ຂົວມິດຕະພາບ I ຈະເປີດນໍາໃຊ້ລະບົບເກັບຄ່າທຳນຽມຜູ້ໂດຍສານ ແລະ ພາຫະນະແບບເອເລັກໂຕຣນິກເລີ່ມແຕ່ເດືອນຕຸລານີ້
ເພື່ອຄວາມສະດວກສະບາຍ ແລະ ເພີ່ມຄວາມໂປ່ງໃສ່ໃນການຈັດເກັບລາຍຮັບເຂົ້າງົບປະມານ, ກົມພາສີກະ ຊວງການເງິນຮ່ວມກັບທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ຈະເປີດນຳໃຊ້ທົດລອງໂຄງການພັດທະນາລະບົບການຈັດເກັບຄ່າທຳນຽມຜູ້ໂດຍສານ ແລະ ພາຫະນະແບບເອເລັກໂຕຣນິກ (Smart VAT) ໃນໄລຍະທີ 2 ໃນກາງເດືອນຕຸລານີ້ ແລະ ຈະເປີດນໍາໃຊ້ຢ່າງເປັນທາງການໃນທ້າຍເດືອນທັນວາ 2018 ທີ່ດ່ານພາສີສາກົນຂົວມິດຕະພາບ I, ໃນເບື້ອງຕົ້ນຈະໄດ້ຕິດຕັ້ງຕູ້ບໍລິການອັດຕະໂນມັດ (Kiosk) ທັງຂາເຂົ້າ-ຂາອອກ ຈຳນວນ 10 ຕູ້ເພື່ອຄິດໄລ່–ຮັບຊຳລະຄ່າທຳນຽມຜູ້ໂດຍສານ–ພາຫະນະທີ່ເດີນທາງເຂົ້າ–ອອກປະເທດ.
ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ ກະຊວງການເງິນ ໃຫ້ສໍາພາດວ່າ: ປັດຈຸບັນວຽກງານການຫັນເປັນທັນສະໄໝຂອງຂະແໜງພາສີີີີໄດ້ມີການພັດທະນາຢ່າງຕໍ່ເນື່ຶອງ, ອັນທີ່ພົ້ນເດັ່ນໄດ້ມີການຈັດຕັ້ງລະບົບຄຸ້ມຄອງການແຈ້ງພາສີແບບເອເລັກໂຕຣນິກ, ເລີ່ມແຕ່ປີ 2011 ມາຮອດປັດຈຸບັນໃນທົ່ວປະເທດສາມາດຕິດຕັ້ງໄດ້ແລ້ວທັງໝົດ 24 ດ່ານພາສີສາກົນ, ໄປຄຽງຄູ່ກັບການນໍາໃຊ້ລະບົບດັ່ງກ່າວ, ກົມພາສີໄດ້ຮ່ວມກັບທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ພັດທະນາລະບົບ Smart TAX ຂຶ້ນມາເພື່ອເປັນລະບົບຊໍາລະພາສີອາກອນແບບເອເລັກໂຕຣນິກກໍ່ຄືການນໍາໃຊ້ບັດ Smart TAX ເພື່ອສ້າງຄວາມສະດວກສະບາຍໃຫ້ແກ່ຜູ້ປະກອບການ, ທີ່ສໍາຄັນໄດ້ມີການຕິດຕັ້ງລະບົບ Asycuda ເພື່ອຕິດຕາມການນໍາເຂົ້ານໍ້າມັນເຊື້ອໄຟຢູ່ 4 ດ່ານສາກົນທົ່ວປະເທດແລ້ວ.
ນອກຈາກນັ້ນ, ຍັງໄດ້ມີການພັດທະນາໂຄງການລະບົບການແຈ້ງພາສີປະຕູດຽວແຫ່ງຊາດ (national single window) ໂດຍເບື້ອງຕົ້ນຈະໄດ້ເລີ່ມທົດລອງຢູ່ດ່ານສາກົນຂົວມິດຕະພາບ 1 ແລະ ເລືອກເອົາລາຍການພາຫະນະເປັນການທົດລອງ, ພ້ອມທັງໄດ້ສໍາເລັດການເຊັນຂໍ້ຕົກລົງຮ່ວມກັນລະຫວ່າງກົມພາສີ ກະຊວງການເງິນກັບກົມຂົນສົ່ງ ກະຊວງ ຍທຂ, ກົມການນໍາເຂົ້າ-ສົ່ງອອກ ກະຊວງອຸດສາຫະກໍາ ແລະ ການຄ້າ. ທັງນີ້ກໍ ເພື່ອແນ່ໃສ່ການເຊື່ອມໂຍງລະບົບການອອກອະນຸຍາດຂອງຂະແໜງການກ່ຽວຂ້ອງໃຫ້ເຂົ້າກັບລະບົບການແຈ້ງພາສີ ຫຼື ລະບົບອາຊີກູດາ ເພື່ອເຮັດໃຫ້ການແຈ້ງພາສີການນໍາເຂົ້າ-ສົ່ງອອກສິນຄ້າມີຄວາມສະດວກວ່ອງໄວ, ທັງເປັນການເຊື່ອມໂຍງກັບສາກົນໃນຂັ້ນຕໍ່ໄປ.
