ທະນາຄານແຫ່ງ ສປປ ລາວ ເຊື່ອມຊຶມບັນດາເອກະສານສໍາຄັນຂອງພັກ

ອົງຄະນະພັກທະນາຄານແຫ່ງ ສປປ ລາວ ໄດ້ຈັດຕັ້ງການເຊື່ອມຊຶມເອກະສານສໍາຄັນຕ່າງໆ ຂອງຊາດ ແລະ ຂອງພັກ  ຂຶ້ນທີ່ຫ້ອງ ໃນວັນທີ 15ກັນຍານີ້  ທີ່ທະນາຄານດັ່ງກ່າວພາຍໃຕ້ການເປັນປະທານຂອງສະຫາຍ ສອນໄຊ ສິດພະໄຊ ກໍາມະການສໍາຮອງສູນກາງພັກ, ເລຂາຄະນະພັກ, ຮັກສາການຜູ້ວ່າການທະນາຄານແຫ່ງ ສປປລາວ, ໂດຍມີບັນດາສະຫາຍຄະນະພັກ, ຄະນະພັກ ຄະນະໜ່ວຍພັກຮາກຖານ ແລະ ບັນດາກົມເຂົ້າຮ່ວມຢ່າງພ້ອມພຽງ.

ໃນພິທີໄດ້ຮັບຟັງການເຜີຍແຜ່ເອກະສານຕົ້ນຕໍ ຄື: ມະຕິກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກ ສະໄໝທີ X; ຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການເພີ່ມທະວີຄວາມຮັບຜິດຊອບຂອງຄະນະພັກ ໃນການຊີ້ນໍາ-ນຳພາ  ປ້ອງກັນ ແລະ ຮັບມືໄພພິບັດທໍາມະຊາດ; ເຜີຍແຜ່ມະຕິກອງປະຊຸມສະພາແຫ່ງຊາດ, ເຜີຍແຜ່ຄໍາສັ່ງຂອງນາຍົກລັດຖະມົນຕີ  ແລະ ບົດແນະນໍາຂອງກະຊວງແຜນ ການ ແລະ ການລົງທຶນ ທີ່ກ່ຽວຂ້ອງກັບບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ, ແຜນງົບປະມານແຫ່ງລັດ ປະຈໍາ 4 ເດືອນຜ່ານມາ, ຄາດຄະເນການປະຕິບັດແຜນ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2018; ກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ແລະ ວຽກງານຈຸດສຸມ 6 ເດືອນທ້າຍປີ 2018 ແລະ ການສ້າງແຜນການ ປະຈໍາປີ 2019.

ພ້ອມນີ້; ກອງປະຊຸມ ໄດ້ຮັບຟັງການເຜີຍແຜ່ຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ດໍາເນີນກອງປະຊຸມໃຫຍ່ ອົງຄະນະພັກກະຊວງ-ອົງການ, ແຂວງ-ນະຄອນຫຼວງ, ອົງຄະນະພັກເມືອງ-ນະຄອນ ແລະຮາກຖານພັກໃນຂອບເຂດທົ່ວປະເທດ; ເຜີຍແຜ່ຄໍາແນະນໍາ ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ,  ເຜີຍແຜ່ຄໍາແນະນໍາ ກ່ຽວກັບການຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ແລະ ມະຕິຂອງຄະນະບໍລິຫານງານສູນກາງພັກ ວ່າດ້ວຍການຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍນຳອີກ.

ພ້ອມກັນນີ້ ສະຫາຍເລຂາຄະນະພັກ, ຍັງໄດ້ຮຽກຮ້ອງໃຫ້ບັນດາຮາກຖານພັກຕ່າງໆນໍາເອົາເນື້ອໃນຈິດໃຈດັ່ງກ່າວ ໄປຈັດຕັ້ງຜັນຂະຫຍາຍເຂົ້າສູວຽກງານຂອງຕົນໃຫ້ປະກົດຜົນເປັນຈິງ.

# ຂ່າວ-ພາບ: ຣັດສະໝີ ດວງສັດຈະ