ໝາກຜົນແຫ່ງການຊີ້ນຳ-ນໍາພາວຽກງານຂອງອົງຄະນະພັກທະນາຄານ
(ເນື່ອງໃນໂອກາດວັນສ້າງຕັ້ງ ທຫລ ຄົບຮອບ 50 ປີ 07 ຕຸລາ 1968-07 ຕຸລາ 2018)
ຄະນະພັກທະນາຄານແຫ່ງ ສປປ ລາວ (ທຫລ) ເປັນອົງຄະນະພັກເອກະລາດທີ່ແຍກມາຈາກອົງຄະນະພັກ ກະຊວງການເງິນ-ທະນາຄານ ເມື່ອປີ 2006 ຕາມມະຕິຕົກລົງຂອງກົມການເມືອງສູນກາງພັກ, ເປັນເສນາທິການໃຫ້ແກ່ກົມການເມືອງສູນກາງພັກ ແລະ ລັດຖະບານໃນການຊີ້ນໍາ-ນໍາພາຮອບດ້ານຢູ່ຂະແໜງການທະນາຄານ ເພື່ອຮັບປະກັນການປະຕິບັດພາລະບົດບາດ, ໜ້າທີ່ການເມືອງຂອງຂະແໜງການທະນາຄານ ເຊິ່ງເວລານັ້ນມີສະມາຊິກພັກທັງໝົດ 291 ສະຫາຍ, ຍິງ 102 ສະຫາຍ; ປະກອບມີ 3 ໜ່ວຍຄະນະພັກຮາກຖານ, ກອງປະຊຸມໃຫຍ່ຄັ້ງທຳອິດຂອງອົງຄະນະພັກດັ່ງກ່າວໄດ້ຈັດຂຶ້ນເມື່ອທ້າຍເດືອນຕຸລາ 2006; ຄັ້ງທີ II ຈັດຂຶ້ນໃນວັນທີ 16 ທັນວາ 2010 ແລະ ຄັ້ງທີ III ໄດ້ຈັດຂຶ້ນໃນລະຫວ່າງວັນທີ 7-8 ພຶດສະພາ 2015 ມີຜູ້ແທນເຂົ້າຮ່ວມ 113 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ 638 ສະຫາຍ, ທຽບໃສ່ກອງປະຊຸມຄັ້ງທີ II ເພີ່ມຂຶ້ນ 21%.
ຕະຫລອດໄລຍະເວລາ 50 ປີຜ່ານມາ, ຄະນະພັກ ທຫລ ໄດ້ເອົາໃຈໃສ່ປັບປຸງກໍ່ສ້າງຕົນເອງ ໂດຍຖືເອົາການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານເປັນໃຈກາງ ເຊິ່ງຜ່ານການຕີລາຄາໃນແຕ່ລະປີ ສາມາດຮັບຮອງໜ່ວຍພັກເຂັ້ມແຂງ-ຮູ້ນຳພາຮອບດ້ານກວມ 60% ຂອງໜ່ວຍພັກທັງໝົດ ແລະ ມີສະມາຊິກພັກຖືກຈັດໃນປະເພດແຂງຂຶ້ນໄປກວມ 90% ຂອງຜູ້ທີ່ໄດ້ຮັບການຕີລາຄາ; ສາມາດສ້າງຕັ້ງໜ່ວຍພັກຮາກຖານໃໝ່ຕື່ມອີກ 2 ໜ່ວຍ ພ້ອມໄດ້ປັບປຸງການຈັດຕັ້ງພັກຢູ່ 24 ຮາກຖານ ແລະ ຊຸກຍູ້ແຕ່ລະຮາກຖານພັກດຳເນີນກອງປະຊຸມສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ເພື່ອວາງທິດທາງແຜນການດຳເນີນງານໃນແຕ່ລະປີ; ສຸມໃສ່ອອກບັດ-ມອບບັດໃຫ້ສະມາຊິກພັກສົມບູນຢ່າງທົ່ວເຖິງ, ວຽກງານຂະຫຍາຍພັກໄດ້ຮັບການປັບປຸງດີຂຶ້ນ ແລະ ກ້າວໄປສູ່ຄຸນນະພາບຢ່າງແທ້ຈິງ ເຊິ່ງສາມາດເລືອກເຟັ້ນ ແລະ ກໍ່ສ້າງມະຫາຊົນທີ່ພົ້ນເດັ່ນໄດ້ 152 ສ/ຫ ແລະ ຂະຫຍາຍເຂົ້າພັກໄດ້ 225 ສ/ຫ ບັນດາຮາກຖານພັກໄດ້ເພີ່ມຈາກ 50 ຮາກຖານ ເປັນ 53 ຮາກຖານ ແລະ ສະມາຊິກພັກເພີ່ມຈາກ 638 ສ/ຫ ມາເປັນ 815 ສ/ຫ.
