັງມີຜູ້ສູນຫາຍ “ຫລາຍກວ່າ 100 ຄົນ”. ທັງນີ້ ສູນປະສານງານການຊ່ວຍເຫລືອດ້ານມະນຸດສະທຳອາຊຽນ ເຊິ່ງມີສຳນັກງານຢູ່ນະຄອນຫລວງຈາກາຕາ ໄດ້ປະກາດຂໍຮັບບໍລິຈາກຖົງບັນຈຸສົບ “ດ່ວນທີ່ສຸດ” ເນື່ອງຈາກເຈົ້າໜ້າທີ່ຕ້ອງການຝັງສົບຜູ້ເສຍຊີວິດໃຫ້ໄວທີ່ສຸດ ເພື່ອປ້ອງກັນບໍ່ໃຫ້ກາຍເປັນແຫລ່ງແຜ່ເຊື້ອພະຍາດໃຫ້ແຜ່ລະບາດໃນອະນາຄົດ.
