ຮອງນາຍົກລັດຖະມົນຕີ ຊີ້ນໍາວຽກງານໄພພິບັດຢູ່ແຂວງບໍ່ແກ້ວ

ວັນທີ 13 ກັນຍານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທັງເປັນປະທານຄະນະກໍາມະການສະເພາະກິດແກ້ໄຂໄພພິພັດລະດັບຊາດ ໄດ້ໃຫ້ກຽດພົບປະໂອ້ລົມໃຫ້ທິດຊີ້ນໍາຕໍ່ວຽກງານຕ້ານ ແລະ ສະກັດກັ້ນໄພພິບັດທຳມະຊາດໃຫ້ແກ່ຄະນະນໍາແຂວງບໍ່ແກ້ວ, ໂດຍສະເພາະແມ່ນໃຫ້ເລັ່ງຟື້ນຟູຊີວິດການເປັນຢູ່ຂອງປະຊາຊົນຫລັງນໍ້າຖ້ວມໃຫ້ໄດ້ຮັບຜົນ.

ໃນໂອກາດນີ້ ກໍໄດ້ຮັບຟັງລາຍງານຈາກທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວວ່າ: ຕະຫລອດໄລຍະຜ່ານມາ, ການພພັດທະນາເສດຖະກິດ-ສັງຄົມຂອງແຂວງມີຄວາມເຕີບໂຕໃນລະດັບດີໃນຫລາຍດ້ານ, ການເກັບລາຍຮັບທຽບໃສ່ໄລຍະເວລາດຽວກັນຂອງປີຜ່ານມາເພີ່ມ 7,7%. ສະເລ່ຍລາຍຮັບພົນລະເມືອງຜູ້ໜຶ່ງບັນລຸໄດ້ 1.770 ກວ່າໂດລາຕໍ່ປີ. ໃນນີ້ດ້ານກະຊິກຳປ່າໄມ້ເພິ່ມຂື້ນ 6,1%, ກວມເອົາ 38,52% ຂອງ GDP, ອຸດສາຫະກຳເພິມຂື້ນ 7,5%, ກວມ 20,63% ແລະ ການບໍລິການເພິ່ມຂື້ນ 9,5%, ກວມເອົາ 40,85% ຂອງ GDP. ມາຮອດປະຈຸບັນຍັງມີບ້ານທຸກຍາກ 41 ບ້ານ ເຊິ່ງກວມເອົາ 16,53% ຂອງຈຳນວນບ້ານໃນທົ່ວແຂວງ, ມີຄອບຄົວທຸກຍາກ 3.534 ຄົວເຮືອນ, ກວມ 10% ຂອງຄອບຄົວທົ່ວແຂວງ, ແລະ ມີ 3 ເມືອງທີ່ຍັງທຸກຍາກ. ໃນຂະນະດຽວກັນຈໍານວນໜຶ່ງໄດ້ປະສົບໄພນໍ້າຖ້ວມມີເຮືອນເປ່ເພເສຍຫາຍ 4 ຫລັງ, ມີເຫລົ້າເຂົ້າຖຶກນໍ້າໄຫຼຊຸ 3 ຫລັງ, ມີເຂົ້າເປືອກເສ່ນຫາຍ 9 ໂຕນ.

ໃນໂອກາດນີ້, ທ່ານ ຮອງລັດຖະມົນຕີໄດ້ສະແດງຄວາມຍ້ອງຍໍຊົມເຊີຍທີ່ແຂວງບໍ່ແກ້ວສາມາດຍາດມາໄດ້ຜົນສໍາເລັດໃນຫລາຍດ້ານ, ເຮັດໃຫ້ແຂວງສືບຕໍ່ມີຂະຫຍາຍຕົວຢ່າງຕໍ່ເນື່ອງ. ພ້ອມດຽວກັນນີ້, ທ່ານໄດ້ເນັ້ນໃຫ້ອໍານາດການປົກຄອງແຂວງສືບຕໍ່ຕິດຕາມກວດກາ ແລະ ເຝົ້າລະວັງໄພທຳມະຊາດທີ່ຈະເກີດຂື້ນ ໄປຄຽງຄູ່ກັບການກຽມພ້ອມຮັບມືກັບສະພາບປ່ຽນແປງຂອງດິນຟ້າອາກາດ ແລະ ກະກຽມຟື້ນຟູການຜະລິດ, ພາຍຫລັງນໍ້າແຫ້ງໃຫ້ເອົາໃຈໃສ່ເຝົ້າລະວັງພະຍາດລະບາດທີ່ອາດຈະເກີດຂຶ້ນກັບປະຊາຊົນ ແລະ ສັດລ້ຽງ, ພ້ອມກະກຽມສະໜອງ ແລະ ແຈກຢາຍເຄື່ອງບັນເທົ່າທຸກໃຫ້ປະຊາຊົນໄດ້ທົ່ວເຖິງ ແລະ ທັນການ ແລະ ໃຫ້ເກັບກໍາຂໍ້ມູນຄວາມຕ້ອງການຕົວຈິງຂອງປະຊາຊົນ, ປະເມີນຄືນຄວາມເສຍຫາຍທັງໝົດທີ່ເກີດຂຶ້ນ ເພື່ອວາງແຜນແກ້ໄຂ ແລະ ໃຫ້ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ ເພື່ອເຮັດໃຫ້ເຂົາເຈົ້າເປັນເຈົ້າການໃນການຟື້ນຟູຊີວິດການເປັນຢູ່ຂອງຕົນດີຂຶ້ນ.