ຈາກຜົນສຳເລັດດັ່ງກ່າວກົມພາສີ ແລະ ທຄຕລ ໄດ້ເຊັນສັນຍາຮ່ວມມືກັນໃນໂຄງການພັດທະນາລະບົບການຈັດອາ ກອນມູນຄ່າເພີ່ມ 10% (Smart VAT ໄລຍະທີ1 ) ຈາກການນໍາເຂົ້າເຄື່ອງຕິດຕົວຜູ້ໂດຍສານທີ່ຜ່ານດ່ານພາສີສາກົນຂົວມິດຕະພາບ 1 ໄດ້ຈັດຕັ້ງປະຕິບັດນັບແຕ່ວັນທີ 1 ພະຈິກ 2016 ເປັນຕົ້ນມາ ແລະ ເພື່ອເປັນການສືບຕໍ່ການຮ່ວມມືດັ່ງກ່າວ, ກົມພາສີ ແລະ ທຄຕລໄດ້ຕົກລົງເຫັນດີເປັນເອກະພາບກັນກໍານົດການເຊັນສັນຍາຮ່ວມມືກັນໃນໂຄງການພັດທະນາລະບົບການຈັດເກັບຄ່າທຳນຽມຜູ້ໂດຍສານ ແລະ ພາຫະນະແບບເອເລັກໂທຣນິກ (Smart VAT ໄລຍະທີ 2) ຊຶ່ງໂຄງການດັ່ງກ່າວ, ແນໃສ່ການຈັດເກັບລາຍຮັບຄ່າທຳນຽມຜູ້ໂດຍສານ-ພາຫະນະຂາເຂົ້າ-ຂາອອກ ແລະ ຄ່າທຳນຽມອື່ນໆທີ່ເດີນທາງເຂົ້າ-ອອກປະເທດມີຄວາມສະດວກສະບາຍກວ່າເກົ່າ.
ທ່ານຮັກສາການຫົວໜ້າກົມພາສີ ກະຊວງການເງິນ ບຸນປະເສີດ ສີກຸນລະບຸດ ເນັ້ນຕື່ມວ່າ: ປັດຈຸບັນທີ່ດ່ານພາສີສາກົນຂົວມິດຕະພາບ 1 ສະເລ່ຍແຕ່ລະວັນ, ມີຜູ້ໂດຍສານເດີນທາງຂາເຂົ້າມີປະມານ 700 ກວ່າຄົນ, ພາຫະນະ (ປະເພດລົດບັນທຸກ) ປະມານ 500 ຄັນ, ສ່ວນການເດີນທາງຂາອອກຂອງຜູ້ໂດຍສານ 1.800 ຄົນ, ພາຫະນະ (ປະເພດລົດເບົາ) ປະມານ 782 ຄັນ/ວັນ, ຖ້າເປັນວັນພັກລັດຖະການ ຫຼື ມື້ທີ່ມີເທດສະການຕ່າງໆປະລິ ມານຜູ້ໂດຍສານ ຫຼື ລົດສ່ວນໂຕແມ່ນເພີ່ມຂຶ້ນເທົ່າຕົວ.
ສະນັ້ນ, ກົນໄກໃນການຄຸ້ມຄອງການຈັດເກັບລາຍຮັບ ແລະ ການຄຸ້ມຄອງພາຫະນະເຂົ້າ-ອອກ, ການໃຫ້ບໍລິການຊັກຊ້າ, ໃຊ້ເວລາດົນ ແລະ ບັນຫາອື່ນໆທີ່ຕິດພັນກັບວຽກງານຂະ ແໜງພາສີເຮັດໃຫ້ມີຫາງສຽງຈົ່ມວ່າຂອງສັງຄົມ ໂດຍສະເພາະແມ່ນການຈັດເກັບລາຍຮັບຍັງເກັບເປັນເງິນສົດເປັນຕົ້ນ: ຄ່າທໍານຽມຕ່າງໆ.
ສະນັ້ນ, ເພື່ອໃຫ້ຫຼຸດຜ່ອນຂັ້ນຕອນຕ່າງໆເຮັດໃຫ້ຜູ້ໂດຍສານລວມເຖິງສິນຄ້າເຄື່ອງຂອງຕ່າງໆໃນເວລາເດີນທາງເຂົ້າ-ອອກດ່ານ, ຮັບປະກັນການອໍານວຍຄວາມສະດວກ ແລະ ຮັບປະກັນກົນໄກໃນການຄຸ້ມຄອງ, ຈຶ່ງໄດ້ນໍາສະເໜີຕໍ່ກະຊວງການເງິນ ສືບຕໍ່ລະບົບ Smart VAT ໃນໄລຍະທີ 2 ເພື່ອເປັນການອໍານວຍຄວາມສະດວກແກ່ຜູ້ໂດຍສານເຂົ້າ-ອອກມີຄວາມວ່ອງໄວ ແລະ ຍັງເປັນການຊ່ວຍຫຼຸດຜ່ອນຄວາມແອອັດ, ທີ່ສໍາຄັນຈະເຮັດໃຫ້ເກັບເງິນເຂົ້າງົບປະມານຄົບຖ້ວນ, ບໍ່ຮົ່ວໄຫຼ, ປະຊາຊົນທີ່ມາບໍລິການມີຄວາມເຊື່ອໝັ້ນ ແລະ ຍັງເປັນການສ້າງໃບໜ້າອັນໃໝ່ທີ່ທັນສະໄໝຂອງວຽກງານຈັດເກັບລາຍຮັັບຂອງຂະແໜງພາສີ ນຳອີກດ້ວຍ.
