ຜູ້ນໍາໃຊ້ສື່ສັງຄົມອອນລາຍໃນລາວກວມ 35% ຂອງປະຊາກອນ
ປັດຈຸບັນ, ການນໍາໃຊ້ສື່ສັງຄົມອອນລາຍໃນ ສປປ ລາວ ມີເຖິງ 2,4 ລ້ານບັນຊີ ເທົ່າກັບ 35% ຂອງພົນລະເມືອງລາວທັງໝົດ, ໃນນັ້ນ 2,2 ລ້ານບັນຊີ ແມ່ນນຳໃຊ້ຜ່ານໂທລະສັບມືຖືສະມາດໂຟນ (Smart Phone).
ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ກ່າວໃນກອງປະຊຸມສຳມະນາວິທະຍາສາດພາຍໃຕ້ຫົວຂໍ້: “ການຄຸ້ມຄອງ, ການນຳໃຊ້ ແລະ ພັດທະນາສື່ໃນໄລຍະໃໝ່” ໃນວັນທີ 24 ກັນຍານີ້ວ່າ: ຈາກສະຖິຕິເດືອນມັງກອນ 2018 ມີຜູ້ນຳໃຊ້ເຟສບຸກ (Facebook) ໃນ ສປປ ລາວ ເຖິງ 2,4 ລ້ານບັນຊີ. ໃນນັ້ນ, ນໍາໃຊ້ຜ່ານໂທລະສັບມືຖືກວມ 92%, ເຊິ່ງໝາຍຄວາມວ່າຄົນລາວທີ່ນຳໃຊ້ສື່ສັງຄົມອອນລາຍແຕ່ລະຄົນແມ່ນມີບັນຊີ Facebook, ໂຕເລກດັ່ງກ່າວນີ້ ເພີ່ມຂຶ້ນເຖິງ 600.000 ບັນຊີໃນໄລຍະພຽງແຕ່ 1 ປີທີ່ຜ່ານມາ.
ປັດຈຸບັນ, ໃນໂລກເຮົາ ສື່ສັງຄົມອອນລາຍທີ່ຖືກນຳໃຊ້ຫລາຍກວ່າໝູ່ແມ່ນ Facebook, ເຊິ່ງຕາມສະຖິຕິໃນເດືອນມັງກອນ 2018 ແມ່ນມີປະມານ 2.167 ລ້ານບັນຊີ, ອັນດັບ 2 ແມ່ນ YouTube 1.500 ລ້ານບັນຊີ, ອັນດັບ 3 ແລະ 4 ແມ່ນ WhatsApp ແລະ Messenger 1.300 ລ້ານບັນຊີ, ອັນດັບທີ 5 ແລະ 6 ແມ່ນ Wechat ແລະ QQ ຂອງ ສປ ຈີນ.
ເມື່ອເບິ່ງໃນ ສປປ ລາວ, 2 ອັນດັບແອັບພລິເຄຊັນສື່ສັງຄົມອອນລາຍ ແລະ ສົ່ງຂໍ້ຄວາມທີ່ໃຊ້ຫລາຍກວ່າໝູ່ແມ່ນ Facebook ແລະ WhatsApp ຕາມລຳດັບ.
ຂະແໜງການໂທລະຄົມມະນາຄົມ ກໍເປັນຂະແໜງການໜຶ່ງທີ່ສຳຄັນໃນການປະກອບສ່ວນສ້າງລາຍຮັບແຫ່ງຊາດ, ປັດຈຸບັນ, ໂທລະຄົມມະນາຄົມ ແລະ ໄອຊີທີ ຖືກນຳໃຊ້ເຂົ້າໃນວຽກງານຂອງທຸກຂະແໜງການນັບມື້ຫລາຍຂຶ້ນ, ເພື່ອອໍານວຍຄວາມສະດວກໃນການຕິດຕໍ່ສື່ສານ, ການແລກປ່ຽນຂໍ້ມູນຂ່າວສານ, ການຄ້າ, ທຸລະກິດ ແລະ ອື່ນໆ ບໍ່ວ່າຈະເປັນການຊຳລະພາສີອາກອນ, ຊຳລະຄ່າໃຊ້ຈ່າຍ, ການຊື້-ຂາຍອອນລາຍ ແລະ ວຽກງານອື່ນໆຢ່າງມີປະສິດທິຜົນ.
