ບົດຮຽນຈາກເກົາຫຼີ ຄົນລາວກໍອາດມີອາຍຸຍືນໄດ້!
ທ່ານຮູ້ບໍ່ວ່າ ຄົນເກົາຫຼີ ກຳລັງຈະມີອາຍຸຍືນທີ່ສຸດໃນໂລກ? ເຊິ່ງຫຼາຍຄົນກໍຍັງບໍ່ຢາກເຊື່ອວ່ານີ້ ຈະກາຍເປັນຄວາມ ຈິງເພາະຜ່ານມາໄດ້ ຍິນແຕ່ຄົນຍີ່ປຸ່ນ ຫຼື ຄົນປະເທດອື່ນໆ ທີ່ພັດທະນາແລ້ວອາຍຸຍືນ ແຕ່ບັດນີ້ ພັດແມ່ນເກົາຫຼີ, ມາເບິ່ງນຳກັນວ່າ ເປັນຍ້ອນຫຍັງກັນແທ້?
ຕາມຂໍ້ມູນຂອງ ເວທີ ເສດຖະກິດໂລກ ໃຫ້ຮູ້ວ່າ ປະເທດເກົາຫຼີ ຈະກາຍເປັນທີ່ທຳອິດທີ່ປະຊາກອນມີອາຍຸຍືນ ສະເລ່ຍຮອດ 90 ປີໃນໄວໆນີ້ ທີ່ໃນປັດຈຸບັນ ແມ່ນ 81 ປີ ເຊິ່ງເປັນເລື່ອງທີ່ໜ້າສົນໃຈຢ່າງຍິ່ງ ເຂົາເຈົ້າມີເຄັດລັບຫຍັງ ຄືພິເສດແທ້ເນາະ!
ການສຳຫຼວດ ພົບວ່າ ກິມຈິ ທີ່ເປັນອາຫານປະຈຳຂອງຄົນເກົາຫຼີ ທີ່ສືບທອດມາຫຼາຍເຊັ່ນຄົນນີ້ແຫຼະ ເປັນເຄັດລັບ ທີ່ສືບທອດກັນມາຍາວນານ! ກິມຈິ ແມ່ນຜັກກະລໍ່າປີດອງ ທີ່ລົດຊາດ ອ່າວເຄັມ ແລະເຜັດແດ່ຈັກໜ້ອຍ ທີ່ເຕັມໄປດ້ວຍ ວິຕາມິນ ເອ ແລະ ບີ. ກິມຈິ ປະກອບໄປດ້ວຍ ເລັກໂຕບາຊີລີ ເຊິ່ງເປັນ ແບກເຕີລີ ທີ່ດີ ທີ່ພົບເຫັນ ໃນໂຢເກີດ.
ນັກວິທະຍາສາດເຊື່ອວ່າ ກິມຈິ ເປັນປັດໄຈສຳຄັນ ທີ່ຊ່ວຍໃຫ້ຄົນເກົາຫຼີ ມີອາຍຸຍືນ (ຂໍ້ມູນຂອງ ແລນເຊັດ The Lancet), ເມື່ອເປັນເຊັ່ນນັ້ນ ຜູ້ຈ້າງງານ ບາງບໍລິສັດ ກໍໃຫ້ ໂບນັດ ທີ່ຊື່ວ່າ “ກິມຈິ ໂບນັດ” ເພື່ອຊ່ວຍໃຫ້ ພະນັກງານ ໃຊ້ຈ່າຍ ເພື່ອຊື້ ເຄື່ອງປຸງແຕ່ງອາຫານປະຈຳປີ, ແຕ່ກໍແນ່ນອນແລ້ວວ່າ ການທີ່ຈະມີອາຍຸຍືນ ຊິອີງໃສ່ແຕ່ ອາຫານກີມຈິ ກໍອາດເປັນໄປບໍ່ໄດ້ ເພາະ ສ ເກົາຫຼີ ຍັງມີລະບົບສາທາລະນະສຸກທີ່ດີເລີດ ອີກປະເທດໜຶ່ງ. ການກິນກິມຈິ, ເຂົ້າ ແລະປາ ເປັນການຊ່ວຍໃຫ້ຄົນເກົາຫຼີ ມີສຸຂະພາບແຂງແຮງ.
ອັນນີ້ກໍເປັນເລື່ອງໜຶ່ງ ທີ່ພວກເຮົາຄວນຄິດກ່ຽວກັບອາຍຸ ແລະອາຫານຂອງພວກເຮົາແດ່! ໃນປັດຈຸບັນ ຄົນລາວມີອາຍຸຍືນ ສະເລ່ຍ ພຽງແຕ່ 64 ປີ (ຊາຍ 62 ປີ, ຍິງ 65 ປີ) (ຂໍ້ມູນການສຳຫຼວດຄົວເຮືອນ ແລະທີ່ຢູ່ອາໄສປີ 2015) ເຊິ່ງ ທຽບໃສ່ປະເທດອື່ນກໍຖືວ່າຕໍ່າ (ກຳປູເຈຍ 65 ປີ, ມຽນມາ 67 ປີ ແລະ ຫວຽດນາມ 74 ປີ).
ແຕ່ເມື່ອເວົ້າເລື່ອງ ອາຫານ ເພິ່ນເວົ້າວ່າ ປະເທດລາວມີຄວາມຫຼາກຫຼາຍທາງດ້ານຊີວະນາໆພັນໃຫຍ່ທີ່ສຸດ, ພືດທີ່ສາມາດກິນໄດ້ຫຼາຍກວ່າ 2.500 ຊະນິດ, ເຄື່ອງປ່າຂອງດົງຫຼາຍກວ່າ 500 ຊະນິດ ແລະພືດທີ່ເປັນຢາ ຫຼາຍກວ່າ 1.500 ຊະນິດ (ຂໍ້ມູນຈາກ ເວບໄຊ໌ ພາເຂົ້າລາວ (Phakhaolao) ) ເຊິ່ງເຊື່ອວ່າ ຈາກຄວາມອຸດົມສົມບູນເຫຼົ່ານັ້ນ ຈະຊ່ວຍໃຫ້ຄົນລາວອາຍຸຍືນຂຶ້ນແດ່ບໍ່ ເຊິ່ງອາດຈະ ມີການຄົ້ນຄວ້າ ແລະສົ່ງເສີມ ໃຫ້ພວກເຮົາຄົນລາວເລືອກກິນອາຫານ ທີ່ດີມີໂພຊະນາການ ຂຶ້ນກວ່າເກົ່າ.
ຈະເພິ່ງແຕ່ອາຫານກໍບໍ່ໄດ້ຄືວ່າ ເພາະ ຍາມເຈັບເປັນ ກໍຕ້ອງເພິ່ງພາ ລະບົບສາທາລະນຸກ ທີ່ດີມີຄຸນນະພາບອີກດ້ວຍ.
