4 ສິ່ງທີ່ບໍ່ຄວນເຮັດເມື່ອນຳ້ຖ້ວມ
ເມື່ອນຳ້ຖ້ວມເຮົາມັກຈະເຫັນຫລາຍໆຄົນເຮັດຫຍັງທີ່ບໍ່ຖືກຕ້ອງທີ່ບໍ່ຄວນເຮັດເປັນຢ່າງຍິ່ງ ເຊິ່ງບໍ່ພຽງແຕ່ຈະເກີດອັນຕະລາຍ, ແຕ່ຍັງອາດທຳລາຍສຸຂະພາບໄດ້ໂດຍບໍ່ຮູ້ໂຕນຳອີກ.
- ປົດເກີບລຸຍນຳ້ : ເຂົ້າໃຈດີວ່າຖ້າມີນຳ້ຖ້ວມຂະນະເດີນທາງໄປໂຮງຮຽນ, ໄປເຮັດວຽກ ຈະຍ່າງຜ່ານໄປໄດ້ກໍຕ້ອງໄດ້ປົດເກີບອອກ ບໍ່ດັ່ງນັ້ນເກີບຈະປຽກ ແລະ ເສຍຫາຍ, ແຕ່ຮູ້ຫລືບໍ່ວ່າການປົດເກີບຍ່າງນຳ້ຖ້ວມສ່ຽງຕໍ່ການຢຽບສິ່ງຂອງມີຄົມ ເຊັ່ນ : ເສດແກ້ວ, ເສດເຫລັກຕາມທໍ່ລະບາຍນຳ້ໄດ້ງ່າຍໆ ຫລື ຫາກນຳ້ຖ້ວມອ່າວຂຸ້ນອາດເຮັດໃຫ້ເບິ່ງບໍ່ເຫັນພື້ນຖະໜົນຫົນທາງຈົນຍ່າງຕົກທໍ່, ຕົກຄອງກັນໄປຫລາຍຄົນ.
ນອກຈາກນີ້ ຍັງສ່ຽງເຊື້ອພະຍາດເຂົ້າສູ່ຮ່າງກາຍຜ່ານບາດແຜນ້ອຍໆຕາມຕີນຂອງເຮົາໄດ້ ເພາະຕີນຂອງເຮົາໃຊ້ຍ່າງຢູ່ທຸກມື້ອາດຈະມີຮອຍບາດແຜຈາກເກີບກັດ, ນິ້ວຕີນສຽດສີກັບເກີບຈົນຜິວໜັງລອກ, ຕັດເລັບສັ້ນ ຫລື ໜັງບໍລິເວນກົກເລັບລອກ, ບາດແຜນ້ອຍເຫລົ່ານີ້ອາດເຮັດໃຫ້ເຊື້ອພະຍາດຕ່າງໆເຂົ້າສູ່ຮ່າງກາຍ ຈົນເຮັດໃຫ້ເປັນພະຍາດຕ່າງໆໄດ້ ເຊັ່ນ : ພະຍາດຍ່ຽວໜູ ຫລື ເລບໂຕສະໄປໂຣຊິສ, ນຳ້ຄັນກັດຕີນ ເປັນຕົ້ນ.
- ຮັກສາຄວາມສະອາດໃຫ້ພຽງພໍ : ຫາກຈຳໃຈຈຳຍອມຍ່າງລຸຍນຳ້ມາແທ້ໆກໍມີຫລາຍຄົນທີ່ລ້າງຕີນ, ລ້າງມືຢູ່ໂຮງຮຽນ, ຫ້ອງການ, ແຕ່ອາດບໍ່ມີອຸປະກອນເຮັດຄວາມສະອາດພຽງພໍ ຈາກນັ້ນເຮົາກໍເອົາມືທີ່ສຳຜັດກັບຕີນມາຈັບອາຫານ ຫລື ສຳຜັດຮ່າງ ກາຍຂອງເຮົາ ເຮັດໃຫ້ຕິດເຊື້ອເຂົ້າໄປໄດ້ອີກ ເຊັ່ນ : ພະຍາດຕາແດງ, ພະຍາດທາງລະບົບອາຫານ ເປັນຕົ້ນ.
