ທີມຊາດລາວ ເສຍໃຫ້ ເຈົ້າພາບ 0-1
ທີມຊາດລາວ ລົງສະໜາມຄັ້ງທໍາອິດເສຍໃຫ້ແກ່ ທີມຊາດບັງກາລະເທດ 0-1 ໃນວັນທີ 1 ຕຸລາຜ່ານມານີ້ ຂອງການແຂ່ງຂັນບານເຕະລາຍການ Bangabandhu Gold Cup International Tournament 2018 ຄູ່ເປີດສະໜາມການແຂ່ງຂັນຢູ່ທີ່ SYLHET ZILA STADIUM.
ການແຂ່ງຂັນໄດ້ດໍາເນີນໄປດ້ວຍບັນຍາກາດຄຶກຄື້ນ ເຊິ່ງມີຜູ້ຊົມເຂົ້າຊົມເຕັມສະໜາມ, ຜ່ານການແຂ່ງຂັນຜົນປາກົດວ່າ ທີມຊາດບັງກະລາເທດ ເປັນຝ່າຍເອົາຊະນະ ທີມຊາດລາວ 1-0 ໂດຍໄດ້ປະຕູໃນນາທີ 60 ຈາກເບີ 15 Biplo Ahmed ສົ່ງຜົນໃຫ້ ທີມຊາດບັງກະລາເທດ ຂຶ້ນເປັນທີມນຳ ກຸ່ມ ບີ.
ການແຂ່ງຂັນ Bangabandhu Gold Cup International Tournament 2018 ຈັດຂຶ້ນລະຫວ່າງວັນທີ 1-12 ຕຸລາ 2018 ເຊິ່ງມີ 6 ປະເທດ ແບ່ງອອກເປັນ 2 ກຸ່ມຄື: ກຸ່ມ ເອ ປະກອບມີ: ເນປານ, ປາແລັສຕິນ ແລະ ທາຈິກິດສະຖານ, ກຸ່ມ ບີ ປະກອບມີ: ບັງກະລາເທດ, ລາວ, ຟີລິບປິນ.
ສໍາລັບຕາຕະລາງການແຂ່ງຂັນຂອງ ທີມຊາດລາວ ຍັງຈະລົງສະໜາມອີກ 1 ຄັ້ງໃນວັນທີ 3 ຕຸລາ 2018 ເວລາ 18:30 ໂມງ ພົບກັບ ທີມຊາດຟີລິບປິນ.
