ອິນໂດເນເຊຍ ຂໍການຊ່ວຍເຫລືອ ຈາກບັນດາປະເທດໃນເຫດສຶນາມິ
ປະທານາທິບໍດີ ໂຈໂຄ ວິໂດໂດ ຜູ້ນຳອິນໂດເນເຊຍ ປະກາດຮັບການຊ່ວຍເຫລືອຈາກຕ່າງປະເທດ, ຫລັງເກີດເຫດທໍລະນີພິບັດໄພຢູ່ເກາະສຸລາເວສີ ຂ້າຊີວິດປະຊາຊົນຫລາຍກວ່າ 800 ຄົນ.
ສຳນັກຂ່າວຕ່າງປະເທດລາຍງານວ່າ: ທ່ານ ໂທມັດ ເອມບອງ ປະທານຄະນະກຳມະການປະສານງານດ້ານການລົງທຶນແຫ່ງຊາດຂອງອິນໂດເນເຊຍ ກ່າວວ່າ: ປະທານາທິບໍດີ ໂຈໂຄ ວິໂດໂດ ອະນຸມັດຄຳສັ່ງໃຫ້ເປີດຮັບການຊ່ວຍເຫລືອຈາກຕ່າງປະເທດ ໃນການຊ່ວຍເຫລືອປະຊາຊົນຢູ່ເກາະສຸລາເວສີ ເຊິ່ງກຳລັງເດືອດຮ້ອນຢ່າງໜັກ ຫລັງເກີດແຜ່ນດິນໄຫວຮຸນແຮງ 7,5 ແມກນິຈູດ ຕາມດ້ວຍສຶນາມິ ໃນວັນທີ 28 ກັນຍາຜ່ານມາ.
AFTERMATH: The coastline of Palu, Indonesia is seen buried under debris after a tsunami hit the city in the wake of a powerful 7.5 magnitude earthquake that rocked the region. The two events are reportedly responsible for more than 800 deaths. https://t.co/VedwnLVo78 pic.twitter.com/q9qHsTRR5G
— ABC News (@ABC) October 1, 2018
ຂະນະທີ່ທ່ານ ຊູໂຕໂປ ປູໂວ ນູໂກຣໂຮ ໂຄສົກສຳນັກງານບໍລິຫານຈັດການໄພພິບັດແຫ່ງຊາດ (BNPB) ຍອມຮັບວ່າ: ນອກຈາກສິ່ງຂອງເພື່ອການອຸປະໂພກ ແລະ ບໍລິໂພກທີ່ຈຳເປັນແລ້ວ ສິ່ງທີ່ຂາດເຂີນຢ່າງໜັກໃນຕອນນີ້ຄືເຄື່ອງມື ແລະ ອຸປະກອນສຳລັບການຂຸດເຈາະ ໂດຍທຸກຝ່າຍເຊື່ອວ່າຜູ້ສູນຫາຍອີກຈຳນວນຫລາຍຍັງຕິດຢູ່ພາຍໃຕ້ຊາກຫັກພັງຂອງອາຄານ, ແຕ່ຂະບວນການຊ່ວຍເຫລືອເປັນໄປຢ່າງລຳບາກ ດ້ວຍຂໍ້ຈຳກັດດ້ານເຄື່ອງມື ແລະ ອຸປະກອນ.
ສຳລັບຈຳນວນຜູ້ເສຍຊີວິດຈາກເຫດທໍລະນີພິບັດໄພມີຢ່າງໜ້ອຍ 832 ຄົນ, ແຕ່ມີຄວາມເປັນໄປໄດ້ສູງທີ່ຈະເພີ່ມຂຶ້ນອີກ ເຊິ່ງເຈົ້າໜ້າທີ່ບາງສ່ວນເລີ່ມກຽມການປັບພື້ນທີ່ບາງແຫ່ງຢູ່ເກາະສຸລາເວສີໃຫ້ເປັນສຸສານຂະໜາດໃຫຍ່ ເພື່ອກຽມຝັງສົບຜູ້ເສຍຊີວິດ ເຊິ່ງມີການຄົ້ນພົບຢ່າງຕໍ່ເນື່ອງ.
ທັງນີ້, ບັນດາປະເທດຮ່ວມກັນຕິດຕັ້ງລະບົບເຝົ້າລະວັງ ແລະ ເຕືອນໄພການເກີດສຶນາມິທົ່ວມະຫາສະໝຸດປາຊີຟິກ ຫລັງເກີດແຜ່ນດິນໄຫວຮຸນແຮງ 9,1 ແມກນິຈູດ ນອກຝັ່ງທາງຕອນເໜືອຂອງເກາະສຸມາດຕາ ໃນອິນໂດເນເຊຍ ໃນວັນທີ 26 ທັນວາ 2004 ສົ່ງໃຫ້ເກີດສຶນາມິຂະໜາດຍັກພັດເຂົ້າສູ່ແຄມຝັ່ງຂອງ 14 ປະເທດ ມີຜູ້ເສຍຊີວິດລວມກັນຫລາຍກວ່າ 227.000 ຄົນ ໂດຍໃນຈຳນວນນີ້ປະມານ 120.000 ຄົນເປັນຜູ້ເສຍຊີວິດທີ່ພົບໃນອິນໂດເນເຊຍ, ແຕ່ໃນກໍລະນີຂອງສຶນາມິທີ່ເມືອງສຸລາເວສີໃນຄັ້ງນີ້ໄດ້ຮັບສຽງວິຈານຢ່າງໜັກຈາກຫລາຍຝ່າຍ ຫລັງມີລາຍງານວ່າສຶນາມິພັດເຂົ້າຝັ່ງພາຍໃນເວລາພຽງ 34 ນາທີຫລັງຍົກເລີກການເຕືອນໄພ.
