ກະຊວງການເງິນປະຕິບັດວິໄນພະນັກງານ-ລັດຖະກອນ 8 ຄົນ ຖານສໍ້ລາດບັງຫລວງ
ເມື່ອມໍ່ໆມານີ້, ລັດຖະມົນຕີກະຊວງການເງິນ ໄດ້ອອກຂໍ້ຕົກລົງ ສະບັບເລກທີ 2830, ລົງວັນທີ 6 ກັນຍາ 2018 ເຫັນດີປະຕິບັດວິໄນ 8 ຄົນທີ່ມີຄວາມຜິດສໍ້ລາດບັງຫລວງຕາມມາດຕາ 174 ຂໍ້ 1 ແລະ 11 ຂອງກົດໝາຍອາຍາ ແລະ ກົດໝາຍວ່າດ້ວຍພະນັກງານ, ລັດຖະກອນ ມາດຕາ 68 ວ່າດ້ວຍລົງວິໄນຂັ້ນ 4 ລຶບຊື່ອອກຈາກການເປັນລັດຖະກອນຂອງຂະແໜງການເງິນ ໂດຍບໍ່ໄດ້ຮັບນະໂຍບາຍໃດໆ ດັ່ງນີ້: ອະດີດຊ່ວຍວຽກຄະນະນຳກະຊວງ, ອະດີດຮອງຫົວໜ້າສະຖາບັນເສດຖະກິດ-ການເງິນ, ອະດີດຫົວໜ້າພະແນກກົມງົບປະມານ, ອະດີດຫົວໜ້າພະແນກຫ້ອງການກະຊວງ, ອະດີດຫົວໜ້າພະແນກກົມຄຸ້ມຄອງວິສາຫະກິດລັດລົງທຶນ ແລະ ປະກັນໄພ, ອະດີດຮອງຫົວໜ້າພະແນກກົມຄຸ້ມຄອງວິສາຫະກິດລັດລົງທຶນ ແລະ ປະກັນໄພ, ອະດີດຮອງຫົວໜ້າພະແນກກົມງົບປະມານແຫ່ງລັດ, ວິຊາການກົມຄຸ້ມຄອງວິສາຫະກິດລັດລົງທຶນ ແລະ ປະກັນໄພ.
ສ່ວນນະໂຍບາຍດ້ານອື່ນໆທີ່ພວກກ່ຽວໄດ້ຮັບຜ່ານມາເຊັ່ນ: ເງິນເດືອນ, ເງິນນ້ຳມັນລົດ ແລະ ເງິນໂທລະສັບສະເໜີໃຫ້ຫ້ອງການກະຊວງການເງິນຢຸດຕິການເບີກຈ່າຍໃຫ້ຜູ້ກ່ຽວ ນັບແຕ່ວັນທີ 1 ຕຸລາ ປີ 2018 ເປັນຕົ້ນໄປ, ສ່ວນລົດປະຈຳຕຳແໜ່ງຂອງພວກກ່ຽວແມ່ນມອບໃຫ້ຫ້ອງການກະຊວງການເງິນ ຮິບຄືນມາເປັນລົດບໍລິຫານລວມຂອງກະຊວງການເງິນຕາມລະບຽບການ. ດັ່ງນັ້ນ ຫ້ອງການກະຊວງການເງິນ, ກົມຈັດຕັ້ງ ແລະ ພະນັກງານ, ກົມງົບປະມານແຫ່ງລັດ, ກົມຄຸ້ມຄອງພັດທະນາວິສາຫະກິດລັດລົງທຶນ ແລະ ປະກັນໄພ, ສະຖາບັນເສດຖະກິດ-ການເງິນ, ທຸກພາກສ່ວນທີ່ກ່ຽວຂ້ອງ, ພວກກ່ຽວຈຶ່ງຮັບຮູ້ ແລະ ຈັດຕັ້ງປະຕິບັດຂໍ້ຕົກລົງສະບັບນີ້ຢ່າງເຂັ້ມງວດ, ໃຫ້ທຸກພາກສ່ວນກ່ຽວຂ້ອງເຜີຍແຜ່ຂໍ້ຕົກລົງສະບັບນີ້ໃຫ້ພະນັກງານ-ລັດຖະກອນຂອງຕົນຮັບຊາບຢ່າງທົ່ວເຖິງ.
