ປກສ ແຂວງບໍລິຄຳໄຊຈັບຜູ້ຄ້າຂາຍຢາເສບຕິດໃຫຍ່ພ້ອມຂອງກາງຢາບ້າກ່ວາ 1 ແສນເມັດ
ເມື່ອອາທິດຜ່ານມານີ້, ເຈົ້າໜ້າທີ່ ປກສ ແຂວງ ບໍລິຄຳໄຊ ໄດ້ຈັບຕົວທ້າວ ກິ່ງຊົງ ອາຍຸ 35 ປີຢູ່ບ້ານນາສາລາ, ເມືອງໄຊທານີນະຄອນຫລວງວຽງຈັນ, ພ້ອມຂອງກາງຢາບ້າກວ່າໜຶ່ງແສນເມັດ ທີ່ຜູ້ກ່ຽວໄດ້ຊຸກເຊື່ອງໄວ້ໃນລົດ ແລະ ພວມຈະນຳໄປສົ່ງໃຫ້ຜູ້ຮ່ວມຂະບວນການຢູ່ເມືອງລ້ອງຊານແຂວງໄຊສົມບູນ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກພົນລະເມືອງດີວ່າຈະມີການລໍາລຽງຂົນສົ່ງຢາເສບຕິດຈາກນະຄອນຫລວງວຽງຈັນໄປໃຫ້ເຄືອຂ່າຍຢາເສບຕິດຢູ່ເມືອງລ້ອງຊານ, ຈຶ່ງໄດ້ນຳກຳລັງເຈົ້າໜ້າທີ່ລົງຕິດຕາມ ແລະ ໃນວັນທີ 24 ກັນຍານີ້, ໄດ້ພົບເຫັນລົດເກງໝາຍເລກທະບຽນ ກນ 5694 ທີ່ຂີ່ມາຕາມເສັ້ນທາງບ້ານນາກຸນ, ເມືອງບໍລິຄັນແຂວງບໍລິຄໄຊ ພໍມາຮອດເຂດບ້ານທ່າໂທມ ເຈົ້າໜ້າທີ່ຈຶ່ງໄດ້ສະກັດລົດຄັນດັ່ງກ່າວ, ແຕ່ຜູ້ຕ້ອງຫາໄດ້ຂີ່ລົດຫລົບໜີ ແລະ ໄດ້ໄປຕຳກັບລົດຈັກຂອງປະຊາຊົນຢູ່ເຂດດັ່ງກ່າວ, ກ່ອນຈະຖືກເຈົ້າໜ້າທີ່ຈັບຕົວໄດ້ສຳເລັດ, ພ້ອມຂອງກາງຢາບ້າກວ່າ 1 ແສນເມັດທີ່ຊຸກເຊື່ອງໄວ້ໃນລົດຄັນດັ່ງກ່າວ.
ຜ່ານການສືບສວນ-ສອບສວນເບື້ອງຕົ້ນ ຜູ້ຕ້ອງຫາຮັບສາລະພາບວ່າ: ຢາບ້າຈຳນວນນີ້, ແມ່ນໄດ້ຮັບມາຈາກໝູ່ຢູ່ນະຄອນຫລວງວຽງຈັນທີ່ເປັນເຄືອຂ່າຍຄ້າຂາຍຢາເສບຕິດຮ່ວມກັນ ເພື່ອຈະນຳໄປສົ່ງໃຫ້ຜູ້ຮ່ວມຂະບວນການຢູ່ບ້ານ ຖ້ຳລິນເມືອງລ້ອງຊານ, ກ່ອນຈະຖືກເຈົ້າໜ້າທີ່ຈັບຕົວ.
ປັດຈຸບັນຄະດີດັ່ງກ່າວ, ເຈົ້າໜ້າທີ່ພວມເລັ່ງຂະຫຍາຍຜົນເພື່ອຕິດຕາມນຳຈັບຕົວຜູ້ຮ່ວມຂະບວນການມາດຳເນີນຄະດີໃຫ້ໄດ້ໂດຍໄວ.