- ບໍ່ລະວັງສິ່ງອ້ອມໂຕ : ນອກຈາກຄວາມເປິເປື້ອນຂອງນຳ້ແລະ ສິ່ງອັນຕະລາຍທີ່ເຮົາອາດຢຽບຈົນເປັນບາດແຜ ໃນລະຫ່ວາງທີ່ເກີດນຳ້ຖ້ວມ ເຮົາຄວນລະມັດລະວັງສິ່ງອ້ອມໂຕນຳ ເຊັ່ນ : ສາຍໄຟຟ້າ, ແກ໊ສຫຸງຕົ້ມ ຄວນຫລີກເວັ້ນບໍລິເວນທີ່ສາຍໄຟຟ້າກ້ຽວພັນກັນທີ່ອາດສຳຜັດກັບນຳ້ ຈົນອາດເກີດໄຟຟ້າຊັອດໄດ້ ຫລື ແມ່ນແຕ່ຖັງແກ໊ສ, ເຕົາແກ໊ສ ທີ່ອາດເກີດອັນຕະລາຍໄດ້ເຊັ່ນກັນ. ດັ່ງນັ້ນ ເມື່ອເຫັນສິ່ງເຫລົ່ານີ້ ຄວນໜີໃຫ້ໄກຈາກບໍລິເວນດັ່ງກ່າວໃຫ້ຫລາຍທີ່ສຸດຈະດີກ່ວາ.
- ນຳ້ຫລຸດລົງ ລືມຂວຳ້ນຳ້ : ຂວຳ້ນຳ້ທີ່ວ່ານີ້ ໝາຍເຖິງ ຖ້ວຍ, ຈານ, ຊາມ, ຄຸ, ພາຖາດຮອງກະຖາງຕົ້ນໄມ້, ກະໂປະ, ກະປ໋ອງ ແລະ ພາຊະນະທີ່ນຳ້ຂັງໄດ້ທຸກຊະນິດ ເມື່ອນຳ້ຫລຸດລົງແລ້ວ ບາງຄົນກໍລືມຂວຳ້ນຳ້ອອກຈາກສິ່ງເຫລົ່ານີ້ ຈົນເຮັດໃຫ້ເກີດເປັນນຳ້ຂັງທີ່ຈະກາຍເປັນແຫລ່ງເພາະພັນຍຸງ ໂດຍສະເພາະຍຸງລາຍໄດ້ພາຍໃນເວລາອັນວ່ອງໄວ ເຊິ່ງເປັນສາເຫດຂອງພະຍາດໄຂ້ເລືອດອອກ.
ເຖິງວ່າເລື່ອງນຳ້ຖ້ວມຈະເປັນບັນຫາ ແຕ່ການຈັດການໂຕເອງໃຫ້ດີເມື່ອເກີດນຳ້ຖ້ວມ ຄື ໃສ່ເກີບໂບກທຸກເທື່ອທີ່ຕ້ອງລຸຍນຳ້, ຮັກສາຄວາມສະອາດທັງມື, ຕີນ ແລະ ຮ່າງກາຍໃຫ້ດີ, ຫລີກເວັ້ນການຍ່າງລຸຍນຳ້ ບໍ່ວ່າຈະຢູ່ໃສຫາກບໍ່ຈຳເປັນກໍໃຫ້ອອກຫ່າງໄກຈາກສາຍໄຟຟ້າ ແລະ ກຳຈັດແຫລ່ງເພາະພັນຍຸງລາຍໃຫ້ຄົບ ເທົ່ານີ້ບັນຫານຳ້ຖ້ວມກໍຈະຫລຸດຜ່ອນຈາກໜັກເປັນເບົາໄດ້ໃນລະດັບໜຶ່ງແລ້ວ.
