ເມືອງພູຄູນດິນແດນແຫ່ງທະເລໝອກ

 ໂດຍ: ຊາຍພະເນຈອນ  

ເມືອງພູຄູນ ຕັ້ງຢູ່ເສັ້ນທາງ 13ເໜືອ ໃນຈຸດ3ແຍກໄປແຂວງ ຊຽງຂວາງ ແລະ ຫຼວງພະບາງ ,ເປັນຈຸດທີ່ສູງຊັນຈົນກາຍເປັນ ເມືອງຍຸດທະສາດສໍາຄັນອີກ ແຫ່ງໜຶ່ງຂອງແຂວງຫຼວງພະ ບາງ. ຖ້າທຽບກັບລະດັບນໍ້າ ທະເລແລ້ວຈະມີຄວາມສູງປະ ມານ 1.500ແມັດ, ແລະ ມີຈຸດ ພິເສດພົ້ນເດັ່ນຄືມື້ໜຶ່ງມີສາມ ລະດູເຊັ່ນ: ຝົນຕົກ, ມີໝອກ ແລະ ແດດ. ອຸ່ນນະພູມໃນລະດູໜາວ ບາງປີມີພຽງ 0 ອົງສາ ແລະ ລະດູຮ້ອນຈະບໍ່ເກີນ 30 ອົງສາ.

+ ທ່ຽວຊົມຫລວງພະບາງເມືອງມໍລະດົກໂລກ

+ ໄປເມືອງອານຸວົງໄດ້ທ່ຽວຊົມຫລາຍບ່ອນ

ເມືອງພູຄູນ ເປັນພູມລໍາ ເນົາ ຂອງພີ່ນ້ອງເຜົ່າມົ້ງ ແລະ ເຜົ່າກຶມມຸ ເປັນສ່ວນໃຫຍ່ໂດຍ ອາໄສການເຮັດໄຮ່ ແລະ ເຮັດ ສວນ, ຖ້າໃຜຫາກໄດ້ຜ່ານໄປ ມາກໍສາມາດສັງເກດເຫັນໄດ້ ຈາກພູຫົວໂລ້ນຫຼາຍໜ່ວຍ ຍ້ອນການຖາງປ່າເຮັດໄຮ່ຂອງ ປະຊາຊົນເຂດນີ້ໃນເມື່ອກ່ອນ ແລະ ແຕ່ໃດໆມາ ປະຊາຊົນເຂດ ນີ້ ມີຄວາມດຸໝັ່ນຂະຫຍັນພຽນ ໃນການອອກແຮງງານເພີ່ມພູນ ຜະລິດຜົນທີ່ອາໃສຄວາມອຸດົມ ສົມບູນຂອງທໍາມະຊາດທີ່ອໍາ ນວຍຄວາມສະດວກໃຫ້ແກ່ ຜົນລະປູກຂອງເຂົາເຈົ້າ ເຊັ່ນ: ຜັກກາດ, ໝາກເຜັດ, ໝາກແຕງ ແລະ ອື່ນໆ. ນອກນັ້ນ, ພວກ ເຂົາຍັງໄດ້ອາໃສເຄື່ອງປ່າຂອງດົງເພື່ອການລ້ຽງຊີບເຊັ່ນ: ຍັງ ໄດ້ເອົາຕົ້ນແຂມມາເຮັດຟອຍ ຂາຍເປັນລາຍຮັບເສີມໃຫ້ ຄອບຄົວນໍາອີກ.

ໃນເມື່ອກ່ອນ ເມືອງພູຄູນ ເປັນພຽງຕົວເມືອງນ້ອຍໃນເຂດຊົນນະບົດແຕ່ມາຮອດປັດຈຸບັນ, ແມ່ນໄດ້ຮັບການປົວແປງໃຫ້ ເປັນສະຖານທີ່ທ່ອງທ່ຽວ, ເຊິ່ງ ເປັນເມືອງທີ່ອຸດົມສົມບູນໄປ ດ້ວຍທໍາມະຊາດປ່າໄມ້ຂຽວ ງາມ, ມີຖໍ້ານໍ້າຕົກ ແລະ ວັດ ຖຸບູຮານເກົ່າແກ່ຄືຢູ່ຫ່າງຈາກ ຕົວເມືອງພູຄູນໄປທາງທິດ ເໜືອປະມານ 50 ກິໂລແມັດ, ຈະມີໄຫຫີນນັບຮ້ອຍໜ່ວຍ ຢັງຢາຍກັນໄປໃນປ່າເລິກ ແລະ ຢູ່ເມືອງພູຄູນຍັງມີ ຮ່ອງຮອຍປະຫວັດສາດ ອື່ນໆ ອີກຫຼາຍແຫ່ງ.

ຖ້າໃຜໄດ້ໄປແຂວງ ຫຼວງ ພະບາງກໍຢ່າລືມໄປແວ່ຊົມ ເມືອງພູຄູນໃຫ້ຊື່ນໃຈ, ເຊິ່ງ ນອກຈາກທ່ານຈະໄດ້ສໍາພັດກັບ ທໍາມະຊາດ ແລະ ກິນອາກາດທີ່ ສົດໃສແລ້ວ ທ່ານຍັງຈະໄດ້ ຮຽນຮູ້ເຖິງວິຖີຊີວິດຂອງຊົນ ເຜົ່າມົ້ງ ແລະ ເຜົ່າກຶມມຸອີກ ດ້ວຍ, ເມື່ອຮອດເດືອນ 11-12 ລະດູເກັບກູ້ຜົນຜະລິດແລ້ວ ພວກເຮົາສາມາດຮ່ວມມ່ວນ ຊື່ນໃນບຸນກິນຈຽງ ແລະ ບຸນ ເກີຣ ຂອງເຂົາເຈົ້າອີກດ້ວຍ.