ໂກນບານທີມຊາດຍິງ ຫວັງຍາດຫລຽນທອງ ໃນເອຊຽນພາລາເກມທີ່ອິນໂດເນເຊຍ
ນັກກິລາໂກນບານພິການຕາທີມຊາດລາວຍິງ ຫວັງຍາດຫລຽນທອງໃນ ເອຊຽນພາລາເກມ ຄັ້ງທີ 12 ທີ່ປະເທດອິນໂດເນເຊຍເປັນເຈົ້າພາບ ຈັດຂຶ້ນລະຫວ່າງວັນທີ 6-14 ຕຸລານີ້.
ທ່ານ ລອນຄໍາ ອິນທອງໄຊ ຄູຝຶກນັກກິລາໂກນບານທີມຊາດລາວຍິງ ໃຫ້ສໍາພາດວ່າ: ການເຂົ້າຮ່ວມແຂ່ງຂັນຄັ້ງນີ້ ພວກເຮົາຕັ້ງຄວາມຫວັງໄວ້ພຽງຫລຽນທອງເທົ່ານັ້ນ ເພາະການແຂ່ງຂັນດັ່ງກ່າວເປັນລາຍການທີ່ໃຫຍ່ ເຊິ່ງມີຫລາຍປະເທດເຂົ້າຮ່ວມ. ອີກຢ່າງການຝຶກຊ້ອມຂອງພວກເຮົາກໍໄດ້ຝຶກຊ້ອມພຽງແຕ່ 2 ເດືອນກວ່າເທົ່ານັ້ນ. ແນວໃດກໍດີ ພວກເຮົາກໍຈະເຮັດໃຫ້ດີທີ່ສຸດ ເພື່ອສ້າງຜົນງານໃຫ້ໂດດເດັ່ນໃນເວທີພາກພື້ນ ແລະ ສາກົນ. ສ່ວນລາຍຊື່ນັກກິລາຍິງ 6 ຄົນປະກອບມີ: ນາງ ຫລ້າ ດາລາວົງ, ນາງ ຈັນພອນ ໄຊສົມພູ, ນາງ ສຸກດາວີ ໄຊສົມພູ, ນາງ ສອນມາລີ ໄຊສົມພູ, ນາງລັດສະໝີ ວົງສາເກດທິບ ແລະ ນາງ ເຄືອ ຈັນທິວົງ.
ການເຂົ້າຮ່ວມເອຊຽນພາລາເກມຄັ້ງນີ້ ສປປ ລາວ ສົ່ງເຂົ້າຮ່ວມທັງໝົດ 4 ປະເພດກິລາຄື: ລອຍນໍ້າ, ແລ່ນ-ລານ, ຍົກນໍ້າໜັກ, ໂກນບານຍິງ.
