ມອບ-ຮັບໜ້າທີ່ຜູ້ອໍານວຍການລັດວິສາຫະກິດການບິນລາວ
September 24, 2018 - 10:25 PM
ພິທີມອບ-ຮັບໜ້າທີ່ຜູ້ອໍານວຍການລັດວິສາຫະກິດການບິນລາວລະຫວ່າງທ່ານ ສົມພອນ ດວງດາລາ ອຳນວຍການລັດວິສາຫະກິດການບິນລາວຜູ້ເກົ່າທີ່ຈະໄປຢູ່ຫ້ອງການກະຊວງໂຍທາທິການ ແລະ ຂົນສົ່ງ ແລະ ທ່ານ ບຸນມາ ຈັນທະວົງສາ ອຳນວຍການລັດວິສາຫະກິດການບິນລາວຜູ້ໃໝ່, ໄດ້ມີຂຶ້ນໃນວັນທີ 24 ກັນຍານີ້, ທີ່ນະຄອນຫລວງວຽງຈັນ ໂດຍມີທ່ານລັດຖະມົນຕີກະຊວງໂຍທາທິການ ແລະ ຂົນສົ່ງ ບຸນຈັນ ສີນທະວົງ, ທ່ານຮອງປະທານອົງການກວດກາລັດຖະບານ ສຸກຄຳເພັດ ເຮືອງບຸດສີ.
ໃນໂອກາດນີ້, ທ່ານລັດຖະມົນຕີກະຊວງໂຍທາທິການ ແລະ ຂົນສົ່ງ ໂອ້ລົມເນັ້ນໃຫ້ຄະນະພັກ, ຄະນະອຳນວຍການ ແລະ ພະນັກງານຂອງລັດວິສາຫະກິດການບິນລາວ ຈົ່ງພ້ອມກັນເພີ່ມທະວີຄວາມສາມັກຄີ, ສະໜັບສະໜູນຊ່ວຍເຫລືອເຊິ່ງກັນ ແລະ ກັນ ເພື່ອໃຫ້ການປະຕິບັດໜ້າທີ່ວຽກງານຂອງລັດວິສາຫະກິດມີຜົນສໍາເລັດດີຂຶ້ນກວ່າເກົ່າ.