ໃນປີ 2017 ຜ່ານມານີ້ ໄດ້ດຳເນີນຊີວິດການເມືອງປັບປຸງປົວແປງພັກນັບແຕ່ຂັ້ນຄະນະພັກ ທຫລ ຈົນເຖິງຄະນະໜ່ວຍພັກຢ່າງທົ່ວເຖິງ ເພື່ອເປັນພື້ນຖານໃນການປັບປຸງແກ້ໄຂໃຫ້ດີຂຶ້ນໃນຕໍ່ໜ້າ; ດ້ານແບບແຜນການນຳພາຂອງພັກ ໄດ້ຫັນເອົາມະຕິກອງປະຊຸມໃຫຍ່ ຄັ້ງທີ III ຂອງຕົນ ກໍຄືມະຕິ X ຂອງພັກມາເປັນ 7 ແຜນງານ 58 ໂຄງການ ເພື່ອນຳພາຈັດຕັ້ງປະຕິບັດຕິດພັນກັບການກຳນົດແຜນຍຸດທະສາດເງິນຕາ; ຄະນະພັກແຕ່ລະຂັ້ນໄດ້ແບ່ງງານ-ແບ່ງຄວາມຮັບຜິດຊອບໃຫ້ກັນຢ່າງລະອຽດຈະແຈ້ງ; ປະຕິບັດລະບອບປະຊຸມສ່ອງແສງລາຍງານຢ່າງເປັນປົກກະຕິ ຕິດພັນກັບການດຳເນີນກອງປະຊຸມເປີດກວ້າງຄະນະພັກ ທຫລ 2 ຄັ້ງຕໍ່ປີ ແລະ ການຊີ້ນຳ-ນຳພາຢູ່ແຕ່ລະຂັ້ນ ບົນພື້ນຖານຫຼັກການນຳພາ-ແບບແຜນວິທີເຮັດວຽກຂອງພັກ, ການເຄື່ອນໄຫວວຽກງານໄດ້ສອດຄ່ອງກັບແນວທາງນະໂຍບາຍ, ລະບຽບກົດໝາຍກ່ຽວຂ້ອງເປັນຢ່າງດີ; ມີຫົວຄິດປະດິດສ້າງ, ກ້າຄິດ-ກ້າເຮັດ-ກ້າຮັບຜິດຊອບ ແລະ ການຕຳນິຕິຊົມຕົນເອງ ແລະ ຕິຊົມກັນໄດ້ຮັບການຍົກສູງຫຼາຍຂຶ້ນ.
