ອານຸສອນ ຝຶກຊ້ອມຢູ່ໄທກຽມ ປ້ອງກັນແຊ້ມ ມ ອາຊຽນ ທີ່ມຽນມາ
ທ້າວ ອານຸສອນ ໄຊສາ ນັກກິລາແລ່ນ-ລານ ທີມຊາດລາວ ໄດ້ເຂົ້າສູນຝຶກຊ້ອມທີ່ປະເທດໄທ ເພື່ອກຽມປ້ອງກັນແຊ້ມໃນການແຂ່ງຂັນມະຫາໄລອາຊຽນຄັ້ງທີ 19 ທີ່ປະເທດມຽນມາ ຈະຈັດຂຶ້ນໃນທ້າຍປີນີ້.
ທ້າວ ອານຸສອນ ໄຊສາ ໃຫ້ສໍາພາດວ່າ: ພາຍຫລັງສໍາເລັດການເຂົ້າຮ່ວມແຂ່ງຂັນງານມະຫາກໍາເອຊຽນເກມ ທີ່ປະເທດອິນໂດເນເຊຍ ຈັດຂຶ້ນລະຫວ່າງທ້າຍເດືອນສິງຫາຜ່ານມານີ້ ຕົນເອງກໍກັບມາຝຶກຊ້ອມຢູ່ລາວເປັນເວລາ 1 ເດືອນ ແລະ ສືບຕໍ່ຝຶກຊ້ອມທີ່ປະເທດໄທ ເພື່ອກຽມປ້ອງກັນແຊ້ມໃນການແຂ່ງຂັນມະຫາໄລອາຊຽນຄັ້ງທີ 19 ທີ່ປະເທດມຽນມາ ຈະເປັນເຈົ້າພາບ ເຊິ່ງຈະຈັດຂຶ້ນລະຫວ່າງວັນທີ 10-19 ທັນວານີ້, ການເຂົ້າສູນຝຶກຊ້ອມຄັ້ງນີ້ ຕົນເອງເຂົ້າຝຶກຊ້ອມ 2 ລາຍການຄື: ແລ່ນຂ້າມຮົ້ວ 100 ແມັດ, ແລ່ນ 4X100 ໂດຍຝຶກຊ້ອມທຸກໆວັນຈັນຫາວັນເສົາ ເວລາ 6:00-9:00 ໂມງເຊົ້າ ແລະ 15:30-18:30 ໂມງ.
ສໍາລັບການແຂ່ງຂັນມະຫາໄລອາຊຽນຄັ້ງທີ 18 ຈັດຂຶ້ນທີ່ປະເທດສິງກະໂປ ທ້າວ ອານຸສອນ ໄຊສາ ສາມາດຍາດໄດ້ 2 ຫລຽນຄໍາໃນ 2 ລາຍການຄື: ແລ່ນຂ້າມຮົ້ວ 100 ແມັດ, ແລ່ນ 4X100.
