ສ.ເກົາຫລີ-ສປປ ເກົາຫລີ ປະກາດຮ່ວມມືເຂົ້າສູ່ຍຸກໃໝ່
ທ່ານ ມຸນ ແຈອິນ ປະທານາທິບໍດີ ສ.ເກົາຫລີ ແລະ ທ່ານ ກິມ ຈ໋ອງອຸນ ຜູ້ນຳສູງສຸດ ສປປ ເກົາຫລີ ປະກາດການຮ່ວມມືໃນການສ້າງອະນາຄົດໃໝ່ຂອງສອງປະເທດເກົາຫລີ ແລະ ຮ່ວມລົງນາມໃນຂໍ້ຕົກລົງຫລາຍສະບັບໃນນະຄອນຫລວງພຽງຢາງ ລວມທັງກຽມສະເໜີຕົວເປັນເຈົ້າພາບຮ່ວມກັນໃນການຈັດໂອແລມປິກປີ 2032.
ທ່ານ ມຸນ ແຈອິນ ກ່າວວ່າ: ທັງສອງຝ່າຍໄດ້ “ຕົກລົງໃນແນວທາງຮ່ວມກັນທີ່ຈະບັນລຸການປົດອາວຸດນິວເຄຼຍ”. ສອງປະເທດເກົາຫລີຍັງວາງແຜນສ້າງເສັ້ນທາງລົດໄຟເຊື່ອມຕໍ່ຫາກັນ, ອະນຸຍາດໃຫ້ຊາວ ສປປ ເກົາຫລີ – ສ.ເກົາຫລີ ທີ່ຖືກແຍກຈາກສົງຄາມໄດ້ມີໂອກາດລວມຍາດ ແລະ ການຮ່ວມມືໃນລະບົບສາທາລະນະສຸກ.
ທ່ານ ກິມ ຈ໋ອງອຸນ ຍັງຮຽກຜົນຂອງກອງປະຊຸມສຸດຍອດຄັ້ງນີ້ວ່າເປັນການ “ກ້າວເຂົ້າສູ່ອະນາຄົດ” ຂອງສັນຕິພາບທາງການທະຫານ ແລະ ຍັງໃຫ້ຄຳໝັ້ນສັນຍາວ່າຈະເດີນທາງໄປຢ້ຽມຢາມນະຄອນຫລວງເຊອຸນ ຂອງ ສ.ເກົາຫລີ ໃນມໍ່ໆນີ້ ເຊິ່ງຈະເປັນການຢ້ຽມຢາມ ສ.ເກົາຫລີ ເທື່ອທຳອິດຂອງຜູ້ນຳສູງສຸດ ສປປ ເກົາຫລີ.
ທ່ານ ມຸນ ແຈອິນ ກ່າວຫລັງລົງນາມໃນຂໍ້ຕົກລົງວ່າ: “ສປປ ເກົາຫລີ ຕົກລົງຈະປິດຖານທົດລອງລູກສອນໄຟຕອງຊັງ-ຣີ ແລະ ຖານປ່ອຍລູກສອນໄຟຢ່າງຖາວອນ ຕໍ່ໜ້າຜູ້ຊ່ຽວຊານທີ່ກ່ຽວຂ້ອງ”.
ທັງສອງປະເທດເກົາຫລີ ຍັງກຽມສະເໜີຕົວເປັນເຈົ້າພາບຮ່ວມກັນໃນການແຂ່ງຂັນກິລາໂອແລມປິກລະດູຮ້ອນໃນປີ 2032.
ການລົງນາມໃນຂໍ້ຕົກລົງນີ້ ເກີດຂຶ້ນລະຫວ່າງທີ່ທ່ານ ມຸນ ແຈອິນ ຜູ້ນຳ ສ.ເກົາຫລີ ເດີນທາງຢ້ຽມຢາມນະຄອນຫລວງພຽງຢາງເປັນເວລາ 3 ວັນ ເຊິ່ງເປັນການຢ້ຽມຢາມ ສປປ ເກົາຫລີ ເທື່ອທຳອິດໃນຮອບທົດສະວັດ, ແຕ່ເປັນການພົບກັນຄັ້ງທີ 3 ຂອງທ່ານ ກິມ ຈ໋ອງອຸນ ແລະ ທ່ານ ມຸນ ແຈອິນ ພາຍຫລັງກອງປະຊຸມສຸດຍອດສອງເກົາຫລີໃນເດືອນເມສາຜ່ານມາ.
