ຍົກນໍ້າໜັກພິການລາວ ຍາດໄດ້ອັນດັບທີ 4 ຂອງໂລກ
ການແຂ່ງຂັນຍົກນໍ້າໜັກຄົນພິການຊີງແຊ້ມໂລກ ອາຊີ-ໂອເຊອານີ ທີ່ປະເທດຍີ່ປຸ່ນ ຈັດຂຶ້ນລະຫວ່າງວັນທີ 8-12 ກັນຍາຜ່ານມານີ້ ເຊິ່ງມີ 29 ປະເທດເຂົ້າຮ່ວມ. ຂະນະທີ່ ສປປ ລາວ ສາມາດຍາດໄດ້ອັນດັບທີ 4 ຂອງໂລກ ໃນລຸ້ນນນໍ້າໜັກ 49 ກິໂລ.
ທ່ານ ລັດຖະໄຊ ອິນທະວົງ ຫົວໜ້າພະແນກບໍລິຫານ ກົມກິລາມວນຊົນ ກະຊວງສຶກສາທິການ ແລະ ກິລາ ໃຫ້ສໍາພາດວ່າ: ການແຂ່ງຂັນຍົກນໍ້າໜັກຊີງແຊ້ມໂລກທີ່ປະເທດຍີ່ປຸ່ນຄັ້ງນີ້ ພວກເຮົາໄດ້ສົ່ງນັກກິລາເຂົ້າຮ່ວມ 1 ຄົນຄື: ທ້າວ ເປ້ຍ ລາວພັກດີ ເຂົ້າຮ່ວມໃນລຸ້ນນໍ້າໜັກ 49 ກິໂລ ເຊິ່ງໃນລຸ້ນດັ່ງກ່າວມີນັກກິລາເຂົ້າຮ່ວມທັງໝົດ 11 ຄົນຈາກ 9 ປະເທດຄື: ຍີ່ປຸ່ນ 3 ຄົນ, ປາກິດສະຖານ, ກາຊັກສະຖານ, ຟີລິບປິນ, ອີຣານ, ສປ ຈີນ, ຫວຽດນາມ, ຈໍແດນ ແລະ ລາວ. ຜ່ານການແຂ່ງຂັນ ນັກກິລາທີມຊາດລາວສາມາດຍາດໄດ້ອັນດັບທີ 4, ສ່ວນອັນດັບທີ 1 ປະເທດຈໍແດນ ໄດ້ຮັບຫລຽນຄໍາ, ອັນດັບທີ 2 ສປ ຈີນ ໄດ້ຮັບຫລຽນເງິນ ແລະ ອັນດັບທີ 3 ປະເທດອີຣານ ໄດ້ຮັບຫລຽນທອງ.
ການແຂ່ງຂັນຄັ້ງນີ້ມີນັກກິລາເຂົ້າຮ່ວມທັງໝົດ 244 ຄົນ ມາຈາກ 29 ປະເທດ ໂດຍມີການແຂ່ງຂັນ 20 ລຸ້ນ, ໃນນັ້ນ ມີຍິງແຂ່ງຂັນ 10 ລຸ້ນ.
