ຮ່ວມກັນຫາລືໃສ່ແຜນໂຄງການເຄື່ອນຍ້າຍແຮງງານແບບປອດໄພ
ເພື່ອເປັນການປົກປ້ອງສິດ ແລະ ຜົນປະໂຫຍດຜູ້ອອກແຮງງານ ໄດ້ຮັັັບການຄຸ້ມຄອງ, ມີຄວາມຍຸຕິທຳ, ຮັບຮູ້ເຖິງສິດທິ ແລະ ກາລະໂອກາດ ຂອງແຮງງານເຄື່ອນຍ້າຍເພດຍິງໃນພາກພື້ນອາຊຽນ, ໃນວັນທີ 13 ກັນຍານີ້ ຄະນະກຳມະການຊີ້ນຳໂຄງການເຄື່ອນຍ້າຍແຮງງານແບບປອດໄພ ແລະ ມີຄວາມຍຸຕິທໍາໄດ້ຈັດກອງປະຊຸມຂອງຕົນຂຶ້ນ ທີ່ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ອານຸສອນ ຄຳສິງສະຫວັດ ຫົວໜ້າກົມພັດທະນາສີມືແຮງງານ ແລະ ຈັດຫາງານ, ມີທ່ານຜູ້ຕາງໜ້າຈາກອົງການແຮງງານສາກົນ, ຜູ້ຕາງໜ້າຄູ່ຮ່ວມງານຈາກອົົງການຈັດຕັ້ງສາກົນທີ່ປະຕິບັດວຽກງານແຮງງານເຄື່ອນຍ້າຍ, ຜູ້ຕາງໜ້າຈາກກະຊວງ ແລະ ຂະແໜງການທີ່ກ່ຽວຂ້ອງຕ່າງໆເຂົ້າຮ່ວມເປັນຈຳນວນຫລາຍ.
ກອງປະຊຸມ ບັນດາຜູ້ແທນຕ່າງໆກໍໄດ້ປຶກສາຫາລືປະກອບຄຳຄິດເຫັນໃສ່ແຜນງານ ແລະ ກິດຈະກຳຂອງໂຄງການໃນປີທີ 1 ແລະ 2, ພ້ອມທັງເປັນເອກະພາບ ແລະ ຮັບຮອງເອົາແຜນງານ ແລະ ກິດຈະກຳດັ່ງກ່າວ ເພື່ອໃຫ້ພາກສ່ວນຕ່າງໆທີ່ກ່ຽວຂ້ອງນຳໄປຈັດຕັ້ງປະຕິບັດເຂົ້າໃນໂຄງການເຄື່ອນຍ້າຍແຮງງານແບບປອດໄພ ແລະ ມີຄວາມຍຸຕິທໍາ: ການຮັບຮູ້ເຖິງສິດທິ ແລະ ກາລະໂອກາດຂອງແຮງງານເຄື່ອນຍ້າຍເພດຍິງໃນພາກພື້ນອາຊຽນ ມີຈຸດປະສົງໃນການເພີ່ມທະວີເຮັດໃຫ້ການເຄື່ອນຍ້າຍແຮງງານຂອງເພດຍິງມີຄວາມປອດໄພ ແລະ ມີຄວາມຍຸຕິທຳ. ໂຄງການດັ່ງກ່າວແມ່ນໂຄງການລະດັບພາກພື້ນ ໂດຍໄດ້ຮັບການສະໜັບສະໜູນທາງດ້ານງົບປະມານຈາກສະຫະພາບອີຢູ ມູນຄ່າ 25,5 ລ້ານເອີໂຣ (EUD) (ປີ2018-2022) ປະຕິບັດຢູ່ 6 ປະເທດຄື: ກຳປູເຈຍ, ອິນໂດເນເຊຍ, ລາວ, ມຽນມາ, ຟີລິບປິນ, ຫວຽດນາມ ແລະ 4 ປະເທດຄື: ບຣູໄນ, ມາເລເຊຍ, ສິງກະໂປ ແລະ ໄທ ເປັນສ່ວນໃຫຍ່. ສະນັ້ນ, ໂຄງການນີ້ຈຶ່ງມີຄວາມສໍາຄັນ ແລະ ຈໍາເປັນທີ່ສຸດສໍາລັບ ສປປ ລາວ ໃນເງື່ອນໄຂຖານະທີ່ເປັນປະເທດສົ່ງ ເນື່ອງຈາກໂຄງການດັ່ງກ່າວຈະສຸມໃສ່ເຮັດໃຫ້ແຮງງານເຄື່ອນຍ້າຍເພດຍິງໄດ້ຮັບການປົກປ້ອງ, ຄຸ້ມຄອງ ແລະ ຮັບຮູ້ສິດຂອງຕົນໂດຍຜ່ານການຮ່ວມມືຂອງອົງການຈັດຕັ້ງລັດ ແລະ ສາກົນທີ່ກ່ຽວຂ້ອງໃນການສ້າງແຜນງານ, ການພັດທະນາລະບົບການປົກປ້ອງ, ການຄຸ້ມຄອງ ແລະ ການປັບປຸງນະໂຍບາຍຕ່າງໆທີ່ກ່ຽວຂ້ອງ ແນໃສ່ເຮັດໃຫ້ແຮງງານເຄື່ອນຍ້າຍເພດຍິງມີສ່ວນຮ່ວມຫຼາຍຂຶ້ນໃນການພັດທະນາເສດຖະກິດ-ສັງຄົມໃນຂົງເຂດ ແລະ ພາກພື້ນອາຊຽນ.
