ຫວຽດນາມຢຶດເກັດຫລິ່ນ-ງາຊ້າງ ທີ່ສະໜາມບິນຮ່າໂນ້ຍ
ໜ່ວຍງານພາສີອາກອນຫວຽດນາມ ຢຶດເກັດຫລິ່ນ ແລະ ງາຊ້າງ ນ້ຳໜັກລວມເກືອບ 1 ໂຕນ ໃນກ່ອງບັນຈຸສິນຄ້າຂົນສົ່ງທາງອາກາດ ຢູ່ສະໜາມບິນນະຄອນຫລວງຮ່າໂນ້ຍ.
ສຳນັກຂ່າວ AFP ລາຍງານວ່າ: ການຄ້າງາຊ້າງ ແລະ ເກັດຫລິ່ນ ເປັນສິ່ງຜິດກົດໝາຍໃນຫວຽດນາມ, ແຕ່ການບັງຄັບໃຊ້ກົດໝາຍອ່ອນແອ ເຮັດໃຫ້ຕະຫລາດມືດເຟື່ອງຟູ ແລະ ຫວຽດນາມກາຍເປັນສູນກາງສຳຄັນສຳລັບງາຊ້າງທີ່ລັກລອບຂົນຈາກອາຟຣິກາ ແລະ ສົ່ງຕໍ່ໄປສ່ວນອື່ນໆຂອງອາຊີ ໂດຍສະເພາະຈີນ.
ເຈົ້າໜ້າທີ່ພາສີອາກອນປະຈຳສະໜາມບິນສາກົນໂນ້ຍບ໋າຍ ກວດພົບເກັດຫລິ່ນນ້ຳໜັກ 805 ກິໂລ, ງາຊ້າງ ແລະ ຜະລິດຕະພັນເຮັດຈາກງາຊ້າງ 193 ກິໂລ ໃນກ່ອງຂົນສົ່ງສິນຄ້າ 24 ກ່ອງ ໃນວັນທີ 28 ກັນຍາຜ່ານມາ ແລະ ຈາກປ້າຍຊື່ທີ່ຕິດຢູ່ກ່ອງລະບຸວ່າ: ສິນຄ້າເຫລົ່ານີ້ຖືກສົ່ງໄປຈາກ 2 ບໍລິສັດໃນນີເຊຣີ ສົ່ງທາງເຮືອບິນເຖິງຮ່າໂນ້ຍ ນັບແຕ່ວັນທີ 21 ກັນຍາ ແຕ່ຮອດປັດຈຸບັນນີ້ຍັງບໍ່ມີຜູ້ໃດໄປຮັບ ໂດຍເຈົ້າໜ້າທີ່ກ່າວວ່າ: ຜູ້ຮັບຕາມທີ່ລະບຸໃນໃບສົ່ງສິນຄ້າ ປະຕິເສດຈະຮັບສິນຄ້າຊຸດນີ້.
ໂຕຫລິ່ນເປັນຂອງມີຄ່າໃນຫວຽດນາມ ແລະ ພາກພື້ນ, ປະຊາຊົນນິຍົມບໍລິໂພກຊີ້ນຂອງມັນ ສ່ວນເກັດເຊື່ອກັນວ່າມີສັບພະຄຸນເປັນຢາປິ່ນປົວ.
