ລາວຍັງຕ້ອງການຊ່ວຍເຫລືອຫລາຍດ້ານຫລັງເກີດໄພພິບັດທໍາມະຊາດ

ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ປະທານຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ໄດ້ລາຍງານຕໍ່ກອງປະຊຸມປຶກສາຫາລືການປະເມີນຜົນຄວາມຕ້ອງການພາຍຫລັງເກີດໄພພິບັດທໍາມະຊາດໃນລາວປີ 2018, ໂດຍມີຫົວໜ້າອົງການສະຫະປະຊາຊາດເພື່ອການພັດທະນາປະຈໍາລາວ, ຫົວໜ້າທະນາຄານໂລກປະຈໍາລາວ, ເອັກອັກຄະລັດຖະທູດສະຫະພາບເອີຣົບປະຈໍາລາວ ແລະ ຄູ່ຮ່ວມງານສາກົນຕ່າງໆເຂົ້າຮ່ວມກອງປະຊຸມດັ່ງກ່າວ ວ່າ: ໄພທໍາມະຊາດທີ່ເກີດຂຶ້ນໃນປີນີ້, ໄດ້ສົ່ງຜົນກະທົບຮ້າຍແຮງຕໍ່ຊີວິດ ແລະ ຊັບສິນຂອງປະຊາຊົນ, ພ້ອມທັງ ໂຄງລ່າງພື້ນຖານທາງດ້ານເສດຖະກິດ-ສັງຄົມ ແລະ ສິ່ງແວດລ້ອມເສຍຫາຍຈໍານວນຫລາຍ, ມີ 17 ແຂວງ ແລະ ນະຄອນຫລວງວຽງຈັນ, ໃນນັ້ນມີ 115 ເມືອງ, 2.409 ບ້ານ, 131.507 ຄອບຄົວ, ໄດ້ຮັບຜົນກະທົບ, ມີຜູ້ເສຍຊີວິດ 55 ຄົນ ແລະ ສູນຫາຍ 35 ຄົນ (ຢູ່ແຂວງອັດຕະປື 32 ຄົນ ແລະ ຫລວງພະບາງ 3 ຄົນ) ແລະ ມີປະຊາຊົນ 3.610 ກວ່າຄອບຄົວຕ້ອງໄດ້ຍົກຍ້າຍໄປຢູ່ບ່ອນປອດໄພຊົ່ວຄາວ, ເສັ້ນທາງ 644 ເສັ້ນ ແລະ ຂົວ 49 ແຫ່ງຖືກເປ່ເພ, ເນື້ອທີ່ການຜະລິດກວ່າ 90.660 ເຮັກຕາໄດ້ຮັບຜົນເສຍຫາຍ, ລະບົບຊົນລະປະທານ 778 ແຫ່ງເປ່ເພ, ມີໂຮງຮຽນ 300 ກວ່າຫລັງ, ສຸກສາລາ 35 ແຫ່ງ, ລະບົບນ້ຳລິນ 119 ແຫ່ງ, ນ້ຳບາດານ 5.910 ຈຸດ, ນ້ຳສ້າງ 7.130 ກວ່າແຫ່ງ ແລະ ເສົາໄຟຟ້າ 915 ຕົ້ນໄດ້ຮັບຄວາມເສຍຫາຍ. ໃນນີ້ໜັກກວ່າໝູ່ແມ່ນເຫດການນໍ້າຖ້ວມຢູ່ເມືອງສະໜາມໄຊແຂວງອັດຕະປື ແລະ ມາຮອດປັດຈຸບັນແມ່ນຍັງບໍ່ສາມາດປະເມີນຄວາມເສຍຫາຍໄດ້ທັງໝົດ ແລະ ຜ່ານມາເຖິງວ່າໄດ້ມີບຸກຄົນ, ນິຕິບຸກຄົນ ແລະ ອົງການຈັດຕັ້ງຕ່າງໆທັງພາຍໃນ ແລະ ຕ່າງປະເທດ ໄດ້ໃຫ້ການຊ່ວຍເຫລືອເບື້ອງຕົ້ນເປັນຈໍານວນຫລວງຫລາຍກໍຕາມ ແຕ່ເມື່ອທຽບກັບຄວາມເສຍຫາຍຕົວຈິງແລ້ວແມ່ນເຫັນວ່າຍັງຕ້ອງການຄວາມຊ່ວຍເຫລືອເປັນຈໍານວນຫລາຍ ເພື່ອແກ້ໄຂ ແລະ ຟື້ນຟູຜົນກະທົບທັງໃນສະເພາະໜ້າ ແລະ ຍາວນານ ເພື່ອເຮັດໃຫ້ຊີວິດການເປັນຢູ່ຂອງຜູ້ປະສົບໄພກັບຄືນສູ່ສະພາບປົກກະຕິ.

ໃນກອງປະຊຸມຄັ້ງນີ້, ແນໃສ່ແລກປ່ຽນຂໍ້ມູນຂ່າວສານ ລວມເຖິງການກໍານົດແຜນດໍາເນີນງານການປະເມີນຄວາມຕ້ອງການຫລັງໄພພິບັດ (PDNA) ເພື່ອຫາຂໍ້ມູນສະພາບຄວາມເສຍຫາຍ ແລະ ແຜນຄວາມຕ້ອງການຟື້ນຟູຫລັງໄພພິບັດໃນໄລຍະສັ້ນ, ກາງ ແລະ ຍາວນານ ລວມທັງຄວາມຕ້ອງການດ້ານງົບປະມານ ແລະ ໄລຍະເວລາຈັດຕັ້ງປະຕິບັດ, ຊຶ່ງແຜນຄວາມຕ້ອງການທີ່ເປັບຸລິມະສິດດັ່ງກ່າວນີ້, ຈະໄດ້ນໍາສະເໜີຕໍ່ກອງປະຊຸມລັດຖະບານ ແລະ ກອງປະຊຸມໂຕະມົນທີ່ຈະມີຂຶ້ນໃນລະເດືອນພະຈິກທີ່ຈະເຖິງນີ້.