ຕວກກີສັ່ງຈັບຜູ້ຕ້ອງສົງໄສ ຟອກເງິນ 400 ກວ່າຄົນ
ໄອຍະການຕວກກີສັ່ງຄວບຄຸມຜູ້ຕ້ອງສົງໄສ 417 ຄົນໃນການສອບສວນຄະດີຟອກເງິນທີ່ກ່ຽວກັບການໂອນເງິນສະກຸນຕ່າງປະເທດມູນຄ່າ 2.500 ລ້ານລີຣາ ໄປບັນຊີທະນາຄານໃນຕ່າງປະເທດ.
ສະຖານີໂທລະພາບຊີເອັນເອັນເຕິກໃນຕວກກີ ລາຍງານອ້າງຖະແຫລງການຂອງສຳນັກງານໄອຍະການໃຫຍ່ໃນນະຄອນອິສຕັນບູລວ່າ: ຜູ້ຮັບໂອນເງິນສ່ວນຫລາຍເປັນຊາວອີຣານທີ່ອາໄສຢູ່ໃນອາເມລິກາ. ຕຳຫລວດອາຊະຍາກຳການເງິນອິສຕັນບູລເປີດປະຕິບັດການໃນຫລາຍແຂວງ, ກວດຄົ້ນຫລາຍພື້ນທີ່ ແລະ ຄວບຄຸມຜູ້ຕ້ອງສົງໄສໄດ້ເປັນຈຳນວນຫລາຍ. ເປົ້າໝາຍການສອບສວນຄືຜູ້ທີ່ມຸ່ງຫວັງທຳລາຍສະຖຽນລະພາບເສດຖະກິດ ແລະ ການເງິນຂອງຕວກກີ. ຜູ້ຕ້ອງສົງໄສຖືກກ່າວຫາວ່າຟອກເງິນ, ຕັ້ງແກ້ງໂດຍມີຈຸດປະສົງກໍ່ອາຊະຍາກຳ ແລະ ຝ່າຝືນກົດໝາຍທີ່ມຸ່ງສະກັດການໃຫ້ທຶນສະໜັບສະໜູນການກໍ່ການຮ້າຍ ໂດຍໄດ້ຮັບຄ່ານາຍໜ້າໃນການໂອນເງິນໄປບັນຊີທະນາຄານໃນຕ່າງປະເທດ 28.088 ບັນຊີຜ່ານສາຂາທະນາຄານ ແລະ ຕູ້ກົດເງິນສົດໃນຕວກກີນັບແຕ່ວັນທີ 1 ມັງກອນປີກ່ອນ ຄັ້ງລະບໍ່ຕໍ່າກວ່າ 5.000 ລີຣາ.
