ສູບຊິກ້າປອດໄພກ່ວາການສູບຢາແທ້ບໍ່ ?

ຫລາຍຄົນຫລີກເວັ້ນການສູບຢາແລ້ວຫັນມາສູບຊິກ້າແທນ ເຊິ່ງອາດຈະເພື່ອພັກຜ່ອນຢ່ອນໃຈ ຫລື ເພື່ອສັງຄົມ ແລະ ການສູບຊິກ້າກໍບໍ່ມີການອັດຄວັນເຂົ້າສູ່ປອດຄືກັບການສູບຢາ ຈຶ່ງເຮັດໃຫ້ຫລາຍຄົນເຊື່ອວ່າມັນປອດໄພກ່ວາ.

ແຕ່ໃນຄວາມຈິງແລ້ວ ມັນກໍບໍ່ໄດ້ໝາຍຄວາມວ່າໂຕທ່ານຈະບໍ່ມີຄວາມສ່ຽງຈາກອັນຕະລາຍຂອງຄວັນຢາສູບ ເພາະໃນຊິກ້າກໍປະກອບດ້ວຍນິໂກຕິນບໍ່ແຕກຕ່າງໄປຈາກຢາສູບ ທັງຍັງມີຄວາມສ່ຽງຍິ່ງຂຶ້ນ ເພາະຄົນສູບຊິກ້າມັກຈະສູບແບບເທື່ອດຽວໝົດ ແລະ ຊິກ້າມີຂະໜາດໃຫຍ່ກ່ວາຢາສູບ ເຮັດໃຫ້ປະລິມານນິໂກຕິນ ແລະ ສານພິດອື່ນໆທີ່ຈະໄດ້ຮັບມີປະລິມານຕໍ່ເທື່ອຫລາຍກ່ວາ ເຖິງວ່າຈະບໍ່ໄດ້ສູບຫລາຍກອກຄືກັບຢາສູບ, ແຕ່ຖ້າສານພິດເຫລົ່ານີ້ເຂົ້າຮ່າງກາຍໃນປະລິມານຫລາຍໆໃນເທື່ອດຽວອາດຈະສ້າງຜົນກະທົບໄດ້ຫລາຍກວ່າ.

ນອກຈາກນັ້ນ ຫາກທ່ານເຜີອັດຄວັນເຂົ້າສູ່ປອດ ທ່ານມີໂອກາດຈະໄດ້ຮັບສານພິດຫລາຍກ່ວາການສູບຢາ 1 ກອກ. ດັ່ງນັ້ນ ບໍ່ວ່າທ່ານຈະສູບຊິກ້າ ຫລື ຢາສູບ ທ່ານກໍບໍ່ມີທາງຫລີກເວັ້ນໂອກາດການເປັນພະຍາດມະເຮັງຕ່າງໆ ແລະ ຊິກ້າກໍບໍ່ມີຂໍ້ຍົກເວັ້ນ ເຖິງວ່າທ່ານຈະບໍ່ໄດ້ອັດຄວັນເຂົ້າສູ່ປອດແບບເຕັມໆກໍຕາມ.

ໂດຍປົກກະຕິແລ້ວ ຊິກ້າມີຄວາມສ່ຽງໃນການເຮັດໃຫ້ເປັນມະເຮັງຫລາຍບ່ອນໃນຮ່າງກາຍ ເຊັ່ນ : ປາກ, ລີ້ນ, ຄໍຫອຍ, ຫລອດລົມ ແລະ ປອດ.

ພ້ອມກັນນັ້ນ ຍັງມີໂອກາດສ່ຽງທີ່ຈະເປັນພະຍາດປອດ ແລະ ພະຍາດຫົວໃຈ ໄປຈົນເຖິງພະຍາດໃນຜົ້ງປາກ ເຊັ່ນ : ພະຍາດເຫືອກ ຫລື ພະຍາດກ່ຽວກັບແຂ້ວ ຍ້ອນສາເຫດນີ້ ຖ້າທ່ານບໍ່ສາມາດຮັບຄວາມສ່ຽງຈາກພະຍາດດັ່ງກ່າວໄດ້ ການເຊົາສູບຊິກ້າກໍອາດເປັນທາງອອກທີ່ດີບໍ່ໜ້ອຍ.