ລາວເນັ້ນສົ່ງເສີມການລົງທຶນຜ່ານກົນໄກປະຕູດຽວ
ກອງປະຊຸມຄົບຄະນະກຳມະການສົ່ງເສີມ ແລະ ຄຸ້ມຄອງການລົງທຶນ (ຄລທ) ຂັ້ນສູນກາງ, ຂັ້ນແຂວງ ແລະ ນະຄອນຫລວງ, ໄດ້ຈັດຂຶ້ນໃນວັນທີ 19 ກັນຍານີ້, ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນ, ມີບັນດາລັດຖະມົນຕີ, ເຈົ້າຄອງນະຄອນຫລວງ ແລະ ແຂວງຕ່າງໆເຂົ້າຮ່ວມຢ່າງພ້ອມພຽງ ເພື່ອປຶກສາຫາລືປະກອບຄຳຄິດເຫັນຕ່າງໆຕໍ່ດ້ານນະໂຍບາຍ, ດ້ານວິຊາການ ແລະ ການຄຸ້ມຄອງປະສານງານກ່ຽວກັບວຽກງານການສົ່ງເສີມການລົງທຶນຜ່ານກົນໄກປະຕູດຽວ, ພາຍຫລັງທີ່ໄດ້ມີກົດໝາຍ, ນິຕິກຳ ແລະ ລະບຽບການໃນການເຄື່ອນໄຫວຈັດຕັ້ງປະຕິບັດຕາມພາລະບົດບາດ ແລະ ໜ້າທີ່ຄວາມຮັບຜິດຊອບຂອງຕົນ ໃນໄລຍະ 1 ປີທີ່ຜ່ານມາ, ເພື່ອເປັນການຖອດຖອນບົດຮຽນນໍາກັນຂອງແຕ່ລະວຽກງານດັ່ງກ່າວ.
ໃນກອງປະຊຸມ, ທ່ານ ສອນໄຊ ສີພັນດອນ ໄດ້ມີຄໍາເຫັນແນະນໍາວ່າ: ວຽກງານສົ່ງເສີມການລົງທຶນ ເປັນສິ່ງທີ່ທ້າທາຍ ແລະ ເປັນຕົວຂັບເຄື່ອນການພັດທະນາເສດຖະກິດຂອງປະເທດ, ເຊິ່ງຕ້ອງໄດ້ມີການຊຸກຍູ້ສົ່ງເສີມໃຫ້ມີການເຕີບໂຕຢ່າງຕໍ່ເນື່ອງ, ສົມດຸນ ແລະ ຍືນຍົງ, ໂດຍມີການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນ, ສ້າງໃຫ້ໄດ້ການຫັນປ່ຽນຮູບແບບການພັດທະນາຕາມທິດເສີມຂະຫຍາຍທ່າແຮງທີ່ບົ່ມຊ້ອນ ແລະ ຂໍ້ໄດ້ປຽບຂອງປະເທດ ເພື່ອການເຊື່ອມໂຍງກັບພາກພື້ນ ແລະ ສາກົນຢ່າງເປັນເຈົ້າການ, ເຊິ່ງລັດຖະບານຊຸດທີ VIII ໄດ້ຊີ້ນຳຢ່າງໃກ້ສິດໃນການປັບປຸງກົດໝາຍວ່າດ້ວຍການສົ່ງເສີມການລົງທຶນ, ນິຕິກຳ ແລະ ບັນດາລະບຽບການຕ່າງໆທີ່ກ່ຽວຂ້ອງ ເພື່ອເປັນກົນໄກ ແລະ ບ່ອນອີງໃຫ້ແກ່ການເຄື່ອນໄຫວຂອງຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຕ່ລະຂັ້ນຕາມກົນໄກການບໍລິການການລົງທຶນຜ່ານປະຕູດຽວໃຫ້ມີປະສິດທິຜົນ ເພື່ອໃຫ້ການລົງທຶນມີຄວາມສະດວກ, ວ່ອງໄວ, ໂປ່ງໃສ, ຖືກຕ້ອງ ໄດ້ຮັບການປົກປ້ອງດ້ານຕ່າງໆຈາກລັດ ແນ່ໃສ່ຮັບປະກັນສິດ ແລະ ຜົນປະໂຫຍດຂອງຜູ້ລົງທຶນ, ຂອງລັດ, ຂອງລວມໝູ່, ຂອງປະຊາຊົນ ສາມາດເຊື່ອມໂຍງເຂົ້າກັບເສດຖະກິດພາກພື້ນ ແລະ ສາກົນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດຢ່າງມີປະສິດທິຜົນ.
