ອີຣານຂໍ ສປຊ ປະນາມການຄຸກຄາມ ແລະ ກວດສອບນິວເຄຼຍອິດສະລາແອນ
ເອກອັກຄະລັດຖະທູດອີຣານປະຈຳສະຫະປະຊາຊາດ ມີຈົດໝາຍຮຽກຮ້ອງມາເຖິງເລຂາທິການສະຫະປະຊາຊາດ ແລະ ສະພາຄວາມໝັ້ນຄົງແຫ່ງສະຫະປະຊາຊາດ ໃຫ້ປະນາມການຄຸກຄາມຂອງອິດສະລາແອນທີ່ມີຕໍ່ອີຣານ ແລະ ໃຫ້ກວດສອບໂຄງການນິວເຄຼຍຂອງອິດສະລາແອນ.
ສະຖານີໂທລະພາບຂອງທາງການອີຣານລາຍງານວ່າ: ທ່ານ ໂກລາມາລີ ໂຄຣູ ເອກອັກຄະລັດຖະທູດອີຣານ ກ່າວຮຽກຮ້ອງສະຫະປະຊາຊາດບັງຄັບໃຫ້ອິດສະລາແອນເຂົ້າຮ່ວມໃນສົນທິສັນຍາບໍ່ແຜ່ຂະຫຍາຍອາວຸດນິວເຄຼຍ ແລະ ຂໍໃຫ້ອົງການພະລັງງານປະລະມານູສາກົນ (IAEA) ເຊິ່ງເປັນໜ່ວຍງານຂອງສະຫະປະຊາຊາດ ກວດສອບໂຄງການນິວເຄຼຍຂອງອິດສະລາແອນ. ອີຣານປະນາມອິດສະລາແອນທີ່ປະຕິບັດການໂຈມຕີທາງອາກາດໃສ່ສາງອາວຸດກອງທັບຊີຣີ ເຮັດໃຫ້ຊີຣີຍິງລູກສອນໄຟຖືກເຮືອບິນອິລ-20 ຂອງຣັດເຊຍເສຍຊີວິດທັງໝົດ 15 ຄົນ ເຊິ່ງຣັດເຊຍກ່າວຫາວ່າ: ອິດສະລາແອນປະຕິບັດການໂຈມຕີໂດຍໃຊ້ເຮືອບິນຣັດເຊຍເປັນເກາະກຳບັງ ຂະນະທີ່ກຳລັງລົງຈອດທີ່ຖານທັບໃນຊີຣີ ເຮັດໃຫ້ເກີດຄວາມຂັດແຍ່ງຮຸນແຮງລະຫວ່າງຣັດເຊຍກັບອິດສະລາແອນ.
