ເວເນຊູເອລາຈະສົ່ງອອກນ້ຳມັນ ໃຫ້ຈີນເພີ່ມ 1 ລ້ານບາເຣລຕໍ່ວັນ
ປະທານາທິບໍດີ ນິໂກລາສ ມາດູໂຣ ຖະແຫລງວ່າ: ເວເນຊູເອລາ ຈະເພີ່ມການສົ່ງອອກນ້ຳມັນໄປຈີນເປັນວັນລະ 1 ລ້ານບາເຣລ ພາຍຫລັງຜູ້ນຳເວເນຊູເອລາກັບຈາກພາລະກິດຢ້ຽມຢາມຈີນ.
ທ່ານ ມາດູໂຣ ກ່າວວ່າ: ແຕ່ລະຝ່າຍຈະລົງທຶນປະມານ 5.000 ລ້ານໂດລາ ຕາມໂຄງການພາຍໃນເດືອນສິງຫາ 2019. ພາກເອກະຊົນຕີລາຄາວ່າ: ປະລິມານການສົ່ງອອກນ້ຳມັນໄປຈີນໃນປັດຈຸບັນຢູ່ທີ່ວັນລະ 700.000 ບາເຣລ. ປະທານາທິບໍດີ ມາດູໂຣ ຢ້ຽມຢາມຈີນເປັນເວລາ 2 ວັນໃນອາທິດຜ່ານມາ ໂດຍໄດ້ຮັບການຕ້ອນຮັບຈາກປະທານປະເທດ ສີຈິ້ນຜິງ ລວມທັງເຂົ້າຮ່ວມການພົບປະຫາລືທີ່ທະນາຄານພັດທະນາແຫ່ງຊາດຈີນ ແລະ ບໍລິສັດໄຊນາເນຊັນແນລປິໂຕຣລຽມຄໍປໍເຣຊັນ (CNPC). ເວເນຊູເອລາ ເຊິ່ງເປັນປະເທດທີ່ມີປະລິມານນ້ຳມັນສຳຮອງຫລາຍທີ່ສຸດໃນໂລກ ໄດ້ຮັບເງິນກູ້ຈາກຈີນຫລາຍກວ່າ 60.000 ລ້ານໂດລາ ໃນທົດສະວັດຜ່ານມາ, ແຕ່ຍັງມີໜີ້ຄ້າງປະມານ 20.000 ລ້ານໂດລາ ເຊິ່ງຈະຈ່າຍຄືນໂດຍການສົ່ງອອກນ້ຳມັນໃຫ້ຈີນ. ຜູ້ນຳເວເນຊູເອລາ ຖະແຫລງຕໍ່ສື່ມວນຊົນຕ່າງປະເທດວ່າ: ທ່ານ ຈາງຈຽນຮົວ ປະທານບໍລິສັດພະລັງງານ CNPC ຈະຢ້ຽມຢາມເວເນຊູເອລາ ເພື່ອເຮັດຂໍ້ຕົກລົງດ້ານການລົງທຶນ. ທັງນີ້ ຈີນຫລຸດຜ່ອນໃຫ້ເວເນຊູເອລາໃນເງື່ອນໄຂການຊຳລະໜີ້ໃນປີ 2016 ຈາກບັນຫາວິກິດເສດຖະກິດ.