ພ້ອມນັ້ນ ຍັງປັບປຸງສັບຊ້ອນ-ຈັດວາງແຕ່ລະຂັ້ນຢູ່ ທຫລ ແລະ ທະນາຄານລັດມີຫຼາຍຕຳແໜ່ງງານ ພ້ອມທັງບັນຈຸພະນັກງານໃໝ່ຕາມຄວາມຕ້ອງການວຽກງານ; ປະຕິບັດນະໂຍບາຍ-ຍ້ອງຍໍຕໍ່ບຸກຄົນແລະ ກົມກອງທີ່ມີຜົນງານດີເດັ່ນໃນການເຮັດໜ້າທີ່ໄດ້ເປັນຢ່າງດີ; ນຳພາອົງການຈັດຕັ້ງມະຫາຊົນແຕ່ລະຂັ້ນເຄື່ອນໄຫວຕາມພາລະບົດບາດຂອງຕົນຢ່າງຕັ້ງໜ້າ ໂດຍສະເພາະເປັນເຈົ້າການຊ່ວຍຂັ້ນເທິງໃນການເຕົ້າໂຮມຄວາມສາມັກຄີ ແລະ ສ້າງຂະບວນການຕ່າງໆຢ່າງເປັນປົກກະຕິ; ປັບປຸງການຈັດຕັ້ງຂອງແຕ່ລະອົງການໃຫ້ເຂັ້ມແຂງ ແລະ ສອດຄ່ອງກັບລະບຽບການ; ເອົາໃຈໃສ່ຊີ້ນຳ-ນຳພາວຽກງານກວດກາຮອບດ້ານ ສາມາດແກ້ໄຂປາກົດການຫຍໍ້ທໍ້ໄດ້ດີສົມຄວນ; ມີການພົວພັນຮ່ວມມືກັບອົງການຈັດຕັ້ງມະຫາຊົນຂອງທະນາຄານກາງປະເທດເພື່ອນມິດຍຸດທະສາດ. ນອກນີ້ ຍັງປັບປຸງວຽກງານປ້ອງກັນພາຍໃນໃຫ້ເຂັ້ມແຂງ; ຍົກສູງຄວາມຮັບຜິດຊອບຂອງຖັນແຖວສະມາຊິກພັກ-ພະນັກງານ ປະກອບສ່ວນປ້ອງກັນເວນຍາມ ແລະ ແກ້ໄຂບັນຫາຫຍໍ້ທໍ້ໃຫ້ຫຼຸດໜ້ອຍຖອຍລົງເປັນກ້າວໆ.
ຜ່ານການຊີ້ນຳ-ນຳພາຂອງອົງຄະນະພັກ ທຫລ ໃນໄລຍະຜ່ານມາ ເຮັດໃຫ້ສະພາບແນວຄິດພະນັກງານ-ສະມາຊິກພັກມີການຫັນປ່ຽນທີ່ຕັ້ງໜ້າດີຂຶ້ນ, ຫ້າວຫັນປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ ແລະ ມີຜົນສຳເລັດເປັນຢ່າງດີ; ການປັບປຸງກໍ່ສ້າງພັກໄດ້ກ້າວເຂົ້າສູ່ຄຸນນະພາບຢ່າງແທ້ຈິງ ເຮັດໃຫ້ພາຍໃນພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ; ຄະນະພັກຂັ້ນຕ່າງໆໄດ້ເປັນແກ່ນສານນຳພາໃນແຕ່ລະວຽກງານມີຄວາມເຕີບໃຫຍ່ເຂັ້ມແຂງ, ຮັບປະກັນດ້ານຄຸນນະພາບ; ໂຄງປະກອບບຸກຄະລາກອນໃນແຕ່ລະຕຳແໜ່ງງານ ແລະ ຫັນເປັນໜຸ່ມ; ພະນັກງານສ່ວນຫຼາຍມີຄວາມຮູ້-ຄວາມສາມາດດ້ານທິດສະດີການເມືອງ, ວິຊາສະເພາະໃນລະດັບທີ່ແນ່ນອນ; ກົງຈັກການຈັດຕັ້ງແຕ່ລະຂັ້ນກະທັດຮັດ, ເຂັ້ມແຂງ ແລະ ເຄື່ອນໄຫວມີປະສິດທິຜົນດີຂຶ້ນ ແລະ ກົນໄກການບໍລິຫານຄຸ້ມຄອງມີຄວາມຄ່ອງຕົວກວ່າເກົ່າ ສາມາດຈັດຕັ້ງປະຕິບັດໜ້າທີ່ວິຊາສະເພາະຂອງທະນາຄານມີຜົນສໍາເລັດສູງຂຶ້ນເປັນກ້າວໆ.
