ອາເມລິກາຈະຫລຸດການຮັບຜູ້ລີ້ໄພ ລົງເຫລືອ 30.000 ຄົນໃນປີ 2019
ທ່ານ ໄມ ປອມເປໂອ ລັດຖະມົນຕີຕ່າງປະເທດອາເມລິກາ ກ່າວວ່າ: ລັດຖະບານຈະຫລຸດການຮັບຜູ້ລີ້ໄພໃນແຕ່ລະປີລົງມາເຫລືອບໍ່ເກີນ 30.000 ຄົນໃນປີ 2019 ເຊິ່ງຖືເປັນການຫລຸດຈຳນວນລົງມາສອງປີຕິດກັນແລ້ວ.
ຈຳນວນດັ່ງກ່າວຫລຸດລົງຈາກທີ່ກຳນົດໄວ້ບໍ່ເກີນ 45.000 ຄົນ ແລະ ຖືວ່າເປັນຕົວເລກຕໍ່າທີ່ສຸດສຳລັບໂຄງການຮັບຜູ້ລີ້ໄພຂອງກະຊວງຕ່າງປະເທດອາເມລິກາ ນັບແຕ່ມີຂຶ້ນໃນປີ 1980. ທ່ານ ປອມເປໂອ ກ່າວວ່າ: ການປັບປຸງນະໂຍບາຍຜູ້ລີ້ໄພຂອງລັດຖະບານເປັນໄປຕາມຫລັກຜົນປະໂຫຍດແຫ່ງຊາດຂອງອາເມລິກາ ແລະ ຢືນຢັນວ່າ: ອາເມລິກາຍັງເປັນປະເທດທີ່ໃຈກວ້າງ ແລະ ມີນ້ຳໃຈຫລາຍທີ່ສຸດໃນໂລກ. ການປັບຫລຸດຕົວເລກຮັບຜູ້ລີ້ໄພຫລ້າສຸດ ເປັນໄປຕາມນະໂຍບາຍປາບປາມຜູ້ອົບພະຍົບຂອງລັດຖະບານປະທານາທິບໍດີ ໂດນັລ ທຣຳ ພາຍຫລັງສະໄໝລັດຖະບານປະທານາທິບໍດີ ບາຣັກ ໂອບາມາ ກຳນົດຮັບຜູ້ລີ້ໄພໄວ້ບໍ່ເກີນ 45.000 ຄົນ ໃນປີງົບປະມານ 2017.